Na gbe ti komandema ti Nzapa lani, aye kue so lo créé ayeke beoko nga ala duti lani na yâ ti siriri

Ngbanga ti nyen la e yeke na bezoin ti Royaume ti Nzapa?

Na tongo nda ti mbaï ti azo, a yeke lani gï Zo so acréé e so iri ti lo ayeke Jéhovah la akomande. Lo komande lani na lege ti ndoye. Lo leke lani mbeni pendere ndo, so a iri ni yaka ti Éden, ti tene azo aduti dä, nga lo mû na ala gbâ ti kobe. Lo mû nga na azo mbeni nzoni kua ti sara (Genèse 1:28, 29; 2:8, 15). Azo alingbi ti ngbâ fade ti duti na siriri tongana ala ngbâ na gbe ti komandema ti Nzapa, so lo komande na ndoye.

Adam agbu lê ti keke so a ngbanzi na ala ti te na maboko ti lo. — Kozo babâ na mama ti e ake ti tene Nzapa akomande na ndö ti ala

Bible afa so mbeni ange so asara kpengba-li, so na pekoni a iri lo Satan Zabolo, adë kite na droit ti Nzapa ti komande. Lo tene so azo ayeke duti na ngia mingi tongana Nzapa la afa lege na ala ape nga lo komande ala ape. Mawa ni ayeke so, akozo babâ na mama ti e, Adam na Ève, ayeda na mvene ti Satan so, na ala kue asara kpengba-li na Nzapa.—Genèse 3:1-6; Apocalypse 12:9.

Ndali ti so Adam na Ève ake ti tene Nzapa akomande ala, ala perdre Paradis so ayeke ndo ti ala lani, nga pasa ti ngbâ na fini lakue lakue na dutingo na nzoni seni (Genèse 3:17-19). Ye so ala sara lani so andu nga amolenge so ala dü na pekoni. Bible atene so ndali ti so Adam asara siokpari, “siokpari alï na yâ ti dunia so, na lege ti siokpari kuâ aga.” (aRomain 5:12). Siokpari asara si mbeni kpale ni nde abâ gigi: “Komandema ti zo na ndö ti mba ti lo aga gï na sioni na mba ti lo ni.” (Zo-ti-fa-tene 8:9). Na mbeni lege nde e peut ti tene so, tongana azo akomande terê ti ala wani, lakue kpale ayeke ga gï na pekoni.

KOMANDEMA TI AZO ABÂ GIGI

Nimrod aluti na baba. Na peko ti lo, azo angbâ ti leke mbeni tour. — Nimrod ake lani komandema ti Jéhovah

Kozo zo so akomande tongana gbia, so Bible asara tënë ti lo ayeke Nimrod. Lo ke lani komandema ti Jéhovah. Depuis na temps ti lo ti ga na ni, azo so ayeke komande akomande na ngangu na ndö ti amba ti ala. A sara ngu 3 000 tongaso awe, Gbia Salomon atene: “Mbi bâ ngu ti lê ti azo so a yeke sara ye ti ngangu na ala, na mbeni zo ti dë bê ti ala ayeke dä pëpe. Azo ti sarango ye ti ngangu na ala ayeke na ngangu.”—Zo-ti-fa-tene 4:1.

Gï oko ye so e yeke bâ laso la. Na ngu 2009, azo ti Bendo ti gigi asû mbeni mbeti atene so a komanse ti ga polele so sioni komandema ti azo la ayeke “mbeni oko ti aye so ayeke na gunda ti asioni ye kue so ayeke si na yâ ti dunia.”

A LINGBI A SARA MBENI YE!

Azo abezoin anzoni zo ti komande nga na mbeni nzoni gouvernement. Na a yeke ye so Zo so acréé e amû zendo ni la!

Afoto nde nde so afa ye ti peko ti komandema ti azo. 1. Mbeni wali ti kodro ti Asie aduti na mbeni saleté ndo, lo yô molenge ti lo so angbâ ti toto. 2. Mbeni mbakoro-koli so ayeke kobela alango na ndö ti gbogbo na hopial. 3. Aturugu angbâ ti pika angombe ti ala. 4. Gbâ ti azo so ngonzo asara ala angbâ ti dekongo nga ayô adrapeau na nduzu. 5. Mbeni wali na molenge ti lo ti wali aluti na gigi ti da ti ala, ala bâ so vitre ti yanga-da ti ala afa. 6. Mbeni kodro so aguru nga na akamba ti wa amû yâ ni. — Même anzoni gouvernement ti azo awara lege ape ti leke angangu kpale ti dunia

Nzapa asigi na mbeni Royaume, wala mbeni gouvernement, so ayeke mû ande place ti komandema ti azo kue na “gï royaume so oko la ayeke ngbâ lakue lakue.” (Daniel 2:44). A yeke Royaume ni so la azo kutu mingi ayeke sambela ndali ni so (Matthieu 6:9, 10). Me Nzapa wani la ayeke Gbia ti gouvernement ni so ape. Lo soro mbeni zo so avivre lani na sese ti duti Gbia ni. Zo ni so ayeke zo wa?