Kongregation ti mo ayeke na kota territoire?
1 A londo na agbata ti Judée ti si na kete kodoro ti Galilée, Jésus afa lani tënë ti témoin kue na yâ ti kota territoire ti Israël ti giriri (Marc 1:38, 39; Luc 23:5). A lingbi e nga e fa nzo tënë na azo mingi ahon, ala kue so lege ayeke dä ti wara ala (Marc 13:10). Me ayeke kete kusala pëpe. Ngbanga ti nyen?
2 Aterritoire ti mingi ti akongregation na Ouest nga na Est ti Afrika ayeke na akete kodoro, aterritoire so yongoro ni nga na konongo ti yâ ni alingbi ti sala akilomètre mingi. Akongregation ti ambeni yanga ti kodoro nde alingbi ti sala kua na yâ akota gbata. Akongregation tongaso ayeke gi azo so ayeke tene yanga ti kodoro so a yeke sala na kusala na ngoi ti abungbi. Ye nyen e lingbi ti sala ti mû lege na azo so alango na mara ti ando tongaso ti manda tâ tënë na ndo Jéhovah, Jésus nga na Royaume?
3 Leke aye nzoni kozoni: Surveillant ti kusala na ita so abâ tënë ti aterritoire ayeke na kungba ti mû maboko na ngangu so kongregation ayeke sala, si a lingbi sala kua ni nzoni ahon. Ala lingbi peut-être ti zia ambeni samedi nde tongana gbâ ti aita alingbi ti mû ngoi mingi ahon na yâ lango ni so ti fa na tënë. Tongana kongregation aye ti sala kusala na yâ territoire so ayo mingi, leke si aita ni afa tënë angbonga mingi ahon so a yeke sala ka. Ala lingbi ti gue na kobe ti te na ngoi ti hungo tele. Mo lingbi ti sala bungbi ti sigingo na fango tënë hio ahon ti so a yeke sala ka, si aita awara ngoi ti mû kutukutu ti gue na territoire ni. Mo lingbi nga ti sala bungbi ni ndulu na ndo so ala ye ti fa tënë dä. Ti gue na ndo ni, a lingbi ti sala kusala na akutukutu ti ambeni ita, wala abus so aloué, si azo mingi alingbi ti gue. Kangbi popo ti aita ni kue alingbi na akutukutu ni. Leke ti sala kusala na ambeni ngoi so ndo ni, nga na alege ni ayeke nzoni.
4 Aita so ayeke fa tënë na yâ ti aterritoire so ayeke tene mbeni yanga nde dä alingbi ti vo ngoi tongana ala yeke na fini molongo ti a-iri, a-adresse na mbeni fini carte ti territoire so ala yeke gue dä. Kangbi yâ ti aterritoire si bungbi ti aita ni afa tënë na azo kue ti ndo ni.
5 Sala kue ti gue na mbeni mbilimbili wungo ti ambeti ti fa na tënë. Tongana a sala kusala na yâ territoire ni mingi pëpe, a yeke nzoni ti zia mbeni tract wala mbeni ngbele périodique na azo so ayeke na yanga-da pëpe. Tongana tract Mo Ye ti Hinga Ye Mingi Ahon na ndo Bible ayeke dä, a lingbi e zia ni na azo oko oko so e tingbi na ala nga ala so ayeke na yanga-da pëpe.
6 Mû maboko nga nzoni: Ti fa tënë na yâ ti mbeni kota territoire ahunda mungo maboko ti zo oko oko kue na yâ kongregation. Tongana a lingbi kutukutu ni ague yongoro mingi, a yeke nzoni aita kue so ague na yâ ti kutukutu ni amû mbeni kete nginza ti vongo na essence. A lingbi mo duti na nzoni bango ndo tongana mo wara azo so asala nzala ti mä tënë. A lingbi mo sala ngangu ti ndu azo kue na yâ territoire ni, na bi bê nga na aita so ayeke ku mo. Tongana mo ye ti ngbâ ti sala lisoro ngoi mingi ahon na mbeni zo so asala nzala ti tâ tënë, mo lingbi ti mä tele ti tene tanga ti aita ni alingbi ti ngbâ ti fa tënë?
7 Leke mbeni programme ti kiri ti bä azo kue so asala nzala ti tâ tënë. Nde na adresse ti azo ni, tongana lege ayeke dä, tara ti wara numéro ti singa ti ala si mo lingbi ngbâ lakue ndulu na ala, nga ti fa tënë na ala na lege ti singa. Tongana alege ti kete kodoro ni ayeke na iri pëpe, wala numéro ayeke na ada ni pëpe, sala mbeni nzoni carte mo mveni, wala sû na ndo mbeti lege so mo lingbi ti wara zo ni tongana mo yeke sala fini vizite.
8 So tâ matabisi si e yeke na ni ti sala ye alingbi na awango-tene ti Jésus: “Na kota kodoro wala kete kodoro so i li dä, i gi mbeni zo ti kodoro ni so alingbi”! (Mat. 10:11). Biani, fade Jéhovah ayeke futa ngangu so mo yeke sala tongana mo mû tele na bê kue na yâ kusala so aga na futa mingi ahon!