Tâ tënë na ndö ti Royaume ti Nzapa
Jésus afa lani na adisciple ti lo ti sambela tongaso: “Babâ ti e so mo yeke na yayu, zia a sara si iri ti mo aga nzoni-kue. Zia Royaume ti mo aga. Zia a sara ye so bê ti mo aye, na yayu legeoko nga na ndö ti sese.” (Matthieu 6:9, 10). Me, Royaume ti Nzapa ni ayeke nyen? Nyen la Royaume ni ayeke sara? Nga ngbanga ti nyen la a lingbi e sambela ndali ti Royaume ni?
Jésus la ayeke Gbia ti Royaume ti Nzapa.
Luc 1:31-33: “A lingbi mo zia iri ti lo Jésus. Lo yeke ga ande kota, na a yeke iri lo Molenge ti Lo so ayeke na nduzu na ndö ti aye kue. Jéhovah Nzapa ayeke mû ande na lo trône ti babâ ti lo David. Lo yeke komande tongana Gbia na ndö ti ahale ti Jacob lakue lakue. Nga, Royaume ti lo ayeke hunzi lâ oko pëpe.”
Mama-tene ti fango tënë ti Jésus aluti lani na ndö ti Royaume.
Matthieu 9:35: “Jésus atambela na yâ ti agbata nga na akete kodro oko oko kue. Lo fa ye na yâ ti asynagogue ti ala nga lo fa nzoni tënë ti Royaume. Lo sava mara ti akobela nde nde kue nga na ambage ti terê nde nde kue so abuba.”
Jésus afa na adisciple ti lo mbeni molongo ti aye so tongana ala bâ ni a yeke mû lege na ala ti hinga so Royaume ni aga nduru ti si awe.
Matthieu 24:7: “Mara ayeke londo na bira na terê ti mbeni mara, na royaume ayeke londo na bira na terê ti mbeni royaume. Kota nzara ayeke tï nga sese ayeke yengi, na aye so ayeke si na ando nde nde na peko ti terê.”
Laso adisciple ti Jésus ayeke fa tënë ti Royaume na ndö ti sese kue.
Matthieu 24:14: “A yeke fa ande nzoni tënë ti Royaume na ndö ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.”