Atënë so i hunda

◼ Na ngoi wa alingbi ti leke mbeni groupe ti yanga nde?

Tongana territoire ti kongregation ayeke kamême na gbâ ti azo ti yanga nde, a yeke nzoni a-ancien asala ye so alingbi na ngangu ti ala ti leke kusala ti fango tënë na yanga ti kodoro ni (km 7/02 1; km 8/98 3-4). Peut-être azo ti tenengo yanga nde ni alango na yâ aterritoire ti akongregation use wala mingi so ayeke ndulu na tele ti mba. Tongana a yeke tongaso, fade (a)surveillant ti circonscription ayeke mû awango so alingbi. Tongaso lo yeke mû maboko na akongregation ni ti sala kua maboko na maboko na yâ kusala ti fango tënë. Ngoi na ngoi, a lingbi ti leke ti mû mbeni kota diskur wala ti manda Tour ti Ba Ndo, ti tara ti bâ wala wungo ti azo oke si ayeke gue ande na abungbi na yanga ti kodoro ni.

A lingbi ti leke mbeni groupe ti mbeni yanga nde gi tongana a wara amara ti aye so ge: (1) A yeke wara awafango tënë wala azo so asala nzara ti tâ tënë so agbu nda ti nzo tënë nzoni gi na yanga ti kodoro ni? (2) A lingbi ti wara mbeni ancien wala serviteur ti mungo maboko so alingbi ti fa lege, na ti mû li ni kete kamême na ngoi ti bungbi oko yenga oko oko. (3) Bungbi ti a-ancien ayeke ndulu ti mû maboko na groupe ni. Tongana a sala aye so kue awe, a yeke nzoni a-ancien asala tënë ni na filiale si lo mû yanga ti tene a yeda na groupe ni, na lo mû ambeni wango na ndo ni.

Agroupe mingi ato nda ni na Mandango Buku ti Kongregation yenga oko oko. Na pekoni, a-ancien alingbi ti yeda ti zia na ndo ni ambeni bungbi tongana Kota Diskur na Mandango Tour ti Ba Ndo. A yeke sala adevoir 2, 3, na 4 na mbeni place nde tongana mbeni ancien wala serviteur ti mungo maboko so alingbi, so ayeke tene yanga ti kodoro ni, alingbi ti sala kusala tongana wamungo wango. Ye oko, fade groupe ni ayeke bungbi legeoko na kongregation teti diskur na ndo kode ti salango tënë, diskur ti wango, angbongboro tënë ti dikongo Bible, nga Bungbi ti Kusala. A yeke leke nga abungbi ti fango tënë ndali ti groupe ni.

Azo kue na yâ groupe ni ayeke sala kusala na gbe ti fango lege ti bungbi ti a-ancien. A yeke nzoni a-ancien amû awango so alingbi, na bingo bê na ndo abezoin ti groupe ni. Tongana lo yeke sala vizite na kongregation so ayeke mû maboko na groupe ni, surveillant ti circonscription ayeke leke ande nga ti fa tënë na groupe ni, ti kpengba lo na lege ti yingo. Na lege ti deba nzoni ti Jéhovah, fade groupe ti yanga nde so alingbi ti ga mbeni lâ kongregation.