Mû maboko na azo ti ga kamarade ti Nzapa
1 Laso, azo ti amara kue ayeke manda ye na ndo aye so Jéhovah aye (Es. 2:2, 3). Ye oko, ti tene azo ni so ‘angbâ ti lë lakue’, a lingbi ala ndoye Jéhovah (Luc 8:15; Marc 12:30). Tongana ala ndoye Jéhovah pëpe, ala yeke wara ande ngangu pëpe ti luti na gbele asioni sarango ye wala ti sara ye so ayeke mbilimbili. Mbeni ye so mo lingbi ti sara ti mû maboko na azo ti duti na nzoni songo na Jéhovah ayeke ti sara si ala ye asarango ye ti lo mingi ahon ti kozo. Wa ala ti gbu li ti ala na ndo atënë so ayeke na yâ ti buku Ga ndulu na Jéhovah.
2 Tapande ti mo: Aye so mo wani mo yeke sara alingbi ti sara ye mingi na ndo bê ti azo so mo yeke manda Bible na ala. Tongana ala bâ so mo yeke bâ na nene ni mingi songo ti mo na Jéhovah nga tongana nyen songo ni so asara ye na ndo ti fini ti mo, a lingbi ti pusu ala ti lë mara ti songo so na Jéhovah nga (Luc 6:40). Biani, tapande ti e ayeke sara ka ye mingi na ndo azo ahon tënë ti yanga ti e.
3 Mbeni kota ye so na lege ni ababâ na mama ayeke fa na amolenge ti ala ti ndoye Jéhovah ayeke tapande ti ala wani (Deut. 6:4-9). Mbeni koli na wali so aye ti bata amolenge ti ala na yâ ti tâ tënë ahunda lani wango na mbage ti amba ti ala so abata amolenge ti ala nzoni. Koli ni atene: “Ala kue atene na mbi so tapande ti ababâ na mama ayeke kota ye mingi.” Tongaso, na yâ ti aye kue so ababâ na mama ayeke sara, a yeke nzoni ala duti mbeni tapande ndali ti amolenge ti ala na ndo tënë so aye ti tene ti duti “ndeko [wala kamarade] ti Nzapa.”—Jacq. 2:23.
4 Sambela na bê ti mo kue: Mo lingbi nga ti mû maboko na azo ti lë songo na Jéhovah na fango na ala tongana nyen ti sambela na bê kue. Mo lingbi ti fa na ala tapande ti sambela so Jésus afa na adisciple ti lo nga gbâ ti asambela so ayeke na yâ ti Bible (Mat. 6:9, 10). Na lege ti asambela ti mo wani, mo lingbi ti fa na amolenge ti mo nga na azo so mo yeke manda Bible na ala tongana nyen ti sambela. Tongana ala yeke mä sambela so mo yeke tene na bê ti mo kue, ala yeke bâ ndoye so mo yeke na ni ndali ti Jéhovah. Wa ala ti “zia ti sambela pëpe” tongana ala wara akpale (aRom. 12:12). Na ndembe so ala yeke bâ tongana nyen Jéhovah ayeke mû maboko na ala na yâ ti akpale, ala yeke to nda ti zia bê ti ala na lo na ti ndoye lo tongana tâ kamarade.—Ps. 34:9; aPhil. 4:6, 7.