Fa bê ti kiri singila ti mo
1 Atâa so e yeke na “lâ ti ye ti ngangu”, e yeke na anda ti tënë mingi ti kiri singila na Jéhovah (2 Tim. 3:1). Ye so e kiri singila ndali ni mingi ahon atanga ni kue ayeke matabisi ti ngele ngangu so lo mû na e, Molenge ti lo (Jean 3:16). Na mbage, na ngoi so azo ti lege ti vorongo ti wataka ayeke kui nzara na lege ti yingo, e yeke na gbâ ti kobe ti yingo (Es. 65:13). E yeke na yâ ti bungbi ti aita ti ndo sese kue, na e yeke na matabisi ti mû mbage na yâ ti pendere maïngo ti tâ vorongo na ndo kue (Es. 2:3, 4; 60:4-10, 22). Tongana nyen e lingbi ti fa bê ti kiri singila ti e na Jéhovah teti adeba nzoni so lo yeke tuku gbâ ni gbâ ni na ndo ti e?—aCol. 3:15, 17.
2 Kusala so a sala na ngia nga na bê kue: Tongana lo yeke sala tënë na ndo mungo ye ti mitele, bazengele Paul asû na mbeti: “Nzapa andoye zo so amû matabisi na ngia.” (2 aCor. 9:7). Kpengba-ndia so andu nga kusala so e yeke sala na Nzapa. Singila ti e ayeke sigigi na yâ wâ so e yeke na ni teti tâ tënë, na yâ ngia ti e na ngoi ti abungbi ti aChrétien, na yâ fango tënë ti e na wâ nga na yâ salango ye so bê ti Nzapa aye na ngia.—Ps. 107:21, 22; 119:14; 122:1; aRom. 12:8, 11.
3 Na Israël ti giriri, Ndia ahunda pëpe mbeni mbilimbili wungo ti ye teti asandaga. Wavorongo oko oko alingbi ti fa bê ti kiri singila ti lo na mungo ye alingbi na “nzoye so L’Eternel” amû na lo (Deut. 16:16, 17). Legeoko nga laso, bê ti kiri singila ayeke pusu e ande ti sala ye kue so dutingo ti e amû lege na e ti sala na yâ kusala ti fango tënë ti Royaume nga ti salango adisciple. Mingi ni, anze ti hungo tele ayeke mû na e ambeni lege nde ti fa singila ti e. Ambeni zo agbu ngoi so ala yeke na kua wala na ekole pëpe ti kono wungo ti angbonga so ala yeke fa na tënë, même ti sala kua ti pionnier auxiliaire. Mo lingbi ti kono kusala ti mo na yâ ti anze so ekole na kua ayeke dä pëpe?
4 Wu na tënë ti singila: Mbeni kota lege so e lingbi ti fa singila ti e na Jéhovah ayeke na yâ sambela (1 aThes. 5:17, 18). Tënë ti Nzapa awa e ti “wu na tënë ti merci.” (aCol. 2:7). Atâa tongana e yeke na akua mingi ti sala wala na gbe ti ye ti ngangu, a lingbi e zia lakue na yâ asambela ti e ti lâ oko oko atënë ti singila (aPhil. 4:6). Biani, na lege ti fango tënë ti e nga na asambela ti e, zia e ‘mû merci mingi na Nzapa.’—2 aCor. 9:12.