“Ade mbi wara pendere cadeau tongaso ape”

So ayeke tënë so mbeni molenge-wali ti ngu 13 atene na ngoi so a mû na lo mbeni kete mbo. Mbeni wali atene so pendere cadeau so lo wara ayeke ordinateur so babâ ti lo amû na lo na ngoi so lo ngbâ na lycée. Lo tene so cadeau ni achangé gigi ti ni. Mbeni koli so amû wali fini fini atene so ti lo pendere cadeau ni ayeke kozo carte ti anniversaire ti mariage ti ala so wali ti lo amû na lo. Wali ni la aleke ni.

Ngu oko oko, azo mingi ayeke sara kue ti mû mbeni “pendere” cadeau na mbeni kamarade ti ala wala na mbeni fami ti ala na mbeni lango so ayeke nde. Mingi ni tongana zo amû cadeau na mba ti lo, lo ye ti mä mara ti tënë so azo so e sara tënë ti ala na nduzu ge atene so. Ka mo, mo ye ti mû pendere cadeau na mbeni zo? Wala mo ye ti tene a mû na mo pendere cadeau?

Tongana zo awara pendere cadeau terê ti lo ayeke nzere, me zo so asara cadeau ni so kue terê ti lo ayeke nzere. Tâ tënë la Bible atene so: “Mungo ye na zo aga na ngia mingi ahon warango ye na tïtî zo.” (Kusala 20:35). Ni la terê ti zo apeut ti kiri ti nzere mingi tongana cadeau so lo mû na mbeni zo ayeke ye so zo ni abâ na nene ni mingi.

Nyen la mo lingbi ti sara ti tene mo wara ngia na ngoi so mo mû cadeau na mbeni zo nga ti tene zo ni nga awara ngia? Ka tongana mo hinga “pendere” cadeau wa la mo lingbi ti mû na mbeni zo ape, nyen la mo lingbi ti sara ti tene lo bâ cadeau so mo mû na lo tâ na nene ni mingi?