Fa nzo tënë na amolenge
1 Tongana mo bâ ndo na tele ti mo na mingi ti abungbi ti kongregation, nga biani na akota bungbi, mo yeke bâ polele so ‘amaseka, amasia, nga na amolenge’ ayeke mingi mingi, so ayeke sepela Jéhovah. (Ps. 148:12). A lingbi ye so adabe e kue na nene ti mû lege na amaseka so e wara na fango tënë ti manda ye na ndo Jéhovah, nga na azendo ti lo. Ala yeke wara ande lege so tongana e duti ndulu ti mû maboko, na e leke tele ti e. Aye nde nde ayeke dä so a lingbi e bâ ni.
2 A hunda ti tene zo abâ na nzoni lê amolenge, nga ngangu ti ala ti kono ndoye so ala yeke na ni na mbage ti Jéhovah. Atapande ti Bible tongana Samuel, David, na Timothée afa so amolenge alingbi ti mû tele ti ala kue na Nzapa. (1 Sam. 2:18; Ps. 71:17; 2 Tim. 3:14, 15). E yeke nga na atapande ti laso.
3 Tongana mbeni molenge ayeke na yanga-da: Tongana mbeni molenge azi yanga-da na mo, mo yeke hunda ka gi ti sala tënë na ababâ na mama ti lo? Mo yeke gue na mbeni yanga-da nde tongana ala yeke dä pëpe? Fini ti molenge so nga ayeke na nene ni. Ngbanga ti nyen mo leke yâ ti tënë ti mo pëpe ti fa nzo tënë na lo? Gi ti fa na lege so akpengba pëpe tongana nyen Paradis ayeke duti ande, wala ti fa hio mbeni tënë na ndo ye so ayeke si ande, alingbi ti zingo nzara ti amolenge. Na tapande, amolenge ahinga pendere mingi sambela ti Babâ ti e so ayeke na yayu. Tongana a fa na ala so gango tâ tënë ti sambela so ayeke ga ande na agbiango ye mingi, ala lingbi ti mä yâ ni hio.
4 Tongana e yeke fa tënë na amolenge, a yeke kota ye ti yekia ngangu ti komande ti ababâ na mama ti ala. A yeke nzoni e mû mbeti na amolenge na hange. A lingbi na ngu ti ala, a yeke peut-être nzoni ti hunda ala wala ababâ na mama ti ala ayeda na ala ti soro ala mveni mbeti ti diko. Tongana a yeke tongaso pëpe, me tongana ala sala nzara ti tënë ni, zia e fa tënë na ala gi na yanga, nga e leke ti kiri mbeni lâ tongana ababâ na mama ni ayeke na yanga-da. Ye so alingbi ti gue na e ti mû maboko na ababâ na mama ni nga.
5 Ti yapu na ti duti ndulu ti sala ye ahunda na e ti duti na ye so amaseka ayeke na bezoin ni. Bungbi ti Jéhovah aleke apendere mbeti so atënë ti yâ ni alingbi biani na amaseka ti ngu nde nde. Abuku Kota Maître na Mbaï ti atene ti Bible anzere mbilimbili na akete molenge. Abuku Les jeunes s’interrogent nga Tâ Ngia ti Sewa ayeke na anzoni wango ti mû maboko na ala so akono awe. So tâ ye ti mosoro si e wara na yâ buku Koli so ahon tanga ti azo kue! Apendere foto ti buku so alingbi ti sala si amaseka abâ aye ni na li ti ala, nga si akono na yâ ala nzara ti hinga Nzapa so aleke gbâ ti apendere ye na ndo sese. Girisa pëpe abrochure so ayeke na nzoroko, tongana Ouarango Nguia na ndo Sesse teti La Koue! Tongaso, na ngoi so mo yeke leke tele teti fango tënë, gbu li na ndo ye so mo lingbi ti gue na ni, so alingbi ti nzere na amaseka.
6 Fango ngbanga ti Jéhovah ayeke ndu ande azo kue, “apendere-koli na amasia, na akete molenge” nga. (Ezéch. 9:6). Ambeni ita so asala na Jéhovah teti angu mingi, ayeda na tâ tënë na ngoi so ala de kete. A lingbi ye so amû maboko na e ti bâ nene ti fa tënë na amolenge so e wara na fango tënë. E lingbi ti fa so e bi bê na ala na ndoye tongana ti so Jésus asala lani, na e ga na ala deba nzoni na fango nzo tënë na ala. (Mat. 19:14, 15). Bâ ndo na nzoni lê, na fa tënë mbilimbili na amolenge, na beku so ala nga kue alingbi ti ga ti sepela Jéhovah.