Atënë so i hunda

◼ Aye wa a yeke nzoni lê ti e azi na ndo ni na ngoi ti fango tënë na azo ti kanga?

Na ndo sese kue, a yeke wara kamême azo ti kanga kutu miombe, so na yâ ni, ambeni mingi ayeke sala nzara ti mä nzo tënë (1 Tim. 2:4). Nze oko oko, mbeni biröo ti filiale ayeke wara ambeti ndulu na 1 400 so azo ti kanga na azo ti sewa ti ala ayeke tokua ni so, na yâ ni, ala hunda ambeti wala ti tene a sala mbeni vizite na ala. Atâa so azo ti kanga mingi afa na bê ti ala kue so ala sala nzara ti tâ tënë, aye afa so ambeni ayeke handa lê ti gi ti wara aye na mbage ti awakua ti Nzapa. Na ndo ye so, a yeke nzoni zo kue abata gbotongo mê so ge ti sala hange na ndo fango tënë na azo ti kanga.

Mingi ni, a yeke fa tënë na azo ti kanga na lege ti alettre. A hunda na ngangu na aita-wali ti tokua mbeti pëpe na azo ti kanga so ayeke akoli, atâa tongana a yeke na bibe ti mû maboko na ala na lege ti yingo. A yeke nzoni a mû kungba so gi na aita-koli so alingbi. A lingbi ti hunda na ita-wali so ayeke na kode mingi ti sû mbeti na azo ti kanga so ayeke awali, so afa na bê kue nzara ti tâ tënë ti Bible. A yeke nzoni a tokua nginza wala amatabisi na azo ti kanga pëpe, même tongana a hunda ti sala ni.

Tongana mbeni zo ti kanga afa na gigi nzara ti tâ tënë, a yeke nzoni a mû iri ti lo na ndo ni so lo yeke dä na kongregation ti ndo ni so da ti kanga ni ayeke na yâ ni. Mingi ni, aita-koli so alingbi, so ayeke ti ndo ni, ahinga lege ti sala kusala na aye nde nde so alingbi ti si. Tongana a hinga kongregation ni pëpe, a yeke nzoni a tokua sango ni kue na biröo ti filiale.

A ke pëpe na aita-koli, so a mû na ala kungba so, ti sala abungbi na azo ti kanga so alingbi ti manda ye na ngoi oko. Ye oko, a ayeke nzoni a sala pëpe na yâ ada ti kanga ni ambeni bungbi nde, so na yâ ni, awafango tënë ayeke bungbi ti bê ti ala mveni na azo ti kanga ni. Na ndo ni, a yeke na lege ti ndara pëpe teti awafango tënë ti gue ti bâ mbeni da ti kanga na lekengo tele kozoni pëpe, nga ti sala kota songo na azo ti kanga ni.

Zia ‘lê ti e akpengba tongana angbo na e duti na bê ti sioni pëpe tongana abungu’ tongana e yeke fa nzo tënë na azo ti kanga.​—Mat. 10:16.