Mû maboko na azo so lê ti ala abuba ti manda ye na ndo ti Jéhovah
1. Tongana nyen la Jésus afa so lo bâ mawa ti ambeni waziba use?
1 Angbâ lani lango mingi ape ti tene Jésus akui. Tongana lo yeke sigigi na yâ ti gbata ti Jéricho, awaziba use so ayeke azo ti iringo ye adekongo na mbage ti lo, ala tene: “Seigneur, sara nzoni bê na e!” Atâa so Jésus ayeke gbu li ti lo na ndo ti ye ti ngangu so ayeke ku lo, lo luti, lo iri akoli ni na lo sara si lê ti ala azi (Mat. 20:29-34). Tongana nyen la e lingbi ti mû tapande ti Jésus ti bâ mawa ti azo so lê ti ala abuba?
2. Tongana nyen la e lingbi ti fa tënë na mbeni zo so lê ti lo abuba na ngoi so e tingbi na lo na ndo so azo ayeke dä mingi?
2 Duti nduru ti mû maboko na ala: Tongana mo tingbi na mbeni zo so lê ti lo abuba peut-être na ndo so azo ayeke dä mingi, fa tere ti mo na lo nga gi ti mû maboko na lo. Mingi ti azo ayeke bâ ka ala na nene ni ape, ye so alingbi ti sara si lo duti na mbeto kete na tongo nda ni. Ye oko, tongana mo sara ye na nzoni bê nga mo fa biani so mo bi bê ti mo na lo ayeke sara si lo gi bê ti lo ape. Girisa ape so fason so lê ti azo ayeke buba na ni ayeke nde nde, tongana mo hinga ni ayeke sara si mo hinga ye so mo lingbi ti sara ti mû maboko na ala nzoni. Na peko ti so mo mû maboko na zo ni awe, fa na lo so mo yeke mû maboko na azo ti tene ala hinga Bible nzoni. Hunda ti diko na lo mbeni versê, na tapande Psaume 146:8 wala Ésaïe 35:5, 6. Tongana lo hinga ti diko Braille, hunda lo eskê lo ye ti wara mbeni mbeti ti e na Braille so ayeke mû ande maboko na lo ti manda ye mingi na ndo ti Bible. Mo lingbi nga ti mû maboko na lo ti wara ambeti na ambeni ye tongana ascénette ti mango ni so ayeke na ndo ti jw.org. Tongana lo yeke na ordinateur so amû lege na lo ti mä ye na ndo ni, a yeke nzere peut-être na lo ti mä dikongo ambeti ti e na ndo ti jw.org nga na ambeni mbeti so apeut ti téléchargé ni na format RTF.—Bâ encadré “Lege ti mû maboko na mbeni zo so lê ti lo abuba . . . ”
3. Tongana nyen la e lingbi ti gi azo so lê ti ala abuba so alango na yâ ti territoire ti e?
3 Gi azo so lê ti ala abuba: A yeke ngangu ti wara azo so lê ti ala abuba na ngoi so e yeke fa tënë da na da ndali ti so ayeke nzere ka na ala pëpe ti sara lisoro na ambeni zo nde so aga na yanga-da ti ala. Ni la, a yeke nzoni ti sara ngangu ti “gi” mara ti azo tongaso ti fa tënë na ala (Mat. 10:11). Lê ti mbeni zo so mo na lo ayeke sara kua ndo oko wala mbeni kamarade ti mo ti ekole abuba? Mû li ni ti sara tënë na lo. Tongana ekole ti azo so lê ti ala abuba ayeke na yâ ti territoire ti mo, hunda ti ga na ambeti ti e ti Braille na azo ti bibliothèque ti ekole ni. Mo hinga mbeni zo so lê ti mbeni fami ti lo abuba? Ambeni bungbi so ayeke mû maboko na azo so lê ti ala abuba ayeke na yâ ti territoire ti mo? Wala mo hinga mbeni ndo so gi azo so lê ti ala abuba la ayeke lango dä? Tene na afami ti lo, mbeni zo ti yambango azo wala wayinda ti ndo ni, so aTémoin ti Jéhovah aye mingi ti mû maboko na azo so lê ti ala abuba, nga hunda ti ga na ala ambeti ti Braille wala ambeni mbeti ti mango ni. Fa na mbeni oko ti azo so, pendere zendo so Nzapa amû ti zi biani biani lê ti azo so abuba. Mo lingbi nga ti fa vidéo so ayeke na ndo ti jw.org so li ni ayeke “Sans elle, je serais perdu,” so asara tënë ti ye so asi na mbeni ita-koli so lê ti lo abuba so lo wara aye ti nzoni ndali ti so lo yeke na Bible ti Braille. Tongana mo fa polele ndani so mo ga ti sara vizite ni, lege ayeke zi na mo ti wara gbâ ti azo so lê ti ala abuba.
4. Nyen la e lingbi ti manda na lege ti tapande ti Janet?
4 Janet mbeni ita-wali so lê ti lo abuba asara vizite na mbeni place so gi azo so lê ti ala abuba la ayeke dä. Lo to nda ti sara lisoro na mbeni maseka-wali. Janet atene na lo so, “Jésus azi lani lê ti awaziba, ye so afa ye so lo yeke sara ande ndali ti azo kue so lê ti ala abuba.” Ala diko Apocalypse 21:3, 4 na Janet afa na lo so Royaume ti Nzapa ayeke sara ande si zendo so aga tâ tënë. Wali ni aduti kpô na pekoni lo tene: “Mbi mä tënë tongaso lâ oko ape na yanga ti mbeni zo so lê ti lo abuba. Mingi ti azo so ayeke bâ ndo apensé so lê ti ambeni zo abuba ndali ti mbeni ye so ala wala akotara ti ala asara ândö.” Janet atokua na maseka-wali ni na lege ti e-mail mbeni ye so alingbi ti mû lege na lo ti wara buku Bible afa nyen na ndo ti site ti e, na fadeso ala yeke sara étude lege use na yâ ti yenga oko.
5. Atâa so e lingbi ti zi pëpe lê ti azo so abuba tongana ti so Jésus asara lani, tongana e fa so e bi bê na ala alingbi ti ga na aye ti nzoni wa?
5 Ti tâ tënë ni, e lingbi pëpe ti zi lê ti azo so abuba tongana ti so Jésus asara lani, me e lingbi ti mû maboko na azo so nzapa ti dunia so avuko bibe ti ala, so na popo ni a yeke wara azo so lê ti ala abuba, ti tene ala mä yâ ti tâ tënë ti Bible (2 aCor. 4:4). Jésus asava akoli use so ayeke nduru na Jéricho ndali ti so “mawa” ti ala asara lo (Mat. 20:34). Tongana e yeke fa mara ti bibe tongaso na mbage ti azo so lê ti ala abuba, e lingbi ti wara ngia ti mû maboko na ambeni zo ti manda ye na ndo ti Jéhovah lo so ayeke hunzi ande tënë ti bubango lê biaku biaku.