Fa so mo bi bê na zo ni: Bâ lê ti zo nia

¹ Mingi ni, tongana e yeke fa tënë na gbele azo nga da na da, e yeke bâ lê ti ala kozoni si e sara tënë. Na yâ ti kete ngoi so, e lingbi peut-être ti hinga bibe ti ala na ndo gango ti e nga même ti hinga wala tere ti ala anzere. Legeoko nga, ala lingbi ti hinga ye mingi na ndo ti e. Mbeni wali asara tënë so na ndo gango ti mbeni ita-wali na ndo ti lo: “Mbi dabe ti mbi so yanga ti lo ayeke na ngia, na a fa so lo yeke na siriri. Na mbi ye ti hinga ye na ndo ni.” Ye so azi lege lani na wali ni ti mä nzo tënë.

² Ti bâ lê ti zo ni ayeke mbeni nzoni lege so ayeke gue na e ti fa tënë atâa na ndo ti lege wala na mbeni ndo so azo ayeke dä mingi. Mbeni ita-koli ayeke bâ lê ti azo so ayeke ga nduru na lo. Tongana mbeni zo abâ lê ti lo nga, ita-koli ni ahe ngia na pekoni lo fa na lo apériodique. Na sarango kusala na kode so, lo wara lege ti sara apendere lisoro mingi nga lo zia ambeti mingi na maboko ti azo.

³ Gi ti hinga ye so ayeke na bê ti zo: Bango lê ti zo alingbi ti mû maboko na e ti hinga ye so ayeke na bê ti lo. Na tapande, tongana mbeni zo ayeke na kpale ti gbu nda ti ye so e fa wala lo yeda na ni pëpe, fani mingi, e yeke bâ ni na ndo lê ti lo. Tongana lo yeke na kua mingi wala lo ye si tënë ni ahunzi hio, e yeke bâ ni na ndo lê ti lo. Tongaso, e lingbi ti sara tënë ti e ni gi nduru. Tongana e mû atënë ti bê ti zo na nene ni, a yeke mbeni nzoni lege ti fa so e bi bê na lo.

⁴ Fa so mo hinga ye biani na bê kue: Na ando mingi, ti bâ lê ti mbeni zo afa so mo yeke sara ye na bê kue. Bâ ye so Jésus asara tongana adisciple ti lo ahunda lo atene: “Zo nyen alingbi wara salut?” Bible atene: ‘Jésus abâ ala mingi, Lo tene na ala, Azo alingbi sara ye so pëpe, me Nzapa alingbi sara ye kue.’ (Mat. 19:25, 26). Kite ayeke dä pëpe so, tongana ala bâ so Jésus ahinga biani na bê kue ye so lo tene, a sara si atënë ti lo ane na lê ti ala. Legeoko nga, ti bâ lê ti zo ayeke mû maboko na e ti fa tokua ti Royaume na bê ti e kue.​—2 aCor. 2:17; 1 aThes. 1:5.

[Kete tënë na gbe ni]