Mo lingbi ti leke yâ ti kapa ti mo?
1. Ngbanga ti nyen a lingbi e leke yâ ti kapa ti e ti fango tënë?
1 Teti so e yeke atâ Chrétien, e yeda na tisango ndo ti ga “azo ti gi azo.” (Mat. 4:19). Tongana ti so atâ wagingo susu ayeke wara asusu tongana ala gi ala na nzoni ngoi ni, e nga kue e lingbi ti wara ye ti nzoni mingi tongana e leke ti fa tënë na ngoi so azo ayeke na yanga-da. Na yâ akodoro mingi, lâ ayeke linda hio pëpe na yâ ti anze so ayeke ga. Na lakui, mo yeke wara ka azo mingi na yanga-da. Mingi ni, ala yeke wu tere na ala lingbi ti yamba azo so ayeke ga ti bâ ala. Mo lingbi ti leke yâ ti kapa ti mo si mo fa tënë na angoi so?—1 aCor. 9:23.
2. Ambeni lege so e lingbi ti ndu gbâ ti azo na nzo tënë ayeke so wa?
2 Fango tënë ti lakui: Ti leke kozoni ti fa tënë na lakui alingbi ti mû maboko na e ti ndu azo mingi na nzo tënë (aProv. 21:5). Amaseka alingbi peut-être ti fa tënë na peko ti so ala londo na da-mbeti akiri. Ambeni nde alingbi ti sara ni tongana ala londo na kua akiri. Ambeni groupe ti mandango buku alingbi ti fa tënë ngbonga oko kozoni na mandango buku ti yenga oko oko.
3. Na alege wa mo lingbi ti fa tënë na lakui na yâ ti territoire ti mo?
3 Ti fa tënë da na da na lakui ayeke mû lege na e ti wara azo so ayeke duti ka na yanga-da pëpe. Na yâ aterritoire mingi, e lingbi ti fa tënë na lakui na lege wala na ambeni ndo so e wara azo dä. Nga, aita mingi abâ so lakui ayeke mbeni nzoni ngoi ti kiri ti bâ azo na ti to nda ti a-étude.
4. Ngbanga ti nyen a yeke nzoni ti sara ye na ndara nga na nzobe na ngoi so e yeke fa tënë na lakui?
4 A hunda ti sara ye na ndara: A hunda ti sara ye na ndara na ngoi so mo yeke fa tënë na lakui. Mingi ni, a yeke nzoni ti kaï fango tënë ti mo kozoni si ndo avuko, ahon ti gue ti bâ azo na ngoi so ala yeke gue ti lango (aPhil. 2:4). Tongana mo pika yanga-da, luti na ndo so a lingbi ti bâ mo, nga fa tere ti mo nzoni. Hio, fa na zo ni nda ni so mo ga. Tongana mo tï nzoni pëpe, na tapande na ngoi so azo ayeke te ye, hunda ti kiri mbeni lâ. Gi lakue ti sara ye na nzobe.—Mat. 7:12.
5. Tongana nyen si e lingbi ti kpe akpale so alingbi ti si na ngoi so e yeke fa tënë?
5 E yeke nga na bezoin ti sara hange na ambeni kpale so alingbi ti si. Tongana mo yeke fa tënë na ngoi so lâ ayeke linda wala ndo avuko awe, a yeke na lege ti ndara ti fa tënë use use wala na groupe. Fa tënë na ndo alege so wâ aza dä nzoni nga na ando so azo ayeke dä. Fa tënë gi na ando so mo bâ a yeke nzoni. Kpe ando so ye ti sioni alingbi ti si dä tongana ndo avuko awe.—aProv. 22:3.
6. Ambeni ye ti nzoni wa fango tënë ti lakui alingbi ti ga na ni na e?
6 Fango tënë ti lakui ayeke mû lege na e ti ndu gbâ ti azo na nzo tënë. A yeke mû nga peut-être lege na e ti fa tënë legeoko na apionnier auxiliaire nga na apionnier permanent (aRom. 1:12). Mo lingbi ti leke yâ ti kapa ti mo ti mû mbage na yâ ti mara ti fango tënë tongaso?