Kiri singila teti nzobe ti Jéhovah
A yeke sala matanga ti kui ti Christ na lango 24 ti mars
1. Na lege wa Jéhovah afa nzobe ti lo na e?
1 Wasungo psaume atene: “O, a lingbi azo asepela L’Eternel teti nzobe ti Lo, na teti kusala ti kpene ti Lo so Lo sala teti amolenge ti azo!” (Ps 107:8). Nzobe ti Nzapa ayeke pëpe gi mbeni senge bango mawa ti zo so lo yeke na ni na mbage ti azo ti lo. Ye so asigigi polele na yâ tënë ti gonda so a sû ni na gbe ti yingo: “Nzobe ti Mo, O L’Eternel, agbu mbi na nduzu.” (Ps 94:18). So tâ kota fä ti nzobe si Jéhovah afa ni na gigi na mungo Molenge ti lo ngengele oko ndali ti e!—1 Jean 4:9, 10.
2. Tongana nyen e lingbi ti fa kiringo singila ti e na Jéhovah?
2 Teti so Mémorial ti kui ti Christ aga ndulu, tongana nyen e lingbi ti kiri singila na “Nzapa ti be-nzoni”? (Ps. 59:18). Fade zo oko oko na popo ti e ayeke yeda ti zia mbeni ngoi ti gbu li na ndo andangba lango ti fini ti Jésus na ndo sese (Ps. 143:5). A yeke duti nga ande ye ti nzoni ti mû peko ti mbeni kapa ti dikongo Bible so a zia ni nde teti Mémorial, na yâ brochure Gingo nda ti Tënë ti Nzapa lâ oko oko—2005. Nga, tongana lege ayeke dä, diko na gi nda ti ye na ndo ti chapitre 112-116 ti buku Koli so ahon tanga ti azo kue legeoko nga na ambeni buku. Gbu li na ndo ti aye so mo diko ni na zia bê ti mo kue dä (1 Tim. 4:15). Ti sambela na gbungo li na ndo Tënë ti Nzapa, a yeke mû gi ngangu na bê ti e pëpe, me a yeke fa nga na gigi ndoye ti e teti Jéhovah.—Mat. 22:37.
3, 4. (a) Tongana nyen e lingbi ti mû peko ti tapande ti aita ti e ti Liberia? (b) Azo wa mo leke ti tisa ala na Mémorial?
3 Pusu ambeni zo ti kiri singila na Nzapa: Na yâ ti ngu so ahon, na ndo lê sese mobimba wungo ti azo so ague na Mémorial ayeke 16 760 607. A sala ngu mingi pëpe so na yâ ti mbeni kete kodoro ti Liberia, aita ti ndo ni asû mbeti na mokonzi ti kodoro ni ti fa na lo bibe ti ala ti sala Matanga ti Kobe ti Seigneur na yâ gbata ti lo. Mokonzi ni azi lege na aita ni ti sala matanga ni na ndo ti pikango ndembo ti gere ti kodoro ni, na lo sala si a to mbela na yâ kodoro ni kue ti tisa azo ti ga na matanga ni. Atâa so a yeke wara gi awafango tënë oku na yâ ti kete kodoro so, wungo ti azo kue so aga na Mémorial ni ayeke 636.
4 Legeoko nga, e ye ti mû maboko na azo mingi ti ga na Matanga ti Mémorial. Ngbanga ti nyen mo sû pëpe na mbeti iri ti azo so mo ye ti tisa ala? Foto so ayeke na ndo lembeti 32 ti Réveillez-vous! ti lango 8 ti mars nga na Tour ti Ba Ndo ti lango 15 ti mars atisa azo ti ga na Mémorial. A lingbi nga ti sala kusala na ambeti ti tisango azo na Mémorial. Sû mbeti polele na ndo ni ti fa ngbonga nga na ndo so a yeke sala matanga ni dä. Tongana lango 24 ti mars aga ndulu, kiri mo bâ ala oko oko kue ti dabe ti ala na ti bâ tanga ti ye so ala lingbi ande ti sala.
5. Tongana nyen e lingbi ti mû maboko na awamandango Bible ti ga na Mémorial?
5 Na lege wa e lingbi ti mû maboko na azo so e yeke manda Bible na ala, na so ade ti ga na abungbi pëpe, ti ga ti wara biani ye ti nzoni na lege ti matanga so? Na ngoi ti salango étude oko oko, mû ambeni penze-ngbonga kete ti mû maboko na ala ti gbu nda ti nene ti matanga so. Mo lingbi ti wara anzoni tënë na ndo ni na yâ Tour ti Ba Ndo ti 15 mars 2004, lembeti 3-7, nga na yâ buku Comment raisonner, lembeti 241-245.
6. Ngbanga ti nyen a yeke kota ye ti yamba azo so aga na Mémorial?
6 Yambango azo so aga: Na Mémorial ni, pusu ndulu na tele ti azo so aga na mo yamba ala (aRom. 12:13). Leke ti duti na tele ti azo so mo tisa ala, bâ nzoni si ala wara Bible nga na mbeti ti bia. E ye ande ti mû ngoi so mbilimbili ti bala na wâ aita-koli na aita-wali so azia lege ti fango tënë, me so ala sala ngangu si ala ga na matanga ni. Bingo bê ti ndoye so e yeke na ni na mbage ti ala alingbi ti mû maboko na ala ti to nda ti ga lakue na abungbi ti kongregation (Luc 15:3-7). Na ngoi ti kota lango so, a lingbi e sala ngangu ti e kue ti wa azo ti bungbi legeoko na e na yâ kiringo singila na Jéhovah ndali ti “kota nzobe ti Lo”.—Ps. 31:22.