Kota kapa ti kangbingo tract ti londo na 20 octobre ti si na 16 novembre!
1 Ti londo na lundi 20 octobre ti gue teti yenga osio, fade e bi tere ti e na yâ ti kota kapa ti kangbingo mbeni fini tract so li ti tënë ni ayeke Mo ye ti hinga tâ tënë? E yeke na beku so fade kota kapa ti kangbingo tract so akono nzara ti azo na ndo ti oko lingu ti tâ tënë.—Jean 17:17.
2 Tract so akiri tënë nduru na lege ti Bible na ndo ti akota hundango tënë omene: “Nzapa ayeke pensé nga na e la?” “Bira na pasi ayeke hunzi mbeni lâ?” “Nyen la ayeke si na zo na peko ti kuâ nyen?” “Beku ayeke dä ndali ti azo so akui awe?” “A lingbi mbi sambela tongana nyen si Nzapa amä mbi?” nga “Mbi lingbi ti sara nyen ti duti na ngia na yâ ti fini ti mbi?” A-églize so atene so ala yeke ti Christ amû nzoni kiringo tënë lâ oko pëpe na ahundango tënë so. Même azo mingi so ayeke aChrétien pëpe ayeke hunda tere ti ala na ndo ti atënë so, me ala hinga pëpe so Bible akiri tënë polele dä. Tongaso, tokua so ayeke nzere ande na azo mingi.
3 Kangbi ni na yâ ti territoire ti mo kue: Sara ngangu ti kangbi ni mingi da na da na yâ ti territoire ti mo. Tongana territoire ti mo akono mingi, fade a-ancien ayeke tene na mo ti zia mbeni tract ni na azo so ayeke na yanga-da pëpe na kozo gango ti mo. Girisa pëpe ti mû mbeni na avoizin ti mo, afami, akamarade ti place ti kua wala ti ekole, nga azo so mo yeke sara lisoro na ala lakue. Peut être mo lingbi ti leke ti mû kusala ti pionnier auxiliaire na nze ti octobre wala novembre. Mo yeke na mbeni molenge wala mbeni zo so mo manda Bible na lo so ayeke maï nzoni na lege ti yingo na so alingbi ti fa tënë legeoko na e na ngoi ti kapa so tongana mbeni wafango tënë so ade ti wara batême pëpe? Tongana a yeke tongaso, sara tënë ni na a-ancien.
4 Tënë ti tenengo ni: Ti ndu azo mingi na tokua so, a yeke nzoni ti sara tënë nduru. Hunda na zo ni mbeni oko ti ahundango tënë omene so ayeke na ndo ti tract ni, na gboto lê ti lo na ndo ti kiringo tënë ni so ayeke na yâ ti tract ni. Ye so ayeke mû lege na awafango tënë kue ti leke yâ ti tënë ti ala ti lingbi na dutingo ti azo ti territoire ti ala. Tongana mbeni zo asara nzara ti tënë ni, mû note na kiri mo bâ lo. Na anda-yenga, fade a yeke kangbi tract ni legeoko na apériodique. Tongana kapa ni ahunzi na 16 novembre awe, fade e yeke kangbi buku Bible afa. Fade a yeke sara kusala na atanga ni so angbâ legeoko na ambeni tract so ayeke dä.
5 To nda ti manda Bible na zo: A sara tract so mbilimbili ti mû maboko na e ti to nda ti manda Bible na azo. Tongana mo kiri ti bâ mbeni zo so asara nzara ti tënë ni, mo lingbi ti hunda na lo tâ tënë wa na yâ ti Bible adë bê ti lo? Fa na lo ndangba lembeti ni so ahunda na azo ti manda Bible, na mû na zo ni buku Bible afa wala mbeti so a fa na peko ti tract ni. Tongana lege ayeke dä, sara tënë nduru na ndo ti paragraphe oko wala use so amû sango mingi na ndo ti li ti tënë so lo soro.
6 Jéhovah ayeke gi azo so aye ti voro lo “na yingo na tene-biani”. (Jean 4:23). Zia e kue e mû mbage ti e na yâ ti kota kapa so ti mû maboko na azo ti hinga tâ tënë!