Fango tënë na groupe aga na ngia
1 Tongana Jésus atokua adisciple 70 kozoni na lo ti fa tënë, lo fa lani na ala ye so ala yeke tene, lo leke ala na bungbi ti azo use use, nga lo fa na ala territoire so ala yeke sala kusala dä. A yeke aye so asala si adisciple awara ngia lani (Luc 10:1-17). Legeoko nga laso, fango tënë na groupe amû maboko ti mû aye so alingbi, ti leke nga ti mû ngangu na azo ti Nzapa teti kusala ti fango tënë.
2 A-ancien amû li ni: A-ancien ayeke na kota kungba na yâ mungo maboko na azo kue ti mû mbage lakue na kusala ti fango tënë. Surveillant ti kusala amû li ni na yâ aye so aleke teti fango tënë na yâ ti yenga ni. Surveillant ti mandango buku oko oko ayeke na kungba ti leke akusala so andu groupe ti lo, mbilimbili na nda ti yenga ni. Na ambeni ngoi, tongana kongregation kue abungbi teti fango tënë, na tapande na peko ti Mandango Tour ti Ba Ndo, a yeke nzoni surveillant ti mandango buku oko oko aleke aye teti azo so ayeke na yâ bungbi ti mandango buku ti lo mveni.
3 “Mbilimbili na lege ni”: A lingbi zo so a soro lo ti mû li ni na bungbi ti fango tënë ato nda ti bungbi ni na l’heure nga lo sala bungbi ni aninga ahon apenze-ngbonga 10 wala 15 pëpe. A lingbi lo kangbi yâ ti awafango tënë ni nga lo fa territoire so a yeke sala kusala dä kozoni ti ko nda ni na sambela. Lo yeke sala tongaso gi tongana a yeke pëpe asurveillant ti mandango buku si akangbi yâ ti awafango tënë nga afa territoire ni, tongana ti so a fa na paragraphe so ahon. Ye so alingbi ti sala si awafango tënë abungbi tele pëpe na yâ territoire na mbeni lege so agboto lê ti azo na ndo ti ala, nga alingbi ti mû nengo na kusala ti e. Ti sala tongaso ague oko na wango ti Paul so: “A lingbi i sala ye kue mbilimbili na lege ni.” (1 aCor. 14:40). Azo kue so ague na abungbi ti fango tënë alingbi ti mû mbage ti ala na nzoni maïngo ti ye so aleke na singo na ndo ni na l’heure, na salango kusala maboko na maboko na zo so amû li ni, nga na londongo hio ti gue na yâ territoire na peko ti so a kangbi azo awe.
4 Ti bungbi na yâ beoko: Fango tënë na groupe ayeke mbeni pendere lege so azi teti e ti hinga ambeni zo ti yâ ti kongregation. Atâa so a kanga lege pëpe ti leke kozoni ti sala kusala na mbeni zo, a lingbi ti duti nga nzoni teti e ti gue na abungbi ti fango tënë sân ti tene e leke kozoni ti sigigi na mbeni zo. A lingbi ti mû na e mbeni zo so e hinga lo nzoni pëpe ti sala kusala legeoko na e, salango tongaso amû lege na e ti “ndoye” ambeni zo nde.—2 aCor. 6:11-13.
5 Fango tënë na groupe amû wâ na e nga abungbi e legeoko na ‘afon e na kusala ti tene-biani.’ (3 Jean 8). Zia e mû mbage kue dä!