E gi ti duti ndulu mingi na Jéhovah
1. Ye wa mbeni ita-wali aga ti hinga ni na ndo akusala ti lo ti yingo so lo yeke sala lakue?
1 Mbeni ita-wali Chrétien atene: “Atâa so mbi yeke na yâ tâ tënë a sala angu 20 awe, mbi kpengba pëpe. Mbi yeke gue na abungbi nga mbi yeke mû mbage na fango tënë gi tongaso.” Ye oko, lo ngbâ ti tene: “Na nda ni, mbi bâ so atâa so abungbi nga na fango tënë ayeke kota ye, gi aye so alingbi pëpe ti mû maboko na mbi tongana mbi to nda ti wara aye ti ngangu. . . . Fadeso mbi hinga so a lingbi mbi kiri mbi leke bibe ti mbi nga mbi to nda ti mbeni nzoni kapa ti mandango ye si mbi lingbi biani ti manda ti hinga Jéhovah, ti ndoye Lo na ti bâ na nene ni ye so Molenge ti Lo amû na e.”
2. Ngbanga ti nyen a yeke kota ye ti gi ti ga ndulu mingi na Jéhovah?
2 Ti tene zo alë mbeni songo so ayeke ndulu mingi na Jéhovah, a hunda na lo ti sala ngangu. A hunda ye mingi ahon senge mungo peko ti kusala so Chrétien ayeke sala lakue. Tongana e zia ti sala lisoro lakue na Jéhovah, na nda ni Lo lingbi ti ga tongana mbeni tâ kamarade so e hinga fadeso tënë na ndo ti lo mbeni pëpe (Apoc. 2:4). Zia e bâ tongana nyen mandango Bible e mveni nga na sambela alingbi ti mû maboko na e ti gi ti ga ndulu mingi na Jéhovah.—Ps. 25:14.
3. Tongana nyen e lingbi ti sala si mandango ye e mveni amû ande maboko na e ti ga ndulu mingi na Nzapa?
3 Sambela nga na gbungo li ayeke kota ye: Mandango ye zo mveni so ayeke kpengba bê andu ye mingi ahon sungo kamba na gbe ti angbongboro tënë so ayeke na yâ ye ti manda ni nga bingo lê na ndo aversê so a fa tënë ti yâ ni pëpe. A hunda na e ti gbu li na ndo ye so atënë ni afa na ndo alege ti Jéhovah, aye so Lo hunda nga na asalango ye ti Lo (Ex. 33:13). Ti gi ti gbu nda ti aye ti yingo ayeke sala ngangu na ndo atënë ti bê ti e na a yeke pusu e ti gbu li na ndo fini ti e (Ps. 119:35, 111). A lingbi ye so e zia na gbele e na yâ mandango ye e mveni ayeke ti ga ndulu mingi na Jéhovah (Jacq. 4:8). Nzoni mandango ye ahunda ngoi nga na dutingo so alingbi, na ti manda ye lakue a hunda ti tene zo ase tele ti lo mveni (Dan. 6:10). Atâa mo yeke tâ na aye mingi ti sala, lâ oko oko mo yeke zia mbeni ngoi nde ti gbu li na ndo apendere lengo ti Jéhovah?—Ps. 119:147, 148; 143:5.
4. Tongana nyen ti sambela kozoni si e to nda ti manda ye e mveni ayeke mû maboko na e ti gi ti ga ndulu mingi na Jéhovah?
4 Ti sambela na bê kue ayeke mbeni kota mbage ti nzoni mandango ye zo mveni. Ti tene atâ tënë ti Bible azingo bê ti e na apusu e ti “sala kusala so alingbi na lê ti Nzapa, na lege ti kpengo mbito ti Lo na dongo bê”, a hunda ti tene e wara yingo vulu ti Nzapa (aHéb. 12:28). Ni la, kozo ti to nda ti kapa oko oko ti mandango ye ti e, a lingbi e hunda na Jéhovah na bê kue ti mû na e yingo ti lo (Mat. 5:3). Tongana e gbu li na ndo aversê ti Bible na e sala kusala na agbakuru ti mandango na ye so bungbi ti Jéhovah amû, e yeke fa tënë ti bê ti e na Jéhovah (Ps. 62:9). Ti manda ye na mara ti kode tongaso ayeke mbeni mbage ti vorongo so na lege ni e yeke fa mungo tele ti e kue na Jéhovah, na e yeke kpengba songo ti e na Lo.—Jude 20, 21.
5. Ngbanga ti nyen a yeke kota ye teti e ti gbu li lâ oko oko na ndo Tënë ti Nzapa?
5 Legeoko na asongo kue, a lingbi songo ti e na Jéhovah aduti ye so e yeke bata ni lakue si a ngbâ ti maï na yâ ti fini ti e kue. Tongaso, zia e vo ngoi lâ oko oko ti ga ndulu na Nzapa, na hingango so Lo nga, Lo yeke ga ndulu na e.—Ps. 1:2, 3; aEph. 5:15, 16.