Agbakuru so e yeke fa na ye na azo
1. Na lege wa awafango tënë ayeke tongana azo so ahinga kua ti maboko nzoni?
1 Azo so ahinga kua ti maboko nzoni ayeke sara kua na agbakuru nde nde. Atâa so ala yeke sara kua na ambeni gbakuru ni ngoi na ngoi ndali ti so alingbi na akua ni, ambeni gbakuru ni ala yeke sara kua na ni lakue. Azo so ahinga kua ti ala nzoni ayeke zia agbakuru so ala yeke sara kua na ni lakue na yâ ti mbeni caisse, na ayeke ati so ala hinga ti sara kua na ni nzoni mingi. Bible awa e oko oko kue ti tene e sara ngangu ti fa tënë nzoni nga ti duti “mbeni wakua so mbeni ye ti sara kamene na lo ayeke dä pëpe”. (2 Tim. 2:15). Gbakuru wa la e yeke sara kua na ni mingi ti fa na ye na azo? Bible la ayeke kozo gbakuru so e yeke sara kua na ni ti sara si ‘azo aga adisciple.’ (Mat. 28:19, 20). Tongaso, a lingbi e sara ngangu ti ga nzoni wakua so “ahinga ti sara kusala na lege ni na tënë so ayeke tâ tënë.” Me, ambeni gbakuru ni ayeke dä so e yeke sara kua na ni lakue na so a lingbi aita kue amanda ti sara kua na ni nzoni ti fa na tâ tënë na azo.—aProv. 22:29.
2. Akozo gbakuru wa la e yeke sara kua na ni ti fa na ye na azo?
2 Akozo gbakuru so e yeke fa na ye: Nde na Bible, ambeni gbakuru wa a lingbi e sara kua na ni? Kozo gbakuru so e yeke na ni ti manda na Bible na mbeni zo ayeke buku Bible afa nyen biani? Na peko ti so e hunzi kozo buku ni awe, e lingbi ti sara kua na use buku ni so ayeke “Zia ala ngbâ na yâ ti ndoye ti Nzapa” ti fa na lo ti sara ye alingbi na afango ye ti Jéhovah na yâ ti fini ti lo. Tongaso, a lingbi e hinga ti sara kua na abuku use so nzoni. Ambeni brochure ayeke nga dä so e lingbi ti fa na ye na azo. Brochure Nzoni tënë so alondo na Nzapa! ayeke mbeni oko ti agbakuru so e yeke to nda ti manda na Bible na azo. Tongana na yâ ti territoire ti e a wara azo so ahinga ti diko mbeti nzoni ape wala ambeti ti e ayeke mingi ape na yanga ti kodoro ti ala wala mbeti ni ayeke na yanga ti kodoro ti ala ape, e lingbi ti sara kua na abrochure tongana Mä Nzapa wala Mä Nzapa si mo wara fini ti lakue lakue. Mbeni kpengba gbakuru ti mû maboko na azo ti ga na yâ ti bungbi ayeke brochure Azo wa la ayeke sara laso ye so Jéhovah aye? Avidéo alingbi ti mû maboko na e ti sara si azo aga adisciple, na tapande Ndani nyen ti manda Bible?, E yeke sara abungbi ti e tongana nyen?, nga na Dieu a-t-il un nom ? ayeke agbakuru so a lingbi e manda ti sara kua na ni nzoni.
3. Ambeni article ti Kusala ti Royaume ayeke mû ande maboko na e ti sara nyen?
3 Ambeni article ti Kusala ti Royaume ayeke mû ande maboko na e ti sara kua nzoni na ambeti so e yeke fa na ye na azo. Tongana e yeke sara kua nzoni na agbakuru so, e yeke sara ande ye alingbi na wango so atene: “Mo sara hange lakue na aye so abâ mo nga na fango ye ti mo. Mo ngbâ gi dä, teti na sarango tongaso fade mo yeke sö ande mo wani nga na ala so ayeke mä mo.”—1 Tim. 4:16.