Fa na azo ti ndoye Jéhovah
1. Nyen la apusu ambeni zo ti ga nduru na Jéhovah?
1 Mo dabe ti kozoni so mo mä tënë na ndo ti Jéhovah? Nyen la apusu mo ti ga nduru na lo? Fade azo mingi ti nzoni bê ayeke tene na mo so ala ga nduru na Wasarango e gi na hingango asarango ye ti lo so mara ni ayeke dä pëpe, mbilimbili nzobe na ndoye ti lo.—1 Jean 4:8.
2, 3.Tongana nyen e lingbi ti sara kusala na buku Bible afa ti mû maboko na awamandango Bible ti ndoye Jéhovah mingi?
2 “So ayeke Nzapa ti e”: Buku Bible afa agboto lê na ndo ti ndoye ti Jéhovah na ti tene zo aduti na nzoni songo na lo. Tongana nyen e lingbi ti sara kusala na mbeti so ti fa na azo ti ndoye Nzapa mingi? Na ngoi so e yeke bâ mbeni fini tënë, e lingbi ti hunda na zo ni mbeni hundango tënë so alingbi ti pusu lo ti gbu li, na tapande: “Tâ tënë so afa nyen na ndo ti Jéhovah?” wala “Na lege wa tënë so afa polele so Jéhovah ayeke tâ nzoni Babâ so mara ti lo ayeke pëpe?” Ti fa ye na lege tongaso alingbi ti mû maboko na wamandango ye ni ti to nda ti mbeni kpengba songo na Jéhovah so aninga na yâ ti fini ti lo.
3 Na ngoi so e mû maboko na awamandango ye ni ti bâ nzoni ti hingango oko tâ Nzapa so ayeke na fini, fade ala yeke tene, tongana ti so Esaïe atene: “Lo so ayeke Nzapa ti e.” (Es. 25:9). Na ngoi so e yeke fa tënë ti Nzapa, a yeke nzoni ti luti na ndo ti lege so azo kue ayeke wara tënë nzoni na lege ti gango tâ tënë ti aye so Jéhovah aleke awe ti sara na lege ti ngorogbia ti lo so Jésus Christ ayeke na ndo ni.—Es. 9:5, 6.
4, 5. Ti ndoye Jéhovah aye ti tene nyen?
4 Ye so afa ndoye ti zo na mbage ti Jéhovah: E hinga so ti ndoye Jéhovah na bê ti e kue, na âme ti e nga na bibe ti e ahunda ye mingi ahon gi ti bi bê ti e mingi na mbage ti Nzapa. A lingbi e manda ti yeda na ti duti na oko bibe ti Nzapa (Ps. 97:10). A bâ ndoye ti Nzapa na lege ti batango akomandema ti lo na ti ngbâ “azo so ayeke nzoni-kue, na azo so abata tënë ti Nzapa”, même na gbele aye ti ngangu wala kangango lege.—2 Pi. 3:11; 2 Jean 6.
5 Teti so e ndoye Nzapa, ti sara ye so bê ti lo aye anzere mingi (Ps. 40:9). A lingbi wamandango Bible ahinga so Nzapa amû akomandema ti lo kue ndali ti nzoni ti awakua ti lo teti lakue lakue (Deut. 10:12, 13). Na dutingo na fini alingbi na fango lege ti Jéhovah, zo ayeke fa kota singila ti bê ti lo teti apendere kusala ti Lo. Mû maboko na wamandango Bible ti hinga so ti tambela na ndo ti alege ti Jéhovah so ayeke mbilimbili ayeke bata zo na gbe ti aye ti vundu nde nde.
6. Aye ti nzoni wa ala so andoye Jéhovah alingbi ti wara?
6 Aye ti nzoni teti ala so andoye Nzapa: Jéhovah abata azo so ayeke na tâ be-ti-molenge so andoye lo, na lo fa na ala ‘tâ nda ti ye ti Lo mveni.’ (1 aCor. 2:9, 10). Teti ala hinga aye so Jéhovah aleke awe ti sara, ala hinga ye polele na ndo ti gigi ti ala ti kekereke na ala yeke na tâ beku (Jér. 29:11). Azo so andoye Jéhovah awara kota nzobe ti lo (Ex. 20:6). Ala bata nâ yâ ti bê ti ala beku ti fini ti lakue lakue ngbanga ti so Nzapa andoye ala mingi.—Jean 3:16.
7. Ti fa ye na azo ti ndoye Jéhovah, mo bâ ti mo ni tongana nyen?
7 Tongana e hinga ye mingi na ndo ti Babâ ti e ti yayu, e yeke fa tënë ti lo mingi na azo (Mat. 13:52). So tâ kota matabisi si e yeke na ni ti fa ye na azo, mbilimbili amolenge ti e, ti ndoye Jéhovah! (Deut. 6:5-7). Zia si e, legeoko na awamandango Bible ti e kue, e si singo na tënë ti sepela tongana e bâ “kota nzobe” ti Jéhovah.—Ps. 145:7.