‘Mû âme ti mo kue’ na awamandango Bible ti mo
1. Ye wa a hunda ti mû maboko na mbeni wamandango Bible?
1 Ti mû maboko na mbeni wamandango Bible juska ti mû tere ti lo na Jéhovah, a hunda ye mingi ahon gi ti manda Bible lakue lakue na lo. Bazengele Paul ahaka songo so lo yeke na ni na azo so lo manda ye na ala na songo ti mbeni mama so ayeke mû me na amolenge ti lo na lo bata ala nzoni mingi. E nga kue a nzere na e ti ‘mû âme ti e kue’ ti mû maboko na awamandango Bible ti e ti maï na lege ti yingo.—1 aThes. 2:7-9.
2. Ngbanga ti nyen a yeke nzoni e bi bê ti e mingi na awamandango Bible ti e? Tongana nyen e lingbi ti sara ni?
2 Bi bê mingi na zo ni: Na ngoi so mbeni wamandango Bible ayeke sara ye alingbi na aye so lo manda, yingo-ti-hinga ti lo ayeke pusu lo ti fâ yâ ti songo ti lo na azo so ayeke sara ye pëpe alingbi na akpengba-ndia ti Bible (1 Pi. 4:4). Sewa ti lo alingbi ti ke lo (Mat. 10:34-36). E lingbi ti dë bê ti lo na fango na lo so e bi bê ti e mingi na lo. Mbeni missionnaire amû wango so: “Londo hio ti gue pëpe tongana mandango ye ni ahunzi. Tongana lege ayeke dä, ngbâ na sara lisoro kete.” Duti nduru ti mû maboko nzoni na zo so mo yeke manda Bible na lo. Na tapande, mo lingbi ti pika singa na lo wala ti gue ti bâ lo na ngoi so tere ti lo ason? Mo lingbi ti duti ndo oko na wamandango Bible ti mo na ngoi ti abungbi na ti mû maboko na amolenge ti lo tongana lege ayeke dä?
3. Tongana nyen e lingbi ti sara si wamandango Bible ti e awara mungo maboko ti congrégation?
3 Mungo maboko ti congrégation: Tongana mo yeke fa tënë na yâ ti territoire nduru na da ti wamandango Bible ti mo, sara kete vizite na lo ti fa na lo ita so mo na lo ayeke fa tënë. Tongana a yeke nzoni, ngoi na ngoi tisa awafango tënë nde nde, na popo ni a-ancien, ti gue legeoko na mo ti sara étude ni. Nga, kete na pekoni so mo zia gere ti mandango Bible na sese awe, wa wamandango Bible ni ti gue na abungbi na Da ti Royaume. Ye so ayeke mû lege na lo ti duti na kpengba songo na aita ti congrégation so ayeke ga ande sewa ti lo ti yingo.—Marc 10:29, 30; aHéb. 10:24, 25.
4. Tongana nyen ngangu so e yeke sara alingbi ti ga na ye ti nzoni?
4 Mbeni babâ wala mama so ayeke mû maboko lakue na amolenge ti lo ayeke na ngia mingi tongana amolenge ni amû mbage ti Jéhovah na ala ngbâ na yâ ti tâ tënë (3 Jean 4). E lingbi ti wara mara ti ngia so tongana e yeke mû âme ti e kue ti mû maboko na awamandango Bible ti e.