Atënë so i hunda
◼ Nzoni lege ti mungo nginza teti aita ti e so ye atia ala na ambeni kodoro nde ayeke so wa?
Ngoi na ngoi, e yeke mä so ndali ti salango ngangu, ti kpale ti dunia nga na ambeni ye nde, ye atia aita ti e ti ambeni kodoro nde. Bê ti ambeni ita apusu ala ti tokua nginza na filiale ti akodoro ni so. Na ala hunda ti tene a sala kusala na nginza ni so ti mû maboko na mbeni zo, na mbeni kongregation wala ti tene a leke na mbeni dä tongaso.—2 aCor. 8:1-4.
Atâa so bingo bê na ndoye tongaso ayeke ye ti gonda, mingi ni ambeni ye ayeke dä so a hunda ti leke ni hio mingi ahon ala so zo ni abi bê ti lo dä. Na yâ ti ambeni tapande ni mingi, a leke kozoni awe kpale ni so ita ni amû nginza ndali ni. Biani, e lingbi ti zia bê kue so tongana a tokua nginza na filiale ti ndo so e yeke dä ndali ti salango na kusala ti fango tënë na ndo sese kue, ti lekengo na aDa ti Royaume wala ti mungo maboko na ambeni ita na ngoi ti aye ti ngangu, a yeke sala kusala na nginza ni gi tongana ti so zo so atokua ni afa.
A fa nzoni na aita ti filiale kue lege ti sala ye fade fade ti mû maboko na aita so ayeke na yâ ti mbeni kpale so asi gi hio tongaso. Na yâ ye kue, filiale ni ayeke fa tënë ti ye ni so asi na Wabatango Bungbi. Tongana mbeni bezoin ti mungo maboko ayeke dä, Wabatango Bungbi alingbi ti tisa afiliale so ayeke ndulu na filiale ti kodoro ni so ti mû maboko, wala kota ndokua ti aTémoin ti Jéhovah alingbi ti tokua nginza.—2 aCor. 8:14, 15.
Tongaso, anginza kue so mbeni zo aleke na bê ti lo ti mû ndali ti salango na kusala ti fango tënë na ndo lê sese kue, ndali ti apialo ti lekengo ada teti kua ti Royaume na yâ ti ambeni kodoro nde wala ndali ti mungo maboko na aita na ngoi ti aye ti ngangu, a hunda ti tokua ni gi na filiale ti kodoro so lo yeke dä. A lingbi ti tokua nginza ni na lege ti kongregation wala tâ gi na filiale ti e ni. Na salango tongaso, “ngbâa be-ta-zo na ti ndara”, na lege ti ye so Wabatango Bungbi aleke, ayeke bi bê ti lo na ndo aita ti ndo lê sese kue so ye atia ala na mbeni lege so ayeke kirikiri pëpe.—Mat. 24:45-47, NW; 1 aCor. 14:33, 40.