Lege ti leke anzoni tënë ti tongo nda ti lisoro
1. Ngbanga ti nyen a yeke kota ye ti leke akozo tënë ti e nzoni?
1 Legeoko tongana kete kobe so zo ate ti kono nzara ti lo ti te kobe so aga na peko, mbeni nzoni tënë ti tongo nda ti lisoro ayeke zi lege na nzoni lisoro na ndo ti Bible. Ngoi na ngoi, yongo ti anzoni tënë ti tongo nda ti lisoro nga na atënë ti yâ ni alingbi ti gbian, me legeoko tongana mbeni nzerengo kobe, a hunda lakue ti tene zo agbu li kozoni nga lo leke tere nzoni (aProv. 15:28). Nyen la ayeke sara si atënë ti tongo nda ni ayeke duti nzoni?
2. Tongana nyen la e lingbi ti leke kozo tënë ti lisoro so alingbi ti ndu bê ti azo?
2 Soro atënë so alingbi ti ndu bê ti azo: Akozo tënë ti e alingbi ti pusu azo ti mä e wala ti ke ti sara lisoro na e. Tongaso, na ngoi so e yeke leke tere ti e, a lingbi e pensé na aye so agbu bê ti azo ti yâ ti territoire ti e. Tënë so agbu bê ti azo ni ayeke tënë ti mbeni nzoni ngorogbia, ala ye ti tene sewa ti ala aduti na ngia, wala ala ye ti tene bira ahunzi? Teti so azo mingi aye ka ti fa bango ndo ti ala, leke ambeni hundango tënë so alingbi ti pusu ala ti sara lisoro. Mo lingbi ti sara kusala na mbeni oko ti akode ti akozo tënë ti lisoro so ayeke na yâ ti Kusala ti Royaume na ti sara si a lingbi na azo ti yâ ti territoire ti mo? Ngbanga ti nyen na mbeni ngoi mo soro pëpe ti tara peko ti ambeni kode ti akozo tënë ti lisoro na ngoi ti vorongo Nzapa na yâ ti sewa?
3. Tongana nyen e lingbi ti leke akozo tënë ti e si alingbi na angobo ti sarango ye ti azo ti yâ ti territoire ti e?
3 Bi bê na angobo ti sarango ye nga na aye so angoro fini ti azo ni: Na ambeni ndo, a yeke ku na mbage ti azo so aga na ndo ti amba ti ala ti fa ndani so ala ga na ndo ti azo ni. Me na ambeni ndo, tongana mo gue na ndo ti mbeni zo sân ti hunda nzoni duti ti lo peut-être kozo si mo fa tere ti mo, a bâ ni tongana nengo zo pëpe. Na yâ ti ambeni kodoro, ti hinga bungbi ti nzapa ti azo ni ayeke mû lege na e ti gboto lê ti ala na ndo ti Bible na yâ ti akozo tënë ti e (Kus. 2:14-17). Ye oko, na yâ ti akodoro so azo ni ayeke na yâ ti bungbi ti vorongo nzapa so ayeke ti achrétien pëpe wala ala yeke na yâ ti mbeni bungbi ti vorongo nzapa oko pëpe, alingbi peut-être ti duti nzoni ti fa versê ti Bible na ngoi so e yeke kiri ti peko ti bâ azo ni, ahon ti sara ni na kozo tingbingo tere ti e na ala.—Kus. 17:22-31.
4. Nyen la a lingbi e hinga ni na ngoi so e yeke leke akozo tënë ti tongo nda ti lisoro ti e?
4 Akozo tënë: Leke akozo tënë ti mo nzoni. Mingi ni, atënë so ayeke nduru na akpengba pëpe ayeke nzoni mingi. Lege so e yeke tene na akozo tënë ti e ayeke kota ye mingi. Sara tënë na nzerengo tere. Sara ye na bê ti mo kue nga he ngia kete so afa so mo bibe na zo ni. Ti mû peko ti awango so ayeke sara si e yeke leke akozo tënë so alingbi ti mû maboko na azo ti yâ ti territoire ti e ti duti na nzara ti te ye na “table ti Jéhovah.”—1 aCor. 10:21.