1, 2. Na lege wa Tour ti Ba Ndo na Réveillez-vous! asala ngangu na ndo fini ti azo?

¹ “A nzere na zo mingi, a si tâ na ngoi ni, a mû wâ na zo.” “A yeke mbeni mbeti-sango so akpengba zo mingi, na mbi de mbi diko mara ni lâ oko pëpe.” Atënë so afa mbilimbili bibe ti azo ti dunia mobimba so ayeke diko ka Tour ti Ba Ndo na Réveillez-vous! Biani, ambeti ti e ayeke agbakuru ti ngele ngangu ti ndu mara ti “azo kue” na nzo tënë.​—1 Tim. 2:4.

² Mbeni koli wadengo buze awara lani mbeni Réveillez-vous! na ndo mbeni tënë so anzere na lo mingi. Na pekoni, lo diko nga Tour ti Ba Ndo so a zia na tele ni. Na yâ ti Tour ti Ba Ndo ni, lo wara mbeni article so apusu lo ti gi nda ti tënë ti Nzapa ota na yâ oko so lo mä na bê na ni a ninga awe. Tënë ni so agbu bê ti lo mingi. Nze omene na pekoni, lo wara batême. Mbeni koli ni nde ayeke wara lakue Réveillez-vous! na Tour ti Ba Ndo me lo yeke diko ni lâ oko pëpe. Na mbage, wali ti lo aye aTémoin pëpe me lo yeke diko apériodique ni so koli ti lo ayeke ga na ni. Bê ti lo adö lani ndali ti zendo ti Bible na ndo tënë ti mbeni sese so ayeke ga paradis na so gi azo ti mbilimbili si ayeke duti na yâ ni. Na pekoni, wali ni na molenge ti lo ti koli nga na ngambe ti lo ti wali aga awakua ti Jéhovah.

3. Nzoni ti fango Tour ti Ba Ndo na Réveillez-vous! use kue legeoko ayeke so wa?

³ Fa ni use kue legeoko: Tongana ti so atapande so na nduzu ge afa, e lingbi ti hinga mbilimbili pëpe zo wa si ayeke diko ande ambeti ti e wala ye wa si alingbi ti gbu bê ti ala (Zo-ti. 11:6). Tongaso a yeke ye ti nzoni ti fa Tour ti Ba Ndo na Réveillez-vous! use kue legeoko, atâa so fani mingi e yeke gboto lê ti azo gi na ndo ti mbeni oko. Na yâ ti ambeni ye ni, na ngoi ti mbeni vizite, a lingbi ti duti na lege ni ti fa gbâ ti anuméro ni nde nde.

4. Tongana nyen e lingbi ti leke kapa ti fango tënë na apériodique?

⁴ A yeke nzoni ti zia mbeni lango oko nde na yâ yenga oko oko ti mû mbage na kangbingo apériodique. Na lê ti Calendrier des Témoins de Jéhovah 2005, a fa alango ti samedi oko oko kue tongana “lango ti kangbingo na apériodique.” Biani, teti so ndo nga na dutingo ti zo oko oko ayeke nde nde, ambeni zo alingbi ti soro mbeni lango nde tënë ti kangbingo apériodique. A yeke ye so mo yeke sala na yâ kapa ti mo ti yenga oko oko?

5. Ambeni lege wa azi ti kangbi apériodique na so a lingbi e duti ndulu ti sala ni? Na ye wa alingbi ti mû maboko na e ti sala tongaso?

⁵ Zia na gbele mo mbeni ye ti wara: Ziango na gbele e mbeni ye ti wara na kangbingo apériodique alingbi ti mû lege na e ti bi bê mingi na ndo ni. Mo yeke na azo so ahunda na mo ti ga na ala apériodique lakue lakue? Mo yeke fa apériodique na azo so mo yeke tingbi na ala na fango tënë? Mo lingbi ti fa apériodique na lege, na ando ti dengo buze nga na ando so azo ayeke dä mingi? Tongana mo yeke gue na mbeni yongoro ndo, mo gue ti vo ye nga ti bâ mbeni zo, mo yeke mû apériodique na tele ti mo? Sala nzoni ti mû angoi kue so azi na mo ti mû maboko na ambeni zo ti wara nzoni na lege ti Tour ti Ba Ndo na Réveillez-vous!

6. Tongana nyen e lingbi ti sala nzoni kusala na angbele périodique?

⁶ E lingbi nga ti zia na gbele e ti kangbi angbele périodique so angbâ na maboko ti e. Même tongana a kangbi apériodique ni pëpe na a hon nze oko wala nze use, atënë ti yâ ni angbâ lakue na nene ni. Zia e kangbi ni na azo so asala nzara ni. Na lê ti azo kutu mingi, Tour ti Ba Ndo na Réveillez-vous! ayeke “mbeni tënë so a tene ni na tâ ngoi ti lo.” (aProv. 25:11, NW ). Zia e sala kusala na apériodique so ti mû maboko na azo kutu mingi ti ga ti hinga na ti sala na Jéhovah.