Gi azo so ayeke tene mbeni yanga ti kodro nde
1. Na ando so azo ayeke tene ayanga ti kodoro nde nde, ngbanga ti nyen a leke ti tene congrégation oko oko afa tënë na yanga ti kodoro so a tene na ndo ni?
1 Tongana yingo vulu aga na ndo ti adisciple na Pentecôte ti ngu 33, ala “to nda ti sara tënë na ayanga ti kodoro nde nde” na azo so alondo na ayongoro ndo si aga (Kus. 2:4). Na pekoni, azo nduru na 3000 awara batême. Na bango ni, mingi ti awande so aga so ayeke tene kamême yanga ti Hébreu wala Grec. Ye oko, Jéhovah aye ti tene a fa tënë ti Royaume na ala na yanga ti kodoro ti ala. Ti tâ tënë ni mbeni raison ni oko ayeke so tongana a fa tënë na azo na yanga ti kodoro ti ala, ala yeke yeda na ni hio. Ni la, laso, na ando so azo ayeke tene ayanga ti kodoro nde nde, a kangbi yâ ti aterritoire ti congrégation oko oko alingbi na yanga ti kodoro so a tene na ndo ni (Bungbi, l. 107, par. 1-2). A yeke mû territoire pëpe na agroupe ti yanga ti kodoro nde, me ala yeke fa tënë na azo ti yanga ti kodoro ni na yâ ti territoire ti congrégation so ayeke bâ ndo na ndo ti ala nga na ti ambeni congrégation so ayeke nduru na ala.
2. (a) Azo wa la e yeke gi ala? Na ndo wa la a yeke nzoni ti sara ni? (b) Tongana nyen la acongrégation ayeke mû maboko na mba na yâ ti kua ti gingo azo so ayeke tene ayanga ti kodoro nde? (c) Tongana e wara mbeni zo so asara nzara ti tâ tënë, me lo yeke tene mbeni yanga nde, a lingbi e sara nyen?
2 Tongana mo lango na ndo so azo ni kue atene gi yanga ti kodoro oko, mo lingbi ti fa tënë da na da senge. Me ye ni ayeke nde tongana mo lango na yâ ti mbeni kota gbata so azo ni ayeke tene ayanga ti kodoro nde nde. Acongrégation ti mbeni yanga nde alingbi ti fa tënë na yâ ti oko vaka so mo yeke dä so. Atâa so ala lingbi ti mû na mo asango na ndo ti azo so mo yeke gi, so atene yanga ti kodoro ni so, kua ti gingo azo ni so abâ kozoni kue congrégation wala groupe ti mo so a soro lo ti bâ lege ti azo ti yanga ti kodoro ni so. (Bâ encadré “E mû maboko na mba.”) Ye so ahunda ti tene mo gi azo ni gingo nga ti hunda ti hinga ndo wa la mara ti azo ni so ayeke dä. E yeke gi azo ni tongana nyen?
3. Nyen la ayeke mû lege na congrégation wala groupe ti hinga ndo so a lingbi ti gi azo dä nga ngoi so a hunda ti sara na kua ni?
3 Leke kapa ti gingo azo ni: Na yâ ti aterritoire so azo ni ayeke tene ayanga ti kodoro nde nde wungo ti ngoi so zo amû ti gi na azo ni ayeke nde nde. Na tapande, azo so ayeke tene yanga ti kodoro ni ayeke oke na ndo ni so? Awafango tënë ayeke oke? Congrégation wala groupe ni awara adresse ti azo oke? A hunda pëpe ti tene congrégation ni asara gi mara kua na yâ ti avaka ni oko oko kue, me lo lingbi ti soro ndo so azo ayeke dä mingi na yâ ti territoire ti lo nga na ando so ayeke nduru na ni ti sara kua dä nzoni. Ye oko, a lingbi a leke kapa ti gingo azo ni nzoni tongaso si a mû lege na azo mingi ti di iri ti Jéhovah.—aRom. 10:13, 14.
4. (a) A lingbi ti leke kua ti gingo azo ni tongana nyen? (b) Ambeni lege ti wara azo so atene yanga ti kodoro ti congrégation ti mo ayeke so wa?
4 Ti kiri gi na ndo ti oko kua senge senge pëpe a yeke nzoni a-ancien, mbilimbili surveillant ti kusala, aleke nga abâ ndo na ndo ti kua ti gingo azo ni (1 aCor. 9:26). A yeke nzoni a-ancien ti congrégation so ayeke bâ lege ti agroupe ti ayanga ti kodoro nde asoro mbeni ancien wala mbeni wakua ti mungo maboko so alingbi ti mû li ni na yâ ti groupe ni. Mingi ti acongrégation na agroupe ayeke gi kozoni iri ti azo so ayeke na yanga ti kodoro ni, peut-être na ndo ti Internet wala na yâ ti a-annuaire ti téléphone. Na pekoni ala yeke pika singa na azo ni wala ala yeke gue ti bâ ala si a mû lege na congrégation ni ti bâ adresse wa a lingbi a zia na yâ ti territoire ni. Tongana a yeke nzoni ti sara tongaso, a-ancien ti congrégation so ayeke bâ lege ti azo ti yanga ti kodoro ni so alingbi ti leke si ngoi na ngoi congrégation ni kue ague agi azo ni.—Bâ encadré “Tongana nyen ti gi azo so ayeke tene yanga ti kodoro ti congrégation wala groupe ti mo?”
5. (a) Ambeni ye wa e lingbi ti sara na ngoi so e yeke gi azo? (b) E lingbi ti tene nyen na azo so e yeke gi ala?
5 A yeke nzoni e hinga mbilimbili ye so e yeke gi na ngoi kue so e yeke gue ti gi azo ni. Teti so gingo azo ayeke mbeni mbage ti kua ti fango tënë, a yeke nzoni e yü bongo tongana ti so e yeke gue na fango tënë. Azo mingi abâ so ti tara peko ti atënë so ala yeke tene ande nga ti tene yanga ti kodoro ni na ngoi so ala yeke gi azo ni ayeke sara si ala yeke na ngia na yâ ti kua ni nga ala maï akode ti tenengo yanga ti kodoro ni. E yeke sû pëpe na ndo ti rapport ti e ngoi so e mû ti leke na territoire ni, me e lingbi ti sû ngoi so e mû ti gi na azo ni. Tongana e wara mbeni zo so ayeke tene yanga ti kodoro ni, a lingbi e sara kue ti fa na lo nzoni tënë, na pekoni e sara tënë ni hio na surveillant ti kusala wala mbeni zo so lo soro lo, tongaso si a sû ni na ndo ti fiche ti territoire. A yeke nzoni mo sara tënë ni atâa zo ni asara nzara ti tënë ni pëpe. Atâa so kua ti gingo azo ayeke kota ye, a lingbi e sara ye na lege ni na sarango ambage nde nde kue ti kua ti fango tënë.—Bâ encadré “Na gingo azo ni e yeke tene nyen?”
6. Kpale wa azo ti gingo awambongi ayeke tingbi na ni?
6 Gingo awambongi: Na gingo awambongi zo ayeke tingbi na akpale so ayeke nde mingi. A hunda kangango bê nga na sarango kua ngangu. A yeke hinga wambongi pëpe na bango iri ti lo, wala na ambeni ye ti tere ti lo wala na bongo ti lo. Na ndo ni, azo ti sewa ti lo na akamarade ti lo alingbi ti ke ti mû na mo asango na ndo ti lo teti ala bâ atene azo ayeke gi ti sara sioni na lo. Awango so a fa ni ge ti mû maboko na azo so ayeke gi awambongi alingbi nga ti mû maboko na e tongana e yeke gi azo so amä ndo.
7. (a) Tongana nyen la e lingbi ti gi ti wara awambongi na yâ ti avaka? (b) E lingbi ti sara nyen ti zi mbeto na bê ti azo ni?
7 Acongrégation na agroupe ti awambongi asara kua na ambeni kode na a tambela nzoni. Mo lingbi ti hunda azo ti yâ ti avaka ni ti tene na mo wala ala hinga mbeni voizin, mbeni zo ti place ti kua wala mbeni mba ti ala ti ekole so ayeke tene yanga ti awambongi. Peut-être ala yeke na mbeni sewa so ayeke wambongi. Hinga so vizite so mo yeke sara so alingbi ti zia mbeto na bê ti azo. Ni la, a lingbi mo sara kue ti zi mbeto na bê ti ala, fa na ala polele ngbanga ti nyen mo hunda wambongi ni, sara tënë nduru nga na nzoni bê. Ambeni ita awara ye ti nzoni teti so na ngoi so ala ga ti hunda mbeni zo ala yeke fa na lo Bible wala a-DVD ti yanga ti awambongi. Na pekoni ala tene ala ye ti fa na awambongi ni apendere zendo so Bible asara tënë ni so. Tongana zo ni ake ti fa na mo ndo ti wambongi ni, peut-être lo lingbi ti yeda ti tene mo zia na lo adresse ti mo wala mbeti ti tisango zo na bungbi ti tene lo mû ni na sewa wala kamarade ti lo so ayeke wambongi.
8. Tongana nyen mbeni congrégation so ayeke nduru alingbi ti mû maboko na congrégation ti awambongi?
8 Na yâ ti ngu oko, mbeni congrégation ti awambongi alingbi ti tisa mbeni congrégation ti yanga nde so ayeke nduru na lo, ti ga ti mû maboko na lo na gingo awambongi teti lango oko wala use tongana territoire ni ayeke mbeni kota gbata. Na ngoi ti bungbi ti fango tënë so congrégation ti awambongi ayeke sara, a lingbi ti fa ye so awafango tënë ni alingbi ti sara nga a lingbi ti sara mbeni démonstration. A yeke nzoni a zia na yâ ti groupe oko oko mbeni wafango tënë ti congrégation ti awambongi ni nga a mû na ala mbeni karte so afa mbilimbili ndo so ala yeke gue ti gi azo ni dä.
9. A lingbi nga ti gi awambongi na ndo wa? E yeke sara ni tongana nyen?
9 A lingbi nga ti gi awambongi na ando so ala yeke sara abungbi ti ala dä wala na ando so ala yeke wara tere dä ti sara ngia wala na yâ ti andokua so ayeke bâ lege ti awambongi na yâ ti kodoro ni. A lingbi awafango tënë ni ayü bongo alingbi na ndo so ala yeke gue dä so. Na lege ti ndara a yeke nzoni ti sara lisoro na zo oko wala use ahon ti sara tënë na devant ti gbâ ti azo ni kue. Tongana lisoro ni anzere na azo ni, peut-être ala lingbi ti mû adresse ti mba.
10. Na aplace ti kua a yeke gi awambongi tongana nyen?
10 Mbeni lege ni ayeke ti sara akarte ti territoire so a zia na lê ni aplace ti kua ti ndo ni so nga ti gue ti fa tënë dä na ngoi so alingbi. Na lê ti mbeni karte oko a fa gi ando ti kango essence. Ti mbeni karte ni nde a fa gi apressing, arestaurant, ahôtel wala mbeni mara ti ndokua nde. Tongana karte oko afa gi mara ti ndokua oko, awafango tënë alingbi ti sara kua na oko kode nga ti maï kode ti ala. Na tapande, teti so ahôtel ayeke yamba ka aclient so ayeke awambongi, e lingbi ti bâ zo so ayeke bâ lege ti yambango azo ni, e fa na lo na nduru tënë nda ti kua ti e na e zia na lo DVD wala mbeti ti tisango zo na bungbi ti tene lo mû na aclient so ayeke awambongi. Na ambeni place ti kua e lingbi ti hunda wala na popo ti azo ti kua ni mbeni ayeke wambongi wala mbeni client ti ala ayeke wambongi. Tongana ekole ti awambongi ayeke na yâ ti territoire ni, e lingbi ti mû na bibliothèque ti ekole ni a-DVD ti ambeti ti e.
11. Ngbanga ti nyen gingo azo ayeke mbeni kota mbage ti kua ti fango tënë?
11 Mbeni kota kua: Ti wara azo so ayeke tene yanga ti kodoro ti mo alingbi ti duti ngangu kua so amû ngoi mingi. Na ndo ni, na yâ ti ambeni vaka azo ti yanga ti kodoro ni so alingbi ti hon si ambeni zo nde aga na place ti ala, aye so ayeke buba yâ ti asango so a sû na lê ti akarte ti territoire ni. Atâa so kue, na ando mingi gingo azo ayeke kota mbage ti kua ti fango tënë. Jéhovah so amû na e kua ti fango tënë ayeke sara kangbi na popo ti azo pëpe (Kus. 10:34). Lo “so aye si mara ti azo nde nde kue asö fini ti ala na ala si na tâ hingango ye na ndo ti tâ tënë.” (1 Tim. 2:3, 4). Ni la, zia e sara kua maboko na maboko na Jéhovah nga na amba ti e ti gi azo ti ayanga nde nde kue so ayeke “na nzoni bê”.—Luc 8:15.
[Encadré na lembeti 5]
E mû maboko na mba
Tongana congrégation wala groupe ni aye ti wara azo so atene yanga ti kodoro ti ala ti fa tënë na ala, surveillant ti kusala alingbi ti tokua mbeti na a-ancien ti acongrégation ti mbeni yanga ti kodoro nde so ayeke nduru na ala. A yeke nzoni ti tokua mbeti gi na acongrégation so ayeke nduru wala ati so na yâ ni a yeke wara azo mingi so ayeke tene yanga ti kodoro ni. Na pekoni, acongrégation ni alingbi ti tene na awafango tënë ti congrégation ti ala tongana ala wara mbeni zo so ayeke tene yanga ti kodoro ni so, a lingbi ala sû adresse ti zo ni na ala mû na surveillant ti kusala ti tene lo tokua ni na congrégation wala groupe so ahunda mungo maboko. Asurveillant ti kusala ti acongrégation so tënë so abâ ala alingbi ti mä tere ti sara kua na mbeni lege so ayeke sara si a fa tënë na yâ ti territoire kue so azo ti ayanga nde nde ayeke dä. Ala fa na azo so tënë ni anzere na ala congrégation wala groupe so ala lingbi ti gue dä.
Tongana awafango tënë awara mbeni zo ti yanga nde (wala mbeni wambongi) so tënë ni anzere na lo, ala lingbi ti sû mbeti Veuillez suivre l’intérêt (S-43) na ala mû ni na secrétaire ti congrégation hio. Ye so ayeke mû lege na zo ni ti wara mungo maboko na lege ti yingo hio.—Bâ km 5/11 l. 3.
[Encadré na lembeti 6]
Tongana nyen ti gi azo so ayeke tene yanga ti kodoro ti congrégation wala groupe ti mo?
• Hunda ambeni zo: awamandango Bible, azo ti yâ ti sewa, azo ti place ti kua nga na ambeni zo nde.
• Gi a-iri ti azo so ayeke na yanga ti kodoro ni na yâ ti a-annuaire ti téléphone. A wara na ndo ti Internet wala na mbeni ndokua ti téléphone annuaire so awara iri ti azo nga na adresse ti ala dä.
• Na ndara mo lingbi ti pusu nduru na andokua so ayeke bâ lege ti azo, na tapande abibliothèque, andokua ti letäa nga na ada-mbeti.
• Diko ambeti-sango ti bâ wala na yâ ni a fa aye so azo ti mbeni yanga ti kodoro nde aleke ti sara.
• Bâ ndo na ando ti kango ye nga na andokua so azo ti yanga ti kodoro nde ayeke gue dä mingi.
• Tongana azo so abâ ndo na ndo ni amû lege na mo, mo lingbi ti leke mbeni ndo so mo zia ambeti dä na yâ ti ada senda-gi wala na ando ti yongo azo na kutukutu so azo ti tenengo yanga ti kodoro ni so ayeke gue ka dä.
• Tongana ndia ti kodoro ti mo ayeda na ni, vo annuaire ti a-adresse wala programme ti ordinateur so ayeke fa adresse ti azo na ndo ti Internet.
[Encadré na lembeti 7]
Na gingo azo ni e yeke tene nyen?
Tongana mo fa na zo ni polele nga na nzoni bê nda ti ye so mo ye ti sara so ayeke zi gingo bê so zo ni ayeke na ni. A yeke nzoni mo fa na lo kozoni mbeti ti yanga ti kodoro ni so.
Tongana mo bara lo awe, mo lingbi ti tene: “E yeke gi azo so ayeke tene yanga ti ______ ti fa na ala azendo so ayeke na yâ ti Bible. Mo hinga mbeni zo so e lingbi ti sara lisoro na lo?”
Tongana mo yeke gi awambongi, mo lingbi ti tene: “Bara ala. Mbi lingbi ti fa na ala mbeni ye? [Sara kua na lecteur DVD portable ti fa na lo mbeni versê na yâ ti Bible Fini Dunia so a zia ni na ndo ti DVD.] So ayeke mbeni mbage ti Bible na yanga ti awambongi ti Amerika. E yeke nga na gbâ ti avidéo so zo alingbi ti wara ni senge senge ti mû maboko na awambongi na lege ti yingo. Mo hinga mbeni zo so ayeke wambongi wala zo so amä ndo nzoni pëpe si lo yeke tene yanga ti awambongi?” Tongana zo ni adabe ti lo na mbeni wambongi pëpe, a yeke nzoni mo fa na lo ando so peut-être lo tingbi na mbeni wambongi dä awe, na tapande na place ti kua, na ekole wala na yâ ti vaka.