“I sara so ti dabe i na Mbi”

Dango bê na kuâ ti Jésus na lango 2 ti avril

1. Ngbanga ti nyen lango 2 ti avril ngu 2007 ayeke kota lango?

¹ Na lango 2 ti avril ngu 2007, azo kutu mingi na ndo lê sese kue ayeke bungbi ti dabe na kuâ ti Jésus. Jésus akui ngbanga ti so lo mû mbage ti yanga-ti-komande ti Babâ ti lo ti yayu. Na sarango tongaso, lo fa so Satan Zabolo abi tënë ti mvene na li ti awakua ti Nzapa na tenengo so ala yeke sara na Jéhovah na bibe ti kion (Job 2:1-5). Kobe ti Seigneur adabe ti e nga so na lege ti kuâ ti lo tongana zo so sioni oko ayeke na tere ti lo pëpe, Jésus ‘amû fini ti Lo tongana wen [“ye ti zi zo”, NW ] teti azo mingi.’ (Mat. 20:28). Ni la, Jésus akomande na adisciple ti lo, lo tene: “I sara so ti dabe i na Mbi.” (Luc 22:19). Mo kiri singila na Nzapa ndali ni? Na mo to nda ti leke tere ti mo awe ti dabe ti mo na kota fä ti ndoye so?​—Jean 3:16.

2. Tongana nyen e lingbi ti leke bê ti e nzoni ndali ti Mémorial?

² Leke bê ti mo: Na bango ye so asi na Jésus na tanga ti alango ti fini ti lo, e lingbi ti leke bê ti e nzoni ndali ti Matanga ti Dango Bê so. Ti mû maboko na e ti sara ni, e yeke na mbeni kapa ti dikongo Bible so a leke ni ndali ni na yâ ti mbeti Gingo nda ti Tënë ti Nzapa lâ oko oko​—2007 nga na yâ ti Calendrier 2007. Aversê ni afa aye so asi na yâ ti alango so angoro kuâ ti Jésus alingbi na calendrier ti ngoi ti e. Alango so Bible asara tënë ni aluti na ndo calendrier ti aJuif, so adiko alango ni na lindango ti lâ juska na mbeni lindango ti lâ. A bâ kangbi so ayeke na popo ti dikongo alango so na a mû ni ti leke na kapa ti dikongo Bible ndali ti Mémorial ni. Ti kiri ti diko aversê ni na ti gbu li na ndo kota ndoye ti Nzapa na yâ sambela ayeke mû ande maboko na e ti wara ye ti nzoni mingi na lege ti Mémorial ni.

3. Tongana nyen ti mû maboko na azo so e tisa ala nga azo so azia ti fa tënë aninga awe ti wara nzoni na lege ti Mémorial ni?

³ Tisa azo ti ga: Supplément ti Kusala ti Royaume ti février asara tënë ti kota kapa ti tisango azo na kota ngoi so. Mo leke tere ti mo awe ti mû mbage mingi na yâ kota kapa so? Mo sû na mbeti iri ti azo so mo hinga ala ti tisa ala, na mo komanse ti sara tënë ni na ala awe? Ga hio kozo na lakui ti Mémorial ni ti yamba azo so mo tisa ala nga ambeni zo nde. Mo lingbi ti duti na tere ti ala, na bâ wala ala yeke na Bible nga na mbeti ti bia. Fa ala na tanga ti azo ti kongregation ni. Na peko ti Mémorial ni, duti nduru ti kiri tënë na ahundango ndo ti ala. Tisa ala ti ga na kota diskur so a yeke sara na lango 15 ti avril. A yeke nzoni a-ancien abi bê ti tisa ala so azia ti fa tënë aninga awe ti ga na Mémorial nga na kota diskur ni.

4. Tongana nyen e lingbi ti mû maboko na azo ti gue lakue na li ni na lege ti yingo na peko ti Mémorial ni?

⁴ Mû maboko na afini zo nga na ala so azia ti fa tënë aninga awe ti gue na li ni: Wamungo diskur ti Mémorial ni ayeke fa na nduru tënë ye so a leke ndali ti mandango Bible, na lo yeke wa afini zo ti ngbâ lakue ti manda ye na ndo ti Jéhovah. Mo lingbi ti mû atënë ti lo ti wa azo so mo tisa ala ti manda ye mingi na ndo ti Jéhovah. Tongana ala de ti manda Bible pëpe, kiri mo bâ ala hio na peko ti Mémorial ni na fa na ala tongana nyen ti manda Bible. Ti tene ala gue na li ni na lege ti yingo, a yeke nzoni ala ga nga na abungbi (aHéb. 10:24, 25). Ti sara ni, wa ala ti ga lakue na abungbi. A yeke nzoni a-ancien ague abâ aita so azia ti fa tënë aninga awe na so aga na Mémorial ni na ti wa ala ti gbu li na ndo atënë ti diskur ni. Ye so alingbi ti pusu ala ti kiri ti gbu kusala ti ala na yâ ti kongregation.

5. Ye ti nzoni wa Mémorial alingbi ti sara na ndo ti e?

⁵ Mémorial ayeke mû na e lege ti gbu li nzoni na ndo ye so Jéhovah na Jésus asara ndali ti e. Gbungo li tongaso ayeke kono ndoye ti e ndali ti ala na ayeke sara ye na ndo ti tambela ti e (2 aCor. 5:14, 15; 1 Jean 4:11). Zia e nga na azo so e tisa ala e leke tere ti e ndali ti kota lango so, so na ngoi ni e yeke “fa kui ti Seigneur na gigi”.​—1 aCor. 11:26.