Sepela Jéhovah lâ na lâ

1. Awakua ti Nzapa aye ti sara nyen? Ngbanga ti nyen?

¹ Gbia David afa so lo ye ti sepela Jéhovah “lâ na lâ,” même teti lakue lakue (Ps. 145:2, 7, 21). E nga kue e yeke na nzoni nda ti tënë ti sepela Jéhovah lâ na lâ.​—Ps. 37:10; 145:14, 18; 2 Pi. 3:13.

2. Asewa alingbi ti sara nyen ti sepela Jéhovah lâ na lâ?

² Na yanga-da: E yeke na gbâ ti anzoni mbeti ti sara na lisoro na ndo ti Bible na sewa na ngoi so e yeke gi nda ti versê ti lâ oko oko, na ngoi so e yeke manda tënë ti Nzapa na sewa na lakui nga na ngoi so e yeke leke abungbi ti e. Lâ oko oko, mingi ti asewa ayeke te ka kobe place oko. Ye so azi lege na ala ti sara lisoro nzoni na popo ti ala nga ti sepela Jéhovah. Mara ti alisoro tongaso, so ababâ na amama amû li ni dä, ayeke mû maboko mingi na ala ti bata amolenge ti ala “na lege ti sengo ndo nga na awango ti gbotongo mê so alondo na Jéhovah.”​—aÉph. 6:4; Deut. 6:5-7.

3. Alege wa azi na e tongana e yeke na tere ti aita ti e?

³ Na tere ti aita ti e: Na fango tënë wala na ngoi ti abungbi, apendere lege azi na e ti sepela Jéhovah na tere ti aita ti e (aProv. 15:30; aPhil. 4:8; aHéb. 13:15). Ndali ti so e kue e ye Jéhovah, a yeke ngangu pëpe ti tene na yâ ti lisoro ti e na aita ti e e fa tâ singila ti bê ti e ndali ti anzoni ye so Jéhovah asara.​—Ps. 106:1.

4. Mo lingbi ti sepela Jéhovah na ambeni lege wa?

⁴ Na yâ ti lisoro ti e na azo so ayeke aTémoin pëpe: Peut-être lege azi na e pëpe ti sigigi na fango tënë lâ oko oko. Me ti sara tënë même gi kete na amba ti e ti place ti kua, na ekole wala na ambeni zo na tere ti e na ndo ti Jéhovah nga na aye so lo leke na bê ti lo ti sara alingbi ti mû beku na azo ti nzoni bê (Ps. 27:14; 1 Pi. 3:15). Na ngoi so mbeni ita-wali ayeke voyagé na yâ ti avion, lo fa tënë na mbeni zo. Tënë so lo fa adë bê ti zo ni mingi si zo ni amû adresse ti lo nga na numero ti téléphone ti lo na ita ni ti kiri ti wara tere. Na ndembe so akpale ti dunia so ayeke gue gi guengo na li ni nga ayeke ga gi sioni sioni, azo ti Jéhovah angbâ lakue ti ga na “tene-nzoni ti nzoye” na azo kue so adengi mê na ala. Ye so amû beku na azo ni nga apusu ala ti sepela Jéhovah.​—És. 52:7; aRom. 15:11.

5. E ye ti sepela Jéhovah ngbanga nyen? Ye so alingbi ti sara nyen na ndo ti azo?

⁵ A yeke nzere na Jéhovah mingi ti mä awakua ti lo na sepelango lo lâ na lâ. Tongana ti so aye so Jéhovah acréé so lê ti e abâ ayeke sepela lo, e nga kue e lingbi ti sepela Jéhovah lâ na lâ na yanga-da, na yâ ti congrégation nga na ngoi so e yeke sara lisoro na azo so ade ti sepela Jéhovah pëpe.​—Ps. 19:2-5.