Fa tâ tënë

Na tongo nda ti nze ti septembre, a yeke wara ande mbeni fini kode ti fango na tënë na yâ ti Mbeti ti Bungbi—Kusala ti e nga na gigi ti e ti Chrétien so iri ni ayeke “Fa tâ tënë.” Ye so e ye ayeke ti fa mbeni kozo tâ tënë ti Bible, na sarango kua na mbeni hundango tënë nga na mbeni versê.

Tongana e bâ so zo ni ayeda na tënë ni, e lingbi ti leke bê ti lo hio ndali ti vizite ti peko na ziango na lo mbeni mbeti wala mbeni vidéo so ayeke na ndo ti site jw.org. A lingbi e kiri hio ti bâ lo ti hunzi tanga ti lisoro so e sara lani. Afini kode ti fango na tënë nga na adevoir ti a-élève ayeke aluti ande na ndo ti atënë ti yâ ti buku Bible afa nyen biani? Na yâ ti a-encadré so ayeke na hunzingo ti achapitre ti buku ni, e lingbi ti wara nga ambeni versê so alingbi ti mû maboko na e ti kiri ti sara avizite wala étude na sarango kua gi na Bible.

Lege so ague na fini ayeke gi oko (Mt 7:13, 14). Teti so e yeke fa tënë na azo ti abungbi ti vorongo nzapa nga na azo ti amara, a lingbi e fa atâ tënë ti Bible so alingbi ti ndu bê ti ala oko oko (1Tm 2:4). Tongana e sara lisoro mingi na azo na ndo ti atënë nde nde ti Bible nga e maï akode ti e ti “sara kusala na lege ni na tënë so ayeke tâ tënë,” ngia ti e ayeke ga ande mingi, nga e yeke wara lege ti fa tâ tënë nzoni na azo.—2Tm 2:15.