Nyen la ayeke fa lege biani na gigi ti mo ti kekereke?

AYE SO MINGI TI AZO AMÄ NA BÊ NA NI

GINGO NDA TI AYE NA LEGE TI ATONGORO: Ambeni zo amä na bê so position so atongoro ayeke na ni na temps so a dü na mbeni zo la ayeke fa ye na ndö ti gigi ti lo ti kekereke. Ala yeke gi nda ti aye na lege ti ahoroscope ti hinga ye so ayeke si na ala kekereke nga ti aidé ala ti mû adesizion.

FENG SHUI: Ambeni amä na bê so fason so ala yeke leke na ada ti ala wala aye so ala zia na yâ ni la ayeke sara si aye ti ala amaï. Lo Wing,a so ayeke na Hong Kong, atene: “Mbeni maître ti feng shui atene na mbi so tongana mbi zia mbeni cristal so ayeke nde na mbeni place na yâ ti magazin ti mbi ayeke aidé mbi ti wara gbâ ti nginza.”

VORONGO AKOTARA: Ti ambeni, ala mä na bê so ala doit ti voro akotara ti ala so akui wala anzapa nde nde ti tene abata ala nga asara tufa na ndö ti ala. Van, so ayeke mbeni wali na Vietnam, atene: “Mbi mä na bê lani so ti voro akotara ti mbi asara si mbi vivre nzoni laso nga kekereke ti mbi na amolenge ti mbi ayeke ga nzoni.”

KIRINGO TI ÂME NA YÂ TI MBENI TERÊ NDE: Mingi ti azo amä na bê so tongana zo akui, a yeke kiri ti dü lo. Ala mä na bê so aye ti nzoni na ti sioni so asi na ala laso ayeke ndali ti aye so ala sara na yâ ti gigi ti ala ândö.

Atâa so ambeni zo amä na bê na aye so ape, me ala ngbâ ti sara aye tongana bingo zeke, dikongo acarte, dikongo ye na yâ ti maboko ti zo, ahoroscope nga na bango mbadi. Ala pensé so asarango ye tongaso la apeut ti aidé ala ti hinga gigi ti ala ti kekereke.

ESKÊ ASARANGO YE SO AGA NA AYE TI NZONI NA PEKO NI?

Eskê azo so asara confiance na aye ni so gigi ti ala aga nzoni?

Bâ ye so asi na Hào, mbeni koli so ayeke na Vietnam. Lo sara kua lani na gingo nda ti ye na lege ti atongoro, feng shui, nga na vorongo akotara ti fa lege na lo. Eskê lo wara ye ti nzoni dä? Hào atene: “Mbi tï lani na yâ ti affaire so mbi sara, mbi sara bon, akpale ayeke na yâ ti sewa ti mbi nga gingo bê ahon ndö ti mbi.”

Qiuming, mbeni koli na Taïwan, amä na bê nga lani na gingo nda ti ye na lege ti atongoro, kiringo ti âme na yâ ti mbeni terê nde, tënë ti destin, feng shui nga na vorongo akotara. Na peko ti so lo gbu li nzoni na ndö ti aye so lo mä na bê na ni, lo tene: “Mbi ga ti bâ so asarango ye ni so nga na angobo so atënë ni ague oko ape asara si li ti mbi aga kirikiri. Mbi bâ so gingo nda ti ye na lege ti atongoro ayeke marché ape. Tongana mbeni zo apeut ti rappelé ape na aye so apassé ândö, tongana nyen la lo peut ti sara achangement tongana a kiri a dü lo?”

Tongana ti Hào, Qiuming nga na mingi ti ambeni zo, ala ga ti bâ so, gigi ti e ti kekereke adépend ape na tënë ti destin, ti atongoro, ti akotara wala ti kiri ti dü mbeni zo. Eskê aye ti tene so e peut ti sara ye oko ape ndali ti gigi ti e ti kekereke?

Mingi ti azo apensé so mandango mbeti ayo nga na gingo mosoro la ayeke sara si ala wara mbeni nzoni gigi ti kekereke. Azo so amû desizion ni so, nyen la ala wara na peko ni?