Lê ti mo abâ ye nzoni?
1. Ti duti na ‘lê so abâ ye nzoni’ aye ti tene nyen?
1 Ye so lê ti e ayeke luti na ndo ni ayeke sara ka ngangu na ndo ti sarango ye ti e. Atënë ti Jésus so ayeke tâ na lege ni, so lo tene: “Tongana lê ti mo abâ ye nzoni, fade tere ti mo kue ayeke za.” (Mat. 6:22). Tongana lê ti e “abâ ye nzoni” na lege ti yingo, a yeke luti na ndo ti ye oko: ti sara ye so Nzapa aye. E zia Royaume ti Nzapa na kozo ndo; na aye ti mitele so ayeke senge senge wala ambeni ye nde so ayeke kanga lege na kusala ti fango tënë, e yeke zia si a gboto lê ti e yongoro pëpe.
2. Nyen la alingbi ti sara si e bâ ye nzoni mbeni pëpe, me nyen la ayeke mû maboko na e?
2 A lingbi e bâ dutingo ti e: Aye so radio, télé wala Internet ayeke sara sabango ni na atene na e bâ! tâ ye so e yeke na bezoin ni la, nga aye so azo ayeke na ni alingbi ti sara si e bâ ye nzoni mbeni pëpe. Kozo ti tene e sara mbeni ye so lâ oko ade e sara pëpe wala e vo mbeni ye, na aye ni so ayeke hunda gbâ ti ngoi, nginza wala ayeke mû ngangu ti e kue, a yeke nzoni ti “diko ngere ni,” so ti tene e hunda tere ti e, ‘Ye so ayeke sara si kusala so mbi yeke sara na Jéhovah aga nzoni ahon ti kozo wala ayeke kanga lege na ni?’ (Luc 14:28; aPhil. 1:9-11). A yeke nga nzoni ti bâ ngoi na ngoi tongana nyen e lingbi ti yapu dutingo ti e si e fa tënë mingi ahon ti kozo.—2 aCor. 13:5; aÉph. 5:10.
3. E manda nyen na ndo ti mbeni ita-wali so agbian ye na yâ ti duti ti lo?
3 Na ngoi so mbeni ita-wali amû kua ti pionnier permanent, lo yeke sara kua ti nginza so amû ngoi ti lo kue, na lo soro ti bata ni, atâa so tongana lo changé lo sara kua so amû ngoi ti lo kue pëpe, lo lingbi lakue ti wara nginza ti bata na tere ti lo. Na nda ni lo tene: “Mbeni zo alingbi ti duti ngbâa ti azo use pëpe. Aye so mbi sara nzara ni lani, a lingbi mbi dö ni mbi zia ti tene mbi kaï na abezoin ti mbi. Mbi ga ti bâ so tongana e azo e vo mbeni ye ti mitele laso, kekereke a ga ngbene ye. Nga, ti ngbâ ti gi ti wara ni ayeke sara si mbi woko kue.” Dutingo ti lo amû lege na lo ti gbian ye na yâ ti fini ti lo, na ti wara mbeni kua ti nginza nde so amû lege na lo ti ngbâ ti sara kusala ti pionnier.
4. Ngbanga ti nyen a yeke kota ye laso ti ngbâ ti duti na lê so abâ ye nzoni?
4 Teti so ngoi ti e ayeke ngoi so a hunda ti sara ye hio asara si a yeke même kota ye mingi ti tene lê ti e angbâ lakue ti bâ ye nzoni. Lango oko oko so ayeke hon ayeke sara si e pusu nduru nduru na nda ti aye ti ngoi so nga nduru na fini dunia ti Nzapa (1 aCor. 7:29, 31). Na ziango lê ti e gi na ndo ti kua ti fango tënë, e lingbi ti sö ande e wani nga na ala so ayeke mä e.—1 Tim. 4:16.