Tâ tënë na ndö gigi ti e ti kekereke
Mo hunda terê ti mo lâ oko awe na ndö ti gigi ti e ti kekereke? Bible asara tënë ti akpengba ye so aga nduru ti si awe, so ayeke ndu ande azo kue na ndö ti sese.
Jésus afa lani tongana nyen la e yeke “hinga so Royaume ti Nzapa aga nduru awe.” (Luc 21:31). Na popo ti aye ni, lo fa so akota bira ayeke duti dä, sese ayeke yengi ngangu, kota nzara ayeke tï, nga asioni kobela ayeke mû ndo; tâ gï aye so e yeke bâ laso la.—Luc 21:10-17.
Bible afa so mbeni oko ti aye so ayeke si na “lâ ti nda ni” ti komandema ti azo ayeke so azo ayeke duti na asioni sarango ye. Mo lingbi ti diko ye na ndö sarango ye ti azo ni na 2 Timothée 3:1-5. Tongana mo bâ asarango ye ni so na terê ti azo laso, kite ayeke dä ape so mo yeda so prophétie ti Bible so la ayeke ga tâ tënë laso so.
Tënë so aye ti tene nyen? A ye ti tene so Royaume ti Nzapa aga nduru awe ti ga na akota changement so ayeke sara ande si fini ti azo na ndö ti sese aga nzoni mingi (Luc 21:36). Na yâ ti Bible, Nzapa amû zendo ti sara anzoni ye teti sese nga teti azo so ayeke vivre ande dä. Bâ ambeni tapande ni.
MBENI NZONI GOUVERNEMENT
“A mû na lo komandema, nengo nga na royaume tongaso si azo nde nde, azo ti amara nde nde nga na ti ayanga ti kodro nde nde, ala kue asara kua na lo. Komandema ti lo so ayeke ti lakue lakue ayeke hon lâ oko pëpe, nga a yeke futi royaume ti lo pëpe.”—DANIEL 7:14.
Tënë so aye ti tene nyen? Mo peut ti vivre na gbe ti nzoni gouvernement so akomande dunia kue so Nzapa azia Molenge ti lo Gbia ni.
NZONI SENI
“Zo ti kodro ni ayeke tene ande pëpe: ‘Terê ti mbi ason.’”—ÉSAÏE 33:24.
Tënë so aye ti tene nyen? A ye ti tene so mo yeke tï ande kobela ape wala mbeni ye ti terê ti mo ayeke buba ape; mo peut ti vivre ande sân ti kui.
SIRIRI NA NDÖ TI SESE KUE
“Lo yeke sara si abira ahunzi na ndö ti sese kue.”—PSAUME 46:9.
Tënë so aye ti tene nyen? A ye ti tene so bira ayeke duti ande dä ape nga apasi kue ti peko ti bira ayeke duti dä ape.
SESE AYEKE SI SINGO NA ANZONI ZO
“Azo ti sioni ayeke duti dä encore ape . . . azo so asara terê ti ala kete, sese ayeke ga ye ti ala.”—PSAUME 37:10, 11.
Tënë so aye ti tene nyen? A ye ti tene so azo ti sioni ayeke duti ande dä ape, gï azo so aye ti mä yanga ti Nzapa la ayeke duti dä.
SESE KUE AYEKE GA PARADIS
“Azo ayeke leke ada, na ala yeke lango na yâ ni, nga ala yeke fâ ayaka ti vigne, na ala yeke te lengo ni.”—ÉSAÏE 65:21, 22.
Tënë so aye ti tene nyen? A ye ti tene so a yeke leke ande sese ti tene aga pendere. Nzapa ayeke kiri tënë na sambela so e yeke hunda na lo ti sara ye so bê ti lo aye na “ndö ti sese.”—Matthieu 6:10