Mo Lingbi ti Sala na ndo so A Hunda ti Wara Awafango Tene Dä Mingi?

¹ Mo gbu li ti mo mbeni lâ awe na ndo guengo na mbeni ndo so a hunda ti wara awafango tene ti Royaume dä mingi? Tongana a tisa mo ti ‘gue . . . na ti mu maboko,’ fade mo yeke yeda tongana ti so bazengele Paul ayeda giriri? (Kus. 16:9, 10) Na yâ ti akongregation mingi, a hunda ti wara asewa so ayeke abiazo na lege ti yingo, apionnier ti mu maboko ti fa tene na yâ territoire ni kue, wala a-ancien nga na aserviteur ti mungo maboko so ayeke na akode ti mu li ni. Peut-être territoire ni ayeke na akete gbata so ayo na so akangbi kirikiri na yâ mbeni kete kodoro so yâ ni akono. Peut-être Da ti Royaume so ayeke ndulu na ni ayo akilomètre mingi. Peut-être kua ti nginza ayeke mingi na ndo so pepe. Peut-être dutingo ti ndowa na dê ayeke duti lakue nzoni pepe. Fade mo yeke duti ndulu ti yeda na mara ti kota kusala tongaso? Tongana nyen mo lingbi ti sala si a tambela nzoni?

² A hunda mabe nga na ziango bê kue: Na gbe ti fango lege ti Nzapa, Abram azia Ur, gbata ti lo, na lo, wali ti lo, molenge ti ita ti lo, nga Térah, babâ ti lo so aga kangba awe, atambela teti akilomètre 1 000 ti gue na Harân. (Gen. 11:31, 32; Néh. 9:7) Na peko ti kuâ ti Térah, Jéhovah akomande na Abram, so fadeso ayeke na ngu 75, ti zia Harân nga na asongo ti lo na ti gue na mbeni kodoro so Nzapa mveni ayeke fa na lo. Abram, Saraï, na Lot ‘alondo ti gue.’ (Gen. 12:1, 4, 5) Biani, Abram ague pepe ti sala na ndo so a hunda ti wara awakua mingi. Me tambela ti lo ahunda mbeni ye. Nyen?

³ A hunda na Abram ti duti na mabe nga ziango bê kue ti gi ti sala mara ti kusala tongaso. A lingbi bango ndo ti lo na dutingo ti lo agbian. A lingbi lo zia nzoni duti ti asongo ti lo. Me lo zia bê kue na Jéhovah ti bata lo na azo ti da ti lo. Laso azo mingi afa na gigi ziango bê kue na Jéhovah na yâ mara ti ye tongaso.

⁴ Kusala teti kete ngoi: Mo wara mbeni lâ awe akota deba nzoni so aga na lege ti salango kusala na yâ territoire so ayeke ti mbeni kongregation pepe? Ti ambeni, ye so ahunda ti tambela na ayongoro lege. Angangu so ala sala ayeke senge?

⁵ Na Togo, mbeni ita-koli aleke na bê ti lo ti kiri na kete kodoro so a dü lo dä teti so zo oko ade afa nzo tene na ndo so pepe. Kete kodoro so ayeke na yâ ti mbeni territoire so ayeke ti mbeni kongregation pepe. Juska na ngoi ni so, lo yeke la ni oko zo so na yâ sewa ti lo ayeda na tâ tene. Na kozo ngoi ni, tongana lo ga na kete kodoro ni, lo hunda ti manda Bible na sewa ti lo mveni, na pekoni lo ngbâ ti fa tene na azo so ayeke ndulu na ala. Lo ngbâ nga ti fa tene na akete kodoro so ayeke na tele ni. Tongana, na peko ti anze gumbaya, lo zia territoire so ayeke ti mbeni kongregation pepe, azo 18 ague na abungbi lakue nga ngbele ye na ngoi ni so mbeni kongregation aba gigi. Fadeso, a yeke leke mbeni Da ti Royaume na yâ kete kodoro ni. Lo wara nga ngia ti ba azo 12 na yâ sewa ti lo ti ga na yâ tâ tene, na mama ti lo ayeke na popo ni. Tongana lo bi lê ti lo na peko ti ba ye so asi, lo tene: ‘A yeke la ni mbeni matabisi ti ba tongana nyen Jéhovah adeba nzoni kusala ti e na yâ kete kodoro ti mbi mveni. Mbi na wali ti mbi e ba so ti fa nzo tene na azo so amä lâ oko pepe tâ tene na ti ba tongana nyen a ndu bê ti ala anzere na e mingi. E yeke dabe ti e lakue na ngia na ndo ye so asi na tongana lege akiri azi ti sala kusala na mbeni territoire so ayeke ti mbeni kongregation pepe, e yeke ku pepe.’ Na Cameroun, mbeni ita-wali so asala kusala na territoire so ayeke ti mbeni kongregation pepe asû na mbeti: “Mbi yeke la ni na ngia mingi ti mu ngangu ti mbi kue na yâ kangbingo nzo tene na azo ti territoire so na salango kusala na ambage mingi ti kusala ti e . . . Na bango wungo ti amandango Bible so mbi zia, nga na azo mingi so ayeda mingi na tokua ti e, . . . a yeke nzere na mbi tongana a lingbi ti tokua mbeni ita-koli kâ ti mu maboko na azo ti bê ti mbilimbili so.”

⁶ Ti yeda ti sala teti kete ngoi na ndo so a hunda ti wara awafango tene mingi alingbi nga ti sala mbeni kusala nde. Azo so ayeke sala tongaso alingbi ti wara asango so ayeke nzoni ti mu maboko na ala ti “diko ngele” ti guengo na mbeni mbage nde ti kodoro ni.​—Luc 14:28.

⁷ Jéhovah aleke na bê ti lo ti tene a fa nzo tene “na sese kue so azo ayeke dä” kozoni si nda ni aga. (Mat. 24:14, NW) Na hingango ye so, tongana mo wara lege ti sala ni, mo yeke duti ndulu ti gue na ndo so a hunda ti wara awafango tene dä mingi? Na ando mingi bezoin ayeke dä.

⁸ Guengo na ndo so a hunda ti wara awafango tene dä mingi: Mo mu retraite awe? Mo yeke na nginza so atï lakue? Tongana mo yeke na ni pepe, mo lingbi ti sala kusala teti mo mveni? Mo lingbi ti wara nginza na ndo kue so mo yeke dä na lege ti singa-me wala ordinateur? Tongana mo lingbi ti gue na mbeni ndo nde pepe, mo lingbi ti mu maboko na mbeni zo ti sewa ni ti sala na mbeni ndo nde?

⁹ Tongana na peko ti so mo ba na yâ sambela so mo lingbi ti gue na mbeni ndo so a hunda ti wara awafango tene dä mingi, sala tene ni na sewa ti mo nga na a-ancien na yâ ti kongregation ti mo. Na pekoni, sû mbeni mbeti na mu ni na a-ancien si ala lingbi zia na yâ ni atene nga awango ti ala kozoni ti tokua ni na filiale.

¹⁰ Ye nyen a lingbi mo sû na yâ mbeti ti mo? Ngu ti mo, lango ti batême ti mo, akungba so mo yö na yâ ti kongregation, tongana mo mu koli wala wali awe, nga tongana mo yeke na akete molenge. Fa iri ti kete kodoro wala gbata so mo ye ti sala kusala dä, a lingbi na abezoin ti mo mveni. Na tapande, mo lingbi ti lango na ndo so ndowa ayeke dä wala so adë? Mo lingbi ti gbu ngangu na gbele ngoi ti dë? Mo lingbi ti lango na ndo so ayo na nduzu mingi? Mo yeke tene ambeni yanga ti kodoro wande?

¹¹ Mo yeke na wâ nga na bibe ti mu li ni? Dutingo ti mo amu lege na mo ti sala na ndo so a hunda ti wara awafango tene dä mingi? Tongana a yeke tongaso, ba tongana nyen Jéhovah angbâ lakue ti tuku adeba nzoni mingi na ndo ala so azia bê ti ala kue na lo na ngoi so ala yeke fa na gigi bibe ti gbanzi ye na tele!​—Ps. 34:9 (34:8, NW); Mal. 3:10.