Vidéo Les merveilles de la création revèlent la gloire de Dieu
Azo mingi aye ka ti bâ aye so Nzapa aleke. Me azo mingi ahinga pëpe so tongana ala yeke bâ aye so Nzapa aleke, a fa na ala ambeni ye kete na ndo ti Kota Wasarango e nga na atënë ti bê ti lo (aRom. 1:20). Ândö, David amanda ye na ndo ti Jéhovah na lege ti Mbeti ti Nzapa. Me nga na lege ti aye so Nzapa aleke mo bâ mo tene David ‘abâ’ Nzapa, na a sara si lo ga nduru na Jéhovah (Ps. 8:4, 5). Vidéo so iri ni ayeke Les merveilles de la création revèlent la gloire de Dieu, ayeke mû maboko na e, na amolenge ti e nga na azo so e yeke manda Bible na ala ti bâ ambeni ye so Jéhovah aleke, ti hinga asarango ye ti Kota Wasarango e na ti sara si e ga nduru mingi na lo. Na peko ti so mo bâ vidéo ni awe, bâ wala mo lingbi ti kiri tënë na ahundango ndo so ge.
(1) Tongana nyen konongo nga na nzoni tambelango ti atongoro so ayeke na nduzu asara si e kiri e bâ so Jéhovah ayeke kota mingi? (És. 40:26). (2) Tongana e bâ ngu nzoni, nyen la e lingbi ti manda na ndo ti Nzapa? (Apoc. 14:7). (3) Tongana nyen konongo ti sese nga na yongo so ayeke na popo ti lo na lâ afa ndara ti Jéhovah? (4) Kua ti nze ayeke nyen? (Ps. 89:38). (5) Na lege wa Jéhovah asara zo ti wara ngia na yâ ti fini ti lo? (6) ADN ayeke nyen? (Ps. 139:16). (7) Na popo ti aye so Jéhovah asara so ayeke na ndo ti sese, na lege wa zo ayeke ti lo nde? (Gen. 1:26). (8) Nyen la mo yeke ku ni kungo na yâ ti fini dunia?
Mbeni mbage ti vidéo ni, so a sara dä Bonus: (9) Anzoroko abâ gigi tongana nyen? (10) Na lege wa ye so a iri ni gravité akanga lege pëpe na ngu ti gue juska na ali ti akeke? (11) Kua ti nyen la ngu ayeke sara na yâ ti tere ti e? (12) Mû ambeni tapande ti fa tongana nyen aye so ayeke na fini ayeke sara kusala na mango tere. (13) Nyen la ayeke fa lege na anyama ti sara songo na amba ti ala? (14) “Angle d’or” ayeke nyen? na a yeke bâ ni na yâ ti ye so Nzapa aleke tongana nyen?
‘Bâ aye so Jéhovah asara nzoni’: Jésus awa e ti “bâ andeke ti nduzu nzoni” na ti “bâ akongo ti ngonda mbilimbili”. (Mat. 6:26, 28). Bango aye so alingbi ti sara si mabe ti e akpengba, asara si e zia bê ti e kue na Wasarango ye, na e bâ na nene ni ndara ti Jéhovah, ngangu so lo yeke na ni ti sö zo nga na ndoye ti lo. Ahon ti zia si akusala ti dunia so agboto lê ti e ahon ndo ni, e mû ngoi nga e sara ngangu ti bâ apendere ye so Jéhovah aleke na e gbu li ti e na ndo ti aye so afa na e na ndo ti Nzapa ti e.—Ps. 19:2.