Eskê Nzapa ayeke mä asambela ti e?

NZAPA AYEKE MÄ MO.

“Mo so mo yeke mä sambela, mara ti azo nde nde kue ayeke ga ande na mbage ti mo.”​—Psaume 65:2.

Ambeni zo ayeke sambela ndali ti so ala bâ so asara si ala duti nzoni, atâa so ala pensé so mbeni zo ayeke mä nga ni ape. Me sambela ayeke pëpe mbeni ye so e yeke tene ni gï tongaso ti sentir terê ti e bien. Bible atene na e so “Jéhovaha ayeke nduru na azo kue so ayeke iri lo, azo kue so ayeke iri lo na bê ti ala kue. . . . lo mä toto so ala toto na lo ti mû maboko na ala.”—Psaume 145:18, 19.

Tongaso, e peut ti duti sûr so Jéhovah Nzapa ayeke mä asambela ti awakua ti lo. Na ndoye lo tene: “Ala yeke iri mbi ande nga ala yeke ga ti sambela mbi, na mbi yeke mä ala.”—Jérémie 29:12.

NZAPA AYE SI MO SAMBELA LO.

“Ala ngbâ lakue ti sambela.”​—aRomain 12:12.

Na yâ ti Bible, a wa e ti “ngbâ ti sambela lakue” nga ti “ngbâ ti sambela na ngoi kue”. A yeke polele so, Jéhovah Nzapa aye si e sambela lo.​—Matthieu 26:41; aÉphésien 6:18.

Ngbanga ti nyen la Nzapa aye ti tene e sambela lo? Gbu li na ndö ti ye so: A yeke nzere ka na mbeni babâ tongana molenge ti lo ahunda na lo ti aidé lo, ni la ape? A yeke tâ tënë so mbeni babâ apeut ti hinga ye so molenge ti lo ayeke na bezoin ni; me tongana lo mä molenge ti lo so ahunda na lo ti aidé lo, a yeke fa na lo so molenge ni asara confiance na lo nga lo na lo ayeke akamarade. Legeoko nga, tongana e sambela Jéhovah Nzapa, e yeke fa na lo so e sara confiance na lo nga e ye ti ga kamarade ti lo.—aProverbe 15:8; Jacques 4:8.

NZAPA AYEKE PENSÉ BIANI NA MO.

“Ala mû agingo bê ti ala kue ala bi ni na ndö ti lo, ngbanga ti so lo yeke bi bê ti lo na ndö ti ala.”​—1 Pierre 5:7.

Nzapa aye ti tene e sambela lo ndali ti so lo ye e nga lo pensé na e. Lo hinga ye kue na ndö ti akpale ti e nga na agingo bê ti e, na lo ye ti aidé e.

Na yâ ti gigi ti Gbia David, lo sambela Jéhovah Nzapa ti aidé lo nga lo fa na Nzapa atënë ti bê ti lo (Psaume 23:1-6). Nzapa abâ lani David tongana nyen? Nzapa aye David nga lo mä asambela ti lo (Kusala 13:22). Legeoko nga, Nzapa ayeke mä asambela ti e ndali ti so lo yeke pensé na e.

“MBI YE JÉHOVAH, NDALI TI SO LO MÄ GO TI MBI”

So ayeke atënë ti mbeni zo ti sungo Psaume. Lo hinga lani so Nzapa ayeke mä asambela ti lo, na a aidé lo mingi. Lo bâ lani so lo yeke nduru na Nzapa nga lo wara ngangu ti hon ndö ti akpale so lo tingbi na ni.—Psaume 116:1-9.

Tongana e yeke sûr so Nzapa ayeke mä asambela ti e, e yeke ngbâ ande ti sambela lo lakue. Bâ ye so asi na Pedro, so avivre na Espagne. Molenge ti lo ti koli ti ngu 19 akui lani na yâ ti mbeni accident. Pedro afa atënë ti bê ti lo na Nzapa nga fani mingi lo sambela Nzapa ti dë bê ti lo nga ti aidé lo. Nyen la asi na pekoni? Lo tene: “Jéhovah akiri tënë na asambela ti mbi na lege ti wali ti mbi nga na amba ti mbi wamabe so adë bê ti mbi nga a-aidé mbi.”

Asambela ni a-aidé lo na sewa ti lo mingi, atâa so a kiri na molenge ti lo ni na fini ape. Wali ti lo Maria Carmen atene: “Sambela a-aidé mbi ti hon ndö ti vundu ti mbi. Mbi hinga so Jéhovah acomprendre mbi, ndali ti so na temps so mbi sambela lo, mbi wara siriri ti bê.”

Atënë so Bible atene nga na aye so asi na azo afa polele so Nzapa ayeke mä asambela. Me, asambela kue la Nzapa ayeke kiri tënë na ni ape. Ngbanga ti nyen la Nzapa ayeke kiri na ambeni me ti ambeni lo kiri tënë na ni ape?