Sambela apeut ti aidé mo tongana nyen?

Mbeni wali so iri ti lo ayeke Pamela ayeke lani na kobela ti cancer na lo gue lo bâ adocteur ti fa na lo aye so lo doit ti sara. Me na mbage, lo hunda nga na Nzapa ti aidé lo ti gbu ngangu na yâ ti kpale ni so. Eskê sambela a-aidé lo?

Pamela atene: “Na ngoi so a yeke sara lani na mbi traitement ti cancer ni, mbeto asara mbi ngangu. Me na temps mbi sambela, bê ti mbi adë na mbi gbu ngangu na yâ ti kpale ni so. Laso mbi ngbâ lakue ti sentir ambeni douleur. Me sambela a-aidé mbi ti ngbâ lakue ti duti na nzoni bango ndo. Tongana azo ahunda mbi wala mbi yeke nzoni, mbi yeke tene: ‘Terê ti mbi angbâ ti son, me mbi yeke na ngia!’”

A yeke vrai so, e doit pëpe ti ku juska e wara mbeni ngangu kpale awe si e sambela. E kue e yeke tingbi na akpale, atâa kete ni wala kota ni, na fani mingi e bezoin mungo maboko. Eskê sambela apeut ti aidé e?

Bible atene: “Aye so ane mo, mo bi ni na ndö ti Jéhovah, na lo yeke mû ngangu na mo. Lo yeke zia lâ oko pëpe si zo ti mbilimbili atï.” (Psaume 55:22). Tënë so adë bê ti zo, ni la ape? Tongaso, tongana nyen la sambela apeut ti aidé mo? Tongana mo sambela Nzapa na tâ nzoni lege ni, lo yeke mû ande na mo ye so mo bezoin ni ti hon ndö ti akpale ti mo.—Bâ encadré “Aye ti nzoni so mo peut ti wara grâce na sambela.

Aye ti nzoni so mo peut ti wara grâce na sambela

Siriri ti bê

“Ala hunda na Nzapa aye so agbu bê ti ala, na fade siriri ti Nzapa so ahon ndö ti bibe kue ayeke bata bê ti ala nga na lege ti hingango ndo ti ala na lege ti Christ Jésus.” (aPhilippien 4:6, 7). Tongana mo zi bê ti mo na Nzapa, lo yeke aidé ande mo ti duti kpô nga ti sara ye na ndara tongana agingo bê ahon ndö ti mo.

Ndara so alondo na Nzapa

“Tongana ndara amanke mbeni zo na popo ti ala, zia lo ngbâ ti hunda ni na Nzapa, ngbanga ti so Nzapa ayeke mû ye mingi na azo kue na lo yeke suku ndali ni pëpe; na a yeke mû ni na lo.” (Jacques 1:5). Tongana e tingbi na ambeni kpale, a yeke si so e yeke mû ka asioni desizion. Tongana e sambela Nzapa ti mû na e ndara, lo peut ti sara si e rappelé na amama-ndia ti Bible so alingbi ti aidé e.

Ngangu nga na dengo bê

“Mbi wara ngangu ti sara aye kue ndali ti lo so lo mû ngangu ni na mbi.” (aPhilippien 4:13). So Jéhovah ayeke Nzapa so ngangu ti lo ahon angangu kue, lo peut ti mû na mo ngangu ti leke akpale ti mo wala ti gbu ngangu na yâ ni (Ésaïe 40:29). Bible atene nga so Jéhovah ayeke “Nzapa ti dengo bê kue.” Lo peut ti dë bê ti e “na yâ ti atara kue so e wara.”—2 aCorinthien 1:3, 4.

SAMBELA NZAPA!

A yeke vrai so, Jéhovah aforcé e ape ti sambela lo. Me na ndoye, lo hunda na e ti sara ni (Jérémie 29:11, 12). Ka tongana asi na mo awe ti bâ so Nzapa akiri tënë na asambela ti mo ape? Découragé ape. A peut ti si so, ababâ na amama so andoye amolenge ti ala a-aidé pëpe amolenge ti ala ni tâ gï na ngoi wala na lege so amolenge ni aye fade. Peut-être ababâ na amama ni ayeke na mbeni nzoni solution. Me ye so e hinga ayeke so, ababâ na amama ti ndoye ayeke aidé amolenge ti ala.

Jéhovah Nzapa, Babâ so ayeke nzoni ahon atanga ni kue, aye ti aidé e. Tongana mo gbu li nzoni na ndö ti awango kue so e sara tënë na ndö ni nga mo sara kue ti sara ye alingbi na ni, lo yeke kiri ande tënë na asambela ti mo na lege so alingbi na ni!—Psaume 34:15; Matthieu 7:7-11.