Mo lingbi ti kono yâ ti kusala ti mo?
1. Jésus ahunda na e ti sara nyen? Ngbanga ti nyen tongaso?
1 Tongana Jésus abâ so gbâ ti azo aye ti hinga ye na ndo ti nzoni tënë ti Royaume, lo tene na adisciple ti lo ti “hunda mingi na Wa ti kua ni ti tokua azo ti kua ti fâ akobe ti yaka ti lo.” (Mat. 9:37, 38). Teti so e yeke na ndangba ngoi ti fango lê ti kobe, kusala ti e aga kota mingi ahon ti kozo. Ni la, a yeke nzoni e gbu li ti e na yâ ti sambela ti bâ na lege wa e lingbi ti bi tere ti e mingi na yâ ti fango tënë.—Jean 14:13, 14.
2. Ambeni ita asara nyen ti mû maboko mingi na yâ ti fango tënë?
2 Kono yâ ti kusala ti mo: Grâce na fango lege ti Jéhovah nga na mungo maboko ti lo, aita mingi awara lege ti mû kua ti pionnier (Ps. 26:2, 3; aPhil. 4:6). Ambeni asara kue ti mû kua ti pionnier auxiliaire fani oko wala mingi na yâ ti ngu oko. So nzoni lege ti tene ala kono yâ ti kusala ti ala la. Ngia so ala wara na yâ ti kua so apusu mingi ti ala ti mû kua ti pionnier permanent.—Kus. 20:35.
3. Tongana mo yeke pionnier ândö, nyen la mo lingbi ti sara fadeso?
3 Mo lingbi ti kiri ti mû kua ti pionnier?: Tongana mo yeke pionnier ândö, e hinga so mo girisa pëpe apendere ye so asi na mo na yâ ti kusala so. Mo sambela Jéhovah awe ti tene mo kiri na yâ ti kusala so? Peut-être aye so asara lani si mo zia lege ti kusala ni ayeke dä mbeni pëpe. Hinga pëpe ngoi ni asi awe ti tene mo kiri mo mû pendere kusala so.—1 Jean 5:14, 15.
4. Pendere lege wa azi na e kue laso?
4 Kusala ti fango lê ti kobe ague na li ni mingi fadeso na aga nduru ti hunzi awe (Jean 4:35, 36). Zia e kue e bâ wala e lingbi ti gbian aye na yâ ti dutingo ti e ti kono yâ ti kusala ti e ti fango tënë. Tongana e bâ so lege ayeke dä pëpe, e lingbi ti bâ na yâ ti aye wa e lingbi ti maï dä mingi? (Marc 12:41-44). So tâ kota pasa si ayeke na azo kue so dutingo ti ala laso amû lege na ala ti tene Jéhovah asara kusala na ala na yâ ti pendere kua so!—Ps. 110:3.