Mo lingbi ti ga wafango ye!
1. Kota matabisi wa a zia na gbele wafango tënë ti Royaume oko oko?
1 Mbeni oko mbage ti kusala ti e so amû ngia ayeke ti fa na zo tâ tënë. Ti bâ mbeni zo ayeda na tokua ti Royaume na ti mû maboko na lo ti ga nduru na Gbia ti dunia kue ayeke mbeni kota ye so e ye ti tene asi na e (Jacq. 4:8). Ti fa ye na mbeni zo so ayeke na nzara ti tâ tënë nga ti bâ so lo to nda ti gbian aye mingi na yâ ti fini ti lo, bango ndo ti lo, nga na tambela ti lo ayeke mbeni ye so a lingbi wafango tënë ti Royaume kue agi.—Mat. 28:19, 20.
2. Ngbanga ti nyen ambeni zo ayeke na mbeto ti manda Bible na azo? na ye wa ayeke mû maboko na ala ti hon ndo ti kpale so?
2 Zia bê ti mo na Jéhovah: Giriri, awakua be-ta-zo ti Nzapa abâ so ala lingbi pëpe ti sara kusala so Nzapa amû na ala. Ziango bê na Jéhovah Nzapa amû maboko na Moïse, Jérémie, Amos nga na ambeni senge zo ti hon ndo ti agingo bê wala mbeto ti ala na ti sara mbeni kota kusala (Ex. 4:10-12; Jér. 1:6, 7; Amos 7:14, 15). Bazengele Paul nga atene ni “yeke na mbeto pëpe na yâ Nzapa ti e”. (1 aThes. 2:2). Biani, e kue e lingbi ti zia bê ti e na Jéhovah ti mû na e maboko, ndara na ngangu so atia e ti sara na anzoni étude.—Es. 41:10; 1 aCor. 1:26, 27; 1 Pi. 4:11.
3, 4. Fango ye wa ayeke dä na ndembe so ti mû maboko na e ti fa na azo Tënë ti Nzapa?
3 Yeda si a fa ye na mo: Jéhovah Nzapa, so ayeke Kota Wafango ye na e, ayeke fa ye na e na lege ti mbeni kapa ti mandango tënë ti lo so alingbi ti sara si e ga awafango ye so alingbi kue (Es. 54:13; 2 Tim. 3:16, 17). Yeda na fango ye so na sara ye kue so mo lingbi ti sara ti hinga Mbeti ti Nzapa nzoni na ti maï kode ti mo ti fango atâ tënë ti Bible. Atâa so kozo kusala ti Ekole ti Kusala ti aChrétien na Bungbi ti Kusala ayeke ti sara ye so e londo ti fa ge, abungbi ti kongregation kue ayeke leke e ti fa na azo ye na yâ ti Tënë ti Nzapa.
4 Sara ngangu ti manda akode so ayapu ti fa na atâa tënë ti Nzapa so alï. Buku Ekole ti Kusala, na lembeti 227, atene: “A lingbi mo gbu nda ti tënë ni mo mveni nzoni tongana mo ye ti sara si azo agbu nda ni.” Kiringo tënë na bungbi ayeke mû maboko na e ti bata na li angbongboro tënë ti tene e sara kusala na ni mbeni lâ. Tongaso, leke tere ti mo nzoni, na hinga so fade kode ti mo ti fango ye ayeke maï.
5. Fango ye wa nga e yeke na ni na yâ ti kongregation so amû maboko na e ti ga anzoni wafango ye?
5 Na ngoi so ala to nda ti kusala ni, kite ayeke pëpe so awafango tënë ayeke manda ye na tere ti mba tongana ala yeke mû mbage na kusala ti sarango adisciple (Luc 10:1). Tongana lege ayeke dä, gue na ala so akpengba awe, so na popo ni apionnier, a-ancien na asurveillant so ague na ndo nde nde, na yâ ti kusala ti sarango a-étude. Bâ lege so ala yeke sara kusala na atapande so ayapu nga na ambeni gbakuru ti fango ye tongana alimon so ayeke na yâ ti ambeti ti e ti manda ti fa nda ti atâa tënë so ayeke na yâ ti Mbeti ti Nzapa. Hunda na ala wango na ndo ti lege so mo lingbi ti ga nzoni wafango ye (aProv. 1:5; 27:17). Bâ ye so kue tongana fango ye so a mû na mo, fango ye so alondo na Nzapa.—2 aCor. 3:5.
6. Ti tâ tënë ni, ye wa a hunda ti sara ti ga mbeni nzoni wafango Tënë ti Nzapa?
6 Zia bê ti mo kue na Jéhovah, na wara nzoni na lege ti fango ye ti lo. Fa na lo na yâ ti sambela so mo ye ti gue na li ni (Ps. 25:4, 5). Mo nga mo lingbi ti wara ngia ti mû maboko na mbeni zo ti ga mbeni wafango Tënë ti Nzapa tongana mo!