Ababâ na amama, ala yeke mû maboko na amolenge ti ala ti maï ti wara batême?

1. Nyen la ababâ na amama so ayeke aChrétien aye ti hinga kozo si amolenge ti ala awara batême?

“NA YÂ ti anze mingi mbi yeke tene na Papa na Mama so mbi ye ti wara batême, na ala yeke sara lakue lisoro na mbi na ndö ni. Ala ye ti hinga wala eskê mbi hinga so desizion so mbi mû so ayeke biani kota ye na lê ti mbi. Na lango 31 ti décembre, ngu 1934, mbi sara kota ye so na yâ ti fini ti mbi.” A yeke tongaso la Blossom Brandt afa ye so asi na ngoi so lo mû desizion ti wara batême. Laso, ababâ na amama aye nga ti mû maboko na amolenge ti ala ti mû anzoni desizion. Ti kiri na lango ti batême na peko senge senge alingbi ti ga na akpale na lege ti yingo (Jacq. 4:17). Ye oko, ababâ na amama so asara ye na ndara aye biani ti hinga wala amolenge ti ala ayeke nduru ti sara ye tongana aChrétien kozo si ala wara batême.

2. (a) Ambeni surveillant ti circonscription agi bê ti ala ngbanga ti nyen? (b) Nyen la e yeke sara tënë na ndö ni na yâ ti article so?

² Ambeni surveillant ti circonscription agi bê ti ala ndali ti so ala tingbi na amaseka so ayeke na ngu 20 tongaso, so akono na yâ ti sewa ti aChrétien, me so ade ala wara batême ape. Mingi ni, ala yeke ga na abungbi nga ala yeke fa tënë. Ala bâ terê ti ala tongana aTémoin ti Jéhovah. Me ndali ti ambeni raison ade ala mû fini ti ala na Jéhovah ape nga ade ala wara batême ape. Raison ni alingbi ti duti nyen? Ti ambeni, ababâ na amama ti ala awa ala ti kiri na lango ti batême ti ala na peko. Na yâ ti article so e yeke bâ ambeni ye osio so akanga lege na ababâ na amama ti mû maboko na amolenge ti ala ti maï ti wara batême.

MOLENGE TI MBI ALINGBI AWE?

3. Babâ na mama ti Blossom agi lani bê ti ala na ndö ti nyen?

³ Babâ na mama ti Blossom, so a sara tënë ti ala na yâ ti kozo paragraphe so, ayeke gi lani bê ti ala wala ngu ti molenge ti ala alingbi awe ti hinga nda ti batême nga lo bâ ni tongana ye ti ngia ape. Tongana nyen la ababâ na amama alingbi ti hinga so molenge ti ala alingbi awe ti mû terê ti lo na Jéhovah?

4. Yanga so Jésus amû so ayeke na Matthieu 28:19, 20 alingbi ti mû maboko na ababâ na amama tongana nyen ti fa ye na amolenge ti ala?

⁴ Diko Matthieu 28:19, 20. Tongana ti so e bâ na yâ ti article so ahon, Bible afa pëpe mbeni mbilimbili ngu so zo asi dä awe si lo wara batême. Ye oko, ababâ na amama alingbi ti gbu li ti ala na ndö ti nda ti ye so aye ti tene ti sara si azo aga adisciple. Tënë ti Grec so a kiri peko ni na ‘sara si azo aga adisciple’ na Matthieu 28:19 aye ti sara tënë ti fango ye na azo na bibe ti tene ala ga adisciple. Disciple ayeke zo so amanda aye so Jésus afa nga lo mä yâ ni nga so aye ti sara ye alingbi na ni. Tongaso, ababâ na amama so ayeke aChrétien adoit ti komanse ti fa ye na amolenge ti ala na ngoi so ala dü ala na bibe ti tene ala wara batême ti ga adisciple ti Christ. Tâ tënë, mbeni bébé alingbi ti wara batême ape. Me Bible afa so même amolenge so ade kete alingbi ti mä yâ ti atâ tënë ti Bible na ti ye ni.

5, 6. (a) Ye so Bible afa na ndö ti Timothée asara si e tene nyen na ndö ti batême ti lo? (b) Tongana nyen la ababâ na amama so asara ye na ndara alingbi ti mû maboko na amolenge ti ala nzoni?

⁵ Timothée ayeke lani mbeni disciple so amû desizion ti sara na Jéhovah na ngoi so lo de kete. Bazengele Paul atene so Timothée amanda atâ tënë ti Bible na ngoi so lo de foroto. Babâ ti Timothée ayeke lani wakua ti Jéhovah ape, me mama ti lo nga na âta ti lo ti wali amû maboko na lo ti ye Mbeti ti Nzapa. Ye so asara si lo yeke lani na kpengba mabe (2 Tim. 1:5; 3:14, 15). Peut-être lo yeke lani na ngu 20 tongaso na ngoi so lo wara pasa ti sara ambeni kua so ayeke nde na yâ ti congrégation.​—Kus. 16:1-3.

⁶ Amolenge kue ayeke oko ape. Ala kue ayeke ga biazo legeoko ape. Ambeni molenge, na ngoi so ala de kete, ala mä yâ ti tâ tënë, ala mû nzoni desizion nga ala ye ti wara batême. Ambeni ayeke nduru ape ti wara batême juska ala kono awe si. Ni la, ababâ na amama so asara ye na ndara ayeke forcé amolenge ti ala ape ti wara batême. Me ala yeke mû maboko na ala oko oko alingbi na ngangu ti molenge ni ti maï na lege ti yingo. Ababâ na amama ayeke na ngia tongana amolenge ti ala asara ye alingbi na aProverbe 27:11. (Diko ni.) Me a lingbi ala girisa ape so ye so ala yeke gi ayeke ti fa ye na amolenge ti ala ti tene ala ga adisciple. Na tënë so na li, a lingbi ababâ na amama ahunda terê ti ala: ‘Molenge ti mbi ahinga ye nzoni awe ti mû terê ti lo na Nzapa nga ti wara batême?’

MOLENGE TI MBI AHINGA YE NZONI AWE?

7. Zo abezoin ti hinga ye kue na yâ ti Bible awe si lo wara batême? Fa ngbanga ti nyen la mo tene tongaso.

⁷ A yeke na lege ni so ababâ na amama so ayeke fa ye na yâ ti sewa aye ti tene amolenge ti ala awara tâ hingango ye so ayeke mû lege na ala ti mû terê ti ala na Nzapa. Atâa so kue, zo ayeke pëpe na bezoin ti hinga ye kue awe si lo mû terê ti lo na Nzapa nga lo wara batême. Adisciple ti Christ kue abezoin ti ngbâ ti manda ye même na peko ti batême ti ala. (Diko aColossien 1:9, 10.) Tongaso, aye wa la zo adoit ti hinga ni kozo si lo wara batême?

8, 9. Aye wa la e lingbi ti manda na lege ti ye so asi na Paul nga na zo ti batango da ti kanga?

⁸ Mbeni ye so asi na azo ti mbeni sewa ândö alingbi ti mû maboko na ababâ na amama laso (Kus. 16:25-33). Na ngoi ti use voyage ti missionnaire ti Paul na ngu 50 tongaso, lo si na Philippe. Na ngoi so lo yeke kâ, a bi atënë ti mvene na li ti lo na kamarade ti lo Silas na a gbu ala a bi ala na da ti kanga. Na bï, sese ayengi na fondation ti da ti kanga ni ayengere nga ayanga ti da ni kue azi. Zo ti batango da ti kanga ni abâ atene azo ti kanga ni akpe awe na lo ye ti fâ terê ti lo. Me Paul akanga lege na lo. Na pekoni, Paul na Silas afa tënë na zo ti batango da ti kanga ni nga na azo ti sewa ti lo. Ala mä na bê na aye so a fa na ala na ndö ti Jésus nga ala bâ so a yeke kota ye ti mä yanga ti lo. Ala wara batême sân ti ku. Nyen la e lingbi ti manda na lege ti ye so asi so?

⁹ Peut-être zo ti batango da ti kanga ni ayeke mbeni turugu so ague na retraite awe. Lo hinga Mbeti ti Nzapa ape. Tongaso, ti wara tâ hingango ye ti Mbeti ti Nzapa, a lingbi lo manda akozo tâ tënë ti Bible, lo hinga aye so Jéhovah ahunda na awakua ti lo nga lo leke na bê ti lo ti sara ye alingbi na afango ye ti Jésus. Aye so lo manda na yâ ti kete ngoi amû maboko na lo ti yeda ti wara batême. Kite ayeke dä ape so lo ngbâ ti manda ye mingi na peko ti batême ti lo. Tongaso, tongana molenge ti mo atene na mo so lo ye ti wara batême ndali ti so lo ye Jéhovah nga lo ye ti mä yanga ti lo, nyen la mo lingbi ti sara? Mo lingbi ti zia lege na lo ti sara tënë ni na a-ancien ti tene ala bâ wala lo lingbi awe ti wara batême.a Legeoko tongana tanga ti adisciple, lo yeke ngbâ ti gi ti hinga ye mingi na ndö ti Jéhovah na yâ ti fini ti lo kue, même teti lakue lakue.​—aRom. 11:33, 34.

FANGO YE WA LA AYEKE NZONI MINGI NDALI TI MOLENGE TI MBI?

10, 11. (a) Pensé wa la ambeni babâ na mama ayeke na ni? (b) Nyen la ayeke bata biani molenge?

¹⁰ Ambeni babâ na mama abâ so a yeke nzoni ti tene molenge ti ala akiri na lango ti batême ti lo na peko ti tene lo manda mbeti ayo nga lo wara kua ti nginza kozo awe si lo wara batême. Peut-être ala sara na sioni pensé ape, me eskê a lingbi ti mû maboko biani na molenge ti ala ti ga zo? Eskê sarango tongaso ague oko na ye so e manda na yâ ti Bible? Bible awa e ti sara nyen na fini ti e?​—Diko Zo-ti-fa-tene 12:1.

¹¹ A yeke kota ye ti girisa ape so dunia so nga na aye kue so ayeke na yâ ni ague nde na ye so Jéhovah aye nga na apensé ti lo (Jacq. 4:7, 8; 1 Jean 2:15-17; 5:19). Tongana molenge ayeke na kpengba songo na Jéhovah ayeke nzoni ye so ayeke bata lo si Satan, dunia ti lo nga na asioni pensé ti dunia ni asara sioni na lo ape. Tongana babâ na mama azia tënë ti mandango mbeti nga na nzoni kua ti nginza kozo na yâ ti gigi ti ala, peut-être molenge ti ala ayeke pensé so aye so la ayeke kota ahon dutingo na kpengba songo na Jéhovah. Eskê babâ na mama so aye molenge ti ala ayeke yeda biani ti zia si dunia so la afa na molenge ni ye so ala pensé atene ayeke sara si lo ga zo? Oko ye so alingbi ti sara si e ga zo nga e duti na tâ ngia ayeke ti zia Jéhovah na kozo ndo na yâ ti fini ti e.​—Diko Psaume 1:2, 3.

KA TONGANA MOLENGE TI MBI ASARA SIOKPARI?

12. Ngbanga ti nyen la ambeni babâ na mama aye ti tene amolenge ti ala awara batême hio ape?

¹² Mbeni mama so ayeke Témoin afa ngbanga ti nyen la lo ye lani ape ti tene molenge ti lo ti wali awara batême. Lo tene: “Kamene asara mbi ti tene so kota raison ni ayeke bingo zo na gigi ti bungbi.” Legeoko tongana ti ita-wali so, ambeni babâ na mama atene so a yeke nzoni ti tene amolenge ti ala awara batême ape juska ala kono ti ke ye ti buba awe si (Gen. 8:21; aProv. 22:15). Peut-être ala tene: ‘Tongana molenge ti mbi awara batême ape, a lingbi ti bi lo na gigi ape.’ Ngbanga ti nyen la mara ti tënë tongaso ayeke na lege ni ape?​—Jacq. 1:22.

13. Fa ndani so tongana mbeni zo awara batême ape aye pëpe ti tene so lo yeke kiri tënë pëpe na Jéhovah.

¹³ A yeke na lege ni so ababâ na amama so ayeke aChrétien aye ti tene amolenge ti ala aga abiazo awe si ala mû terê ti ala na Nzapa. Me a yeke na lege ni ape ti tene ala tene so, so amolenge ti ala ade ti wara batême ape ala yeke na tënë pëpe ti kiri na ni na Jéhovah. Ngbanga ti nyen? A yeke pëpe batême la asara si zo ayeke kiri tënë na Jéhovah. Me mbeni molenge ayeke kiri tënë na Nzapa tongana lo hinga ye so ayeke nzoni wala ye so ayeke sioni na lê ti Jéhovah. (Diko Jacques 4:17.) Tongaso, ahon ti découragé mbeni molenge ti wara batême, ababâ na amama so ayeke sara ye na ndara ayeke sara kue ti zia nzoni tapande na molenge ti ala. Même tongana molenge ni ade kete ala yeke fa na lo ti ye ye so Jéhovah atene ayeke nzoni nga ti ke ye so lo tene ayeke sioni, gï tongana ti so ala sara (Luc 6:40). Tongana molenge ti mo aye Jéhovah ayeke bata lo si lo sara mbeni kota siokpari ape, ndali ti so lo yeke ye ti sara ye so Jéhovah atene ayeke nzoni.​—És. 35:8.

AMBENI ZO ALINGBI TI MÛ MABOKO

14. Tongana nyen la a-ancien alingbi ti mû ngangu na ye so ababâ na amama ayeke sara ti mû maboko na amolenge ti ala ti gue na li ni ti wara batême?

¹⁴ Ndali ti so a-ancien ayeke aberger na lege ti yingo, ala lingbi ti mû maboko na ababâ na amama so ayeke sara ngangu ti mû maboko na amolenge ti ala na lege so ala sara nzoni tënë ti aye ti yingo so zo alingbi ti leke ti sara. Mbeni ita-wali so asara lani kua ti pionnier ahon ngu 70 adabe ti lo na lisoro so lo na Ita Charles Russell asara, na ngoi so lo yeke lani na ngu omene, nga na ye so asara na ndö ti lo. Lo tene: “Lo mû penze-ngbonga 15 ti sara lisoro na mbi na ndö ti aye so mbi leke na bê ti mbi ti sara na lege ti yingo.” Biani, anzoni tënë nga na atënë so e tene ti kpengba mbeni zo alingbi ti sara ye mingi na lo na yâ ti fini ti lo kue (aProv. 25:11). A-ancien alingbi ti zia ababâ na amama na amolenge ti ala na yâ ti akua so a yeke sara na Da ti Royaume, ala lingbi ti mû na amolenge ambeni kua so alingbi na ngu ti ala nga na ngangu ti ala.

15. Amembre ti congrégation alingbi ti mû maboko na amaseka tongana nyen?

¹⁵ Amembre ti congrégation alingbi nga ti mû maboko na lege so ala sara ambeni ye ti fa so ala bi bê na amaseka. Mbeni ye ni ayeke ti gi ti bâ ambeni ye so afa so amaseka ayeke maï na lege ti yingo. Mbeni maseka amû mbeni pendere commentaire na bungbi wala lo sara mbeni devoir na bungbi ti milieu ti yenga? Mbeni maseka angbâ be-ta-zo na yâ ti mbeni tara wala lo fa tënë na ekole? Gonda lo hio na bê ti mo kue. E lingbi ti leke na bê ti e ti sara lisoro na amaseka kozo wala na peko ti bungbi. Tongana e sara tongaso, amolenge ayeke bâ so ala yeke amembre ti “kota congrégation”.​—Ps. 35:18.

MÛ MABOKO NA MOLENGE TI MO TI MAÏ TI WARA BATÊME

16, 17. (a) Ngbanga ti nyen la a yeke kota ye ti tene amolenge awara batême? (b) Ngia wa la ababâ na amama kue so ayeke aChrétien ayeke sara ngangu ti wara ni? (Bâ foto so ayeke na tongo nda ti article so.)

¹⁶ Ti bata amolenge alingbi na “fango lege nga na wango ti gbotongo mê so alondo na Jéhovah” ayeke mbeni kota kua so ababâ na amama ayeke na ni ti sara (aÉph. 6:4; Ps. 127:3). Na mara ti Israël lani, na ngoi so a dü amolenge a zia ala nde awe ndali ti Jéhovah. Me ti amolenge so babâ na mama ti ala ayeke aChrétien ayeke tongaso ape. Na ndö ni, a dü zo dungo na ndoye ti Nzapa nga na ti tâ tënë ape. Na ngoi so a dü mbeni molenge, a lingbi babâ na mama afa ye na lo na bibe ti tene lo ga disciple, ala mû maboko na lo ti ga zo so amû terê ti lo na Jéhovah nga ti ga wakua ti lo. Mbeni ye ti hon ni ayeke dä? Mungo terê ti zo na Nzapa, batême ti lo nga na dutingo be-ta-zo ti lo na Nzapa la ayeke mû lege na lo ti sö fini ti lo na ngoi ti kota ye ti vundu so ayeke ga.​—Mat. 24:13.

¹⁷ Na ngoi so Blossom Brandt amû desizion ti wara batême, babâ na mama ti lo so akpe mbeto ti Nzapa aye lani ti hinga wala lo yeke nduru ti sara kpengba ye so na yâ ti fini ti lo. So ala bâ so lo yeke nduru, ala mû maboko na lo na yâ ti desizion ti lo ni. Na bï so na ndade ni lo wara batême, babâ ti lo asara mbeni pendere ye. Blossom atene: “Lo tene e na lo kue e sara agenou na lo sambela. Lo tene na Jéhovah so lo yeke na ngia mingi so kete molenge ti lo ti wali amû desizion ti mû terê ti lo na Lo.” Ngu 60 na ndö ni na pekoni, Blossom atene: “Mbi lingbi ti girisa bï so lâ oko ape.” Ababâ na amama, zia ala nga ala wara ngia na ngoi so ala bâ amolenge ti ala amû terê ti ala na Nzapa na ala wara batême ti ga ambeni wakua ti Jéhovah.