Fa na azo ti tâ be-ti-molenge ti tambela na lege ti Nzapa
1. Ti sara adisciple andu nyen?
1 Bible asara tënë ti akozo Chrétien tongana ala so ayeke ti “Lege so”. (Kus. 9:2). Ti duti tâ Chrétien andu aye kue so zo ayeke sara na yâ fini ti lo (aProv. 3:5, 6). Tongaso, tongana e yeke manda Bible na azo, a hunda ti sara ye mingi ahon gi ti fa na ala atâ ye so Bible afa. A lingbi e mû maboko na ala nga ti tambela na lege ti Jéhovah.—Ps. 25:8, 9.
2. Ye wa alingbi ti pusu mbeni wamandango Bible ti mä yanga ti Nzapa?
2 Ti ndoye Jéhovah na Jésus: A yeke kpale ti tene awasiokpari asara si abibe, bango ndo, sarango tënë nga na sarango ye ti ala ague oko na ye so bê ti Nzapa aye (aRom. 7:21-23; aEph. 4:22-24). Ye oko, ndoye ti azo ti tâ be-ti-molenge na mbage ti Nzapa na Molenge ti lo ayeke pusu ala ti hon ndo ti akpale so (Jean 14:15; 1 Jean 5:3). Nyen la alingbi ti mû maboko na azo so e manda Bible na ala ti duti na ndoye so?
3. Ye wa e lingbi ti sara ti mû maboko na awamandango Bible ti ndoye Jéhovah na Jésus?
3 Mû maboko na zo so mo manda Bible na lo ti hinga Jéhovah nzoni. Mbeni ita-koli atene: “Azo alingbi pëpe ti ndoye mbeni zo so ala hinga lo pëpe; tongaso gi na tongo nda ti étude na zo, hio mbi fa na lo iri ti Nzapa na yâ Bible, na mbi gbu alege kue ti gboto lê ti lo na ndo asarango ye ti Jéhovah.” Ti gboto lê na ndo tapande ti Jésus ayeke mbeni nzoni lege ti sara ni (Jean 1:14; 14:9). Na ndo ni, ti sara kusala na encadré so ayeke na hunzingo ti chapitre oko oko ti buku Bible afa ayeke mû maboko na wamandango ye ni ti gbu li na ndo apendere sarango ye ti Nzapa nga na Molenge ti lo.
4. (a) Ngbanga ti nyen awamandango Bible mingi abâ fango tënë tongana mbeni ye so akpengba na ala? (b) Tongana nyen e lingbi ti mû maboko na ala na ngoi so ala to nda ti sigigi na fango tënë?
4 Fa ye na lege ti tapande ti mo: Ndali ti so e yeke fa ye nga e yeke fa lege na azo, e yeke fa na lege ti sarango ye ti e tongana nyen ti tambela na lege ti Nzapa (1 aCor. 11:1). Na tapande, mingi ti awamandango Bible ahinga pëpe tongana nyen ti fa tënë ti mabe ti ala na azo so ala hinga ala pëpe. Tongaso, a lingbi ti hunda na e ti kanga bê na ti sara ye na kode ti mû maboko na ala ti duti na ndoye, mabe nga ti sara ye na mbeto pëpe tongana ala yeke fa tënë na ala yeke sara adisciple (2 aCor. 4:13; 1 aThes. 2:2). Nzara ti e ti fa lege na azo so e manda Bible na ala ayeke pusu e ti duti na tere ti ala na ngoi so ala to nda ti sigigi na fango tënë.
5. Tongana nyen nzoni tapande ti mo ayeke mû maboko na awamandango Bible ti hinga ye so aye ti tene ti mä yanga ti Nzapa?
5 Tapande ti mo alingbi ti fa na awamandango Bible ambeni kota sarango ye ti aChrétien. Tongana mo gue ti bâ azo ti kobela wala mo bara aita na wâ na bungbi, ala yeke bâ ndoye ti mo (Jean 15:12). Tongana ala bâ so mo yeke mû mbage na lekengo yâ ti Da ti Royaume wala mo yeke sara ambeni ye ti mû maboko na azo, mo yeke fa na ala tongana nyen ala nga alingbi ti sara (Jean 13:12-15). Nga, tongana ala bâ so mo yeke na ngia na kete ye so mo yeke na ni, mo yeke fa na ala tongana nyen ti ngbâ ti ‘gi royaume kozoni’.—Mat. 6:33.
6. Ye wa aga na peko ti mungo maboko na azo ti be-ti-molenge ti sara na Jéhovah?
6 A hunda ti sara ngangu mingi ti fa Tënë ti Nzapa na azo na ti sara adisciple. Me so tâ kota ngia si e yeke na ni ti bâ azo ti tâ be-ti-molenge so “ayeke tambela na lege ti tene-biani”!—3 Jean 4.