Aita kue alingbi ti sara si mbeni zo aga disciple
1 A yeke pëpe gi na ngangu ti zo oko si mbeni zo aga disciple. Jéhovah alingbi ti mû ‘afon lo na kusala’ ti mû maboko na awamandango Bible ti maï na lege ti yingo (1 aCor. 3:6-9). E oko oko kue e yeke mû maboko na afini zo gi pëpe na lege ti anzoni tënë so e yeke kiri ni na ngoi ti abungbi me nga na lege ti nzoni tambela ti e. Ye so afa tâ polele so yingo ti Nzapa ayeke sara kusala na ndo ti e (Jean 13:35; aGal. 5:22, 23; aEph. 4:22, 23). Ambeni ye wa e lingbi ti sara ti mû maboko na afini zo?
2 Kongregation ni: E kue e lingbi ti fa so e bi bê na azo so ato nda ti ga na bungbi na lege so e yeke gue kozoni ti bara ala na ngia na ti sara lisoro na ala kozoni si bungbi akomanse nga na pekoni. Tongana lo dabe ti lo na kozo gango ti lo na bungbi, mbeni koli atene: “Gi na yâ ti lango oko, mbi wara anzoni zo kâ, so mbi hinga ala lâ oko pëpe; ade mbi tingbi na mara ti azo tongaso pëpe na yâ ti eglize so mbi kono dä. Kite ayeke dä pëpe so mbi wara tâ tënë awe.” Lo wara batême nze mbasambala na peko ti kozo bungbi ti lo.
3 Gonda zo ni na bê ti mo kue tongana lo yeke gue na li ni na lege ti yingo. Azo ayeke kanga lege na lo? Lo yeke ga lakue na abungbi? Lo yeke sara ngangu ti kiri tënë na bungbi? Lo zia iri ti lo na Ekole ti Kusala ti aChrétien awe? Lo to nda ti fa tënë awe? Gonda lo ndali ti so lo yeke gue na li ni. Ye so ayeke dë bê ti lo nga ayeke pusu lo ti sara ye mingi.—aProv. 25:11.
4 Mo wafango ye ni: Ambeni wafango tënë awara lege ti mû maboko na azo so ala yeke manda Bible na ala ti hinga aita oko oko ti kongregation. Ala yeke tisa ambeni wafango tënë ti gue na étude ti ala ni. Ku pëpe ti tisa wamandango Bible ni na bungbi. Na ngoi so lo to nda ti ga na bungbi, fa lo na aita. Lo yeke tiri na mbeni sioni ngobo tongana nyongo manga? Mbeni zo ti sewa ti lo ake ti tene lo manda Bible? Lo lingbi ti wara nzoni tongana lo sara lisoro na mbeni wafango tënë so awara ândö mara ti kpale tongaso.—1 Pi. 5:9.
5 Afini zo ayeke na bezoin ti tene kongregation amû maboko na ala. Aita kue alingbi ti mû maboko na ala ti gue na li ni tongana ala fa so ala yeke bi bê biani na afini zo so.