Mû maboko na surveillant ti Mandango Buku ti Kongregation ti mo
1 E oko oko kue e yeke wara aye ti nzoni mingi na lege ti Mandango Buku ti Kongregation. Na nze so ahon, e sala lani lisoro na ndo lege so surveillant ti Mandango Buku ayeke sala kusala ti lo. Ye oko, e lingbi ti sala nyen ti mû maboko na lo, na tongaso ti ga na ye ti nzoni teti e mveni nga teti ambeni zo?
2 Gue yenga oko oko kue: Teti so wungo ti azo ti mandango buku ni ayeke kete, a yeke kota ye mingi teti mo ti gue dä. Zia na gbele mo ti sala tongaso yenga oko oko kue. Mo lingbi nga ti mû maboko na gango na l’heure, ye so ayeke mû lege na surveillant ni ti komanse bungbi ni na lege ni.—1 aCor. 14:40.
3 Atënë so akpengba zo: Mbeni lege so mo lingbi ti mû maboko dä ayeke na lekengo tele nzoni nga na salango atënë so akpengba zo. Fani mingi akiringo tënë so aluti gi na ndo tënë oko ayeke nzoni ahon atanga ni kue, na ayeke wa nga ambeni ti sala tënë. Kpe ti tara ti sala tënë na ndo atënë ti yâ ti paragraphe ni kue. Tongana mbeni tënë ni andu bê ti mo, sala si lisoro ni aga nzoni na ziango atënë ti bi bê ti mo na yâ ni.—1 Pi. 4:10.
4 Tongana mo yeke na kungba ti diko aparagraphe teti groupe ni kue, sala kusala so na bê kue. Pendere dikongo mbeti asala si mandango buku ni atambela nzoni.—1 Tim. 4:13.
5 Fango tënë: A yeke sala abungbi ti fango tënë na ando ti mandango buku mingi. Mungo mbage ti mo na alekengo ye so ayeke mû maboko na surveillant ni na ngoi so lo yeke mû li ni na yâ kusala ti fango tënë. Bâ alekengo ye so tongana alege so azi ti ga ndulu mingi na aita ti mo na ti wa ala.
6 Arapport: Mbeni lege ti mû maboko na surveillant ni ayeke ti mû rapport ti mo hio na hunzingo ti nze oko oko. Mo lingbi ti mû ni na lo mveni wala ti zia ni na yâ sanduku so a leke ni teti arapport na Da ti Royaume. Secrétaire alingbi ti sala kusala na sanduku ni ti bungbi arapport so asurveillant ti mandango buku aro.
7 Fade azo ayeke yekia salango kusala maboko na maboko ti mo na surveillant ti Mandango Buku ti Kongregation ti mo. Na ndo ni kue, mo lingbi ti hinga biani so fade Jéhovah ‘aduti na yingo so mo yeke fa.’—aPhil. 4:23.