Lege ti sara kua na aye ti mango ni so ayeke na ndo ti site ti e
1. Na ndo ti ambeti so e yeke na ni, mbeni pendere ye wa la e yeke na ni encore?
1 Anzere na azo mingi ti gue na ndo ti site jw.org ti diko atënë so anzere na zo nga so ayeke tâ tënë (Zo-ti. 12:12). Me, eskê mo yeke sara kua na ati so ayeke ti mango ni so? A yeke mû lege na mo ti mä gbâ ti asango so ayeke na ndo ti site ti e. Tongana nyen la e lingbi ti wara ye ti nzoni dä?
2. Tongana nyen la e lingbi ti sara kua na aye ti mango ni ndali ti mandango ye e wani wala na sewa?
2 Ndali ti mandango ye e wani wala na sewa: Na ngoi so e yeke na voyage wala e yeke sara akua ti e ti lâ oko oko, tongana e mä dikongo Bible, apériodique, wala ambeni mbeti ti e so a-enregistré ni alingbi ti mû maboko na e ti sara kua nzoni na ngoi ti e (aÉph. 5:15, 16). E lingbi ti sara kua na aye nde nde na ngoi ti vorongo Nzapa na yâ ti sewa, na tapande, e lingbi ti zia aye ti mango ni na ti mû peko ni na yâ ti mbeti ti e na ngoi so go ti zo ni ayeke toto. Ti sara kua na aye ti mango ni na ngoi ti mandango ye e wani ayeke mû maboko na e mingi ti maï kode ti dikongo ye ti e wala tongana e yeke manda mbeni yanga ti kodoro nde.
3. Azo wa la na yâ ti territoire ti e alingbi ti wara aye ti nzoni na lege ti aye ti mango ni so ayeke na ndo ti site ti e?
3 Ndali ti fango tënë: Azo ti territoire ti e so abâ so ala yeke na ngoi ti diko mbeti ape alingbi peut-être ti duti nduru ti mä aye ti mango ni. E lingbi nga ti wara ambeni zo so atene mbeni yanga ti kodoro nde na so apeut ti yeda na tënë ti Royaume tongana fade ala mä ni na ‘yanga ti kodoro so a dü ala dä.’ (Kus. 2:6-8). Na yâ ti angobo ti ambeni kodoro, a yeke fa ye na zo mingi ni gi na yanga. Na tapande, na yâ ti ngobo ti aHmong, ala yeke fa peko ti ambaï ti kodoro ti ala na amolenge ti ala gi na yanga, na amolenge ni ayeke bata ambaï ni so pendere mingi. Mingi ti azo ti kodoro ti Afrika aye ti manda ye na lege ti ambaï wala atere.
4. Ahundango tënë wa la e lingbi ti hunda na tere ti e na ndo ti azo so e yeke mû maboko na ala na territoire?
4 Na yâ ti territoire ti mo, eskê mo bâ so ayeke nzoni ti zia mbeni ye ti mango ni na mbeni zo so ayeke tene mbeni yanga ti kodoro nde? Eskê ambeni zo alingbi ti wara ye ti nzoni na lege ti ambeti ti e ti mango ni tongana e tokua ni na zo ni na lege ti e-mail? Eskê e lingbi ti téléchargé mbeni mbeti ti mango ni na ndo ti CD na ti mû ni na mbeni zo so tënë ni anzere na lo, peut-être ti zia nga vrai mbeti ni na tere ni na lo? Lakue tongana e mû na mbeni zo mbeni mbeti so e téléchargé ni kue, na tapande buku, brochure, périodique wala tract e lingbi ti diko ni na popo ti ambeti so e zia na azo. A sigigi na aye ti mango ni ti tene amû maboko na e na ngoi ti mandango ye e wani me nga ti tene e lu na ngongoa ti tâ tënë ti Royaume.—1 aCor. 3:6.