Aye so e lingbi ti manda na lege ti “disciple so Jésus andoye lo mingi”

1. Ndoye ti Nzapa asara si mo duti tongana nyen?

BAZENGELE JEAN atene: “Nzapa ayeke ndoye.” (1 Jean 4:8). Nduru tënë so adabe ti e na mbeni kpengba tâ tënë: Nzapa so fini alondo na lo, lo yeke nga lo so ndoye alondo na lo. Jéhovah andoye e. Ndoye ti lo asara si e duti nzoni nga e yeke na ngia.

2. Ti gue oko na Matthieu 22:37-40, acommandement use wa la ayeke kota mingi? Ngbanga ti nyen la a lingbi ti duti kete ye na e ape ti sara ye alingbi na use ni?

² A-Chrétien adoit ti ndoye azo. A yeke mbeni commandement. (Diko Matthieu 22:37-40.) Tongana e hinga Jéhovah nzoni, a yeke duti ngangu na e ape ti sara ye alingbi na kozo commandement ni. A yeke ndali ti so Jéhovah ayeke mbilimbili-kue; lo yeke pensé na e nga lo yeke sara ye na e na nzoni bê. Me a lingbi ti duti ngangu na e ti sara ye alingbi na use commandement ni. Ngbanga ti nyen? Ngbanga ti so aita ti e, so ayeke ambeni mba ti e so Bible asara tënë ti ala ge, ayeke mbilimbili-kue ape. Na ambeni ngoi, ala lingbi ti tene mbeni tënë wala ti sara mbeni ye na e so asara si e bâ so ala pensé na e ape nga ala sara ye na e na nzoni bê ape. Jéhovah ahinga so a yeke duti kete ye na e ape ti sara ye alingbi na use commandement so, ni la lo pusu ambeni zo so asû Bible ti fa na e ndani so a yeke kota ye ti sara ye na ndoye na popo ti e nga tongana nyen ti sara ni. Mbeni zo ni ayeke Jean.—1 Jean 3:11, 12.

3. Jean atene nyen na ndö ti ndoye?

³ Na yâ ti ambeti so Jean asû, fani mingi lo tene so a lingbi aChrétien andoye azo. Na yâ ti mbeti ti Bible so Jean asû so asara tënë na ndö ti mbaï ti fini ti Jésus, lo sara kua na tënë “ndoye” fani mingi ahon ati so Matthieu, Marc na Luc asû. Jean ayeke lani na ngu ngbangbo oko tongaso na ngoi so lo sû Évangile ti lo nga na alettre ti lo ota. Ambeti ti Bible so afa na e so aye kue so e sara, ndoye la adoit ti pusu e ti sara ni (1 Jean 4:10, 11). Ye oko, ti tene Jean ahinga ye so, a mû lani ngoi.

4. Eskê lakue la Jean andoye lani azo?

⁴ Na ngoi so Jean ade lani maseka, lakue la lo sara ye na ndoye ape. Na tapande, mbeni lâ Jésus na adisciple ti lo ayeke hon na yâ ti Samarie ti gue na Jérusalem. Azo ti mbeni kete kodro na Samarie ake ti yamba ala. Jean asara ye lani tongana nyen? Lo hunda ti tene lo iri wâ alondo na yayu adescend afuti azo ti kete kodro ni kue (Luc 9:52-56). Na mbeni ngoi nde, Jean asara ye na ndoye ape na mbage ti amba ti lo abazengele. Na bango ni, lo na ita ti lo apusu mama ti ala ti hunda Jésus ti mû na ala kota ndo na terê ti lo na yâ ti Royaume. Na ngoi so tanga ti abazengele ni ahinga ye so Jacques na Jean asara, bê ti ala ason ngangu (Mat. 20:20, 21, 24). Me atâa so Jean asara afaute so kue, Jésus aye lo.—Jean 21:7.

5. Nyen la e yeke bâ na yâ ti article so?

⁵ Na yâ ti article so, e yeke sara tënë na ndö ti tapande ti Jean nga na ambeni tënë so lo tene na ndö ti ndoye. Na ngoi so e yeke sara tënë na ndö ti aye so, e yeke bâ tongana nyen la e lingbi ti ndoye aita ti e. E yeke bâ nga mbeni kpengba lege so mbeni mokonzi ti sewa alingbi ti fa so lo ndoye azo ti sewa ti lo.

AYE SO ZO ASARA LA AFA SO LO YEKE NA NDOYE

6. Nyen la Jéhovah asara ti fa so lo ye e?

⁶ Peut-être e pensé so ti ndoye azo, a lingbi e duti gï na anzoni pensé na ndö ti ala wala e tene anzoni tënë na ala. Me tongana e ye ala biani, a lingbi e fa ni na lege ti asarango ye ti e. (Bâ Jacques 2:17, 26.) Na tapande, Jéhovah andoye e (1 Jean 4:19). Lo fa ni na lege ti apendere tënë so ayeke na yâ ti Bible (Ps. 25:10; aRom. 8:38, 39). Me e hinga so Nzapa aye e na lege ti atënë so lo tene nga na aye so lo sara. Jean atene: “A bâ ndoye ti Nzapa na mbage ti e na lege so: Nzapa atokua lani oko Molenge ti lo na dunia so si e lingbi ti wara fini na lege ti lo.” (1 Jean 4:9). Jéhovah azia si Molenge ti lo so lo ye lo mingi abâ pasi nga akui ndali ti e (Jean 3:16). Tongaso, e hinga na bê ti e kue so Jéhovah andoye e.

7. Nyen la Jésus asara ti fa so lo ye e?

⁷ Jésus atene lani na adisciple ti lo so lo ye ala mingi (Jean 13:1; 15:15). Lo fa so lo ye ala mingi na lege ti atënë so lo tene nga na aye so lo sara. Jésus atene: “Tongana mbeni zo akä fini ti lo na kuâ ndali ti akamarade ti lo, mbeni ndoye ti hon so ayeke dä pëpe.” (Jean 15:13). Tongana e gbu li na ndö ti ye so Jéhovah na Jésus asara ndali ti e, a doit ti pusu e ti sara nyen?

8. Kozo mbeti ti Jean 3:18 ahunda na e ti sara nyen?

⁸ E yeke fa so e ye Jéhovah na Jésus tongana e mä yanga ti ala (Jean 14:15; 1 Jean 5:3). Jésus ahunda na e ti ndoye amba ti e (Jean 13:34, 35). A lingbi e tene na aita ti e so e ye ala, me e doit nga ti fa ni na lege ti asarango ye ti e (Diko 1 Jean 3:18.) Ambeni ye wa la e lingbi ti sara ti fa so e ye ala?

NDOYE AITA TI MO

9. Ndoye apusu lani Jean ti sara nyen?

⁹ Jean alingbi lani ti ngbâ na terê ti babâ ti lo na ti wara nginza na lege ti kua ti gingo susu so sewa ti lo ayeke sara. Me lo mû tanga ti fini ti lo kue ti mû maboko na azo ti hinga tâ tënë na ndö ti Jéhovah na Jésus. Fason so Jean asoro ti vivre na ni ayeke lani kete ye ape. A sara aye ti ngangu na lo nga a gbu lo a gue na lo na kodro-wande nduru na hunzingo ti ngu 100, na ngoi so lo ga mbakoro awe (Kus. 3:1; 4:1-3; 5:18; Apoc. 1:9). Même na ngoi so Jean ayeke na kanga ndali ti so lo yeke fa tënë na ndö ti Jésus, lo fa so lo yeke pensé na amba ti lo. Na tapande, na ngoi so lo yeke na ndö ti zoa ti Patmos, lo sû mbeti ti Apocalypse lo tokua ni na acongrégation, tongaso si ala hinga “aye so aga nduru ti si awe.” (Apoc. 1:1). Peut-être na peko ti so a zi Jean na ndö ti zoa ti Patmos awe la, lo sû Évangile ti lo na ndö ti fini ti Jésus nga na kua ti lo fango ti tënë. Lo sû nga alettre ota ti dë bê ti aita ti lo nga ti kpengba ala. Tongana nyen la mo lingbi ti sara asacrifice na yâ ti fini ti mo ndali ti amba ti mo tongana ti Jean?

10. Tongana nyen la mo lingbi ti fa so mo ndoye azo?

¹⁰ Mo lingbi ti fa so mo ndoye azo na lege ti aye so mo soro ti sara na yâ ti fini ti mo. Dunia ti Satan aye ti tene mo pensé gï na mo wani nga mo sara aye gï ndali ti nzoni ti mo wani, mo gi ti wara gbâ ti nginza wala mo ga zo so iri ti lo awu. Me aChrétien na yâ ti dunia kue ayeke sara kue ti mû ngoi ti ala ti fa nzoni tënë nga ti mû maboko na azo ti ga nduru na Jéhovah. Ambeni awara même lege ti fa tënë nga ti fa ye na ngoi kue.

11. Tongana nyen la awafango tënë mingi so ayeke be-ta-zo afa so ala ndoye Jéhovah nga na aita ti ala?

¹¹ A-Chrétien mingi so ayeke be-ta-zo adoit ti mû ngoi mingi ti sara kua ti nginza, tongaso si ala na azo ti sewa ti ala awara aye so ala bezoin ni. Atâa so kue, ala yeke sara ye kue so ala lingbi ti sara ti mû maboko na bungbi ti Jéhovah. Na tapande, ambeni awara lege ti mû maboko na aita na peko ti mbeni kota kpale, ambeni alingbi ti sara kua na construction nga aChrétien kue alingbi ti mû nginza ndali ti kua ti fango tënë na yâ ti dunia kue. Ala sara aye so kue ndali ti so ala ye Nzapa nga na amba ti ala. Yenga oko oko, e yeke fa so e ye aita ti e na lege so e gue na abungbi nga e mû mbage dä. Atâa so peut-être e fatigué, e yeke gue na abungbi. Atâa so peut-être mbeto asara e, e yeke mû commentaire. Atâa so e kue e yeke na akpale, e yeke kpengba mba kozo na bungbi nga na pekoni (aHéb. 10:24, 25). E kiri singila mingi na aita ti e ndali ti akua so ala sara.

12. Mbeni lege so Jean afa so lo ye aita ti lo ayeke so wa?

¹² Jean afa so lo ye aita ti lo na lege so lo gonda ala nga lo mû wango na ala. Na tapande, na yâ ti alettre ti Jean, lo gonda aita ti lo ndali ti mabe ti ala nga na anzoni kua so ala sara, me lo mû nga wango na ala polele na ndö ti siokpari (1 Jean 1:8–2:1, 13, 14). Legeoko nga, a lingbi e gonda aita ti e ndali ti anzoni ye so ala sara. Me tongana mbeni ita akomanse ti maï mbeni sioni bango ndo wala mbeni sioni sarango ye, e lingbi ti fa so e ye lo na lege so, na nzoni bê, e tene na lo tënë so alingbi ti mû maboko na lo. A lingbi e sara ye na mbeto ape si e mû wango na mbeni kamarade ti e, me Bible atene so atâ kamarade ayeke sara si lê ti amba ti ala azi, wala ala yeke kiri na mba na nzoni lege.—aProv. 27:17.

13. Nyen la a lingbi e sara ape?

¹³ Na ambeni ngoi, e yeke fa so e ye aita ti e na lege ti aye so e ke ti sara. Na tapande, bê ti e ayeke son hio ape ndali ti mbeni tënë so ala tene. Gbu li na ndö ti mbeni ye so asi ngoi mingi ape kozo na kuâ ti Jésus. Lo tene na adisciple ti lo so ti wara fini, a lingbi ala te nyama ti terê ti lo nga ala nyon mênë ti lo (Jean 6:53-57). Tënë ti Jésus so anzere na gbâ ti adisciple ti lo ape, tongaso gbâ ti ala azia ti mû peko ti lo, me atâ kamarade ti lo, so Jean ayeke na popo ti ala, angbâ lani na terê ti lo. Ala mä lani yâ ti tënë ti Jésus so ape, nga peut-être li ti ala akpe so ala mä ni. Me akamarade ti Jésus so ayeke be-ta-zo apensé lani ape so tënë so lo tene ayeke sioni nga bê ti ala ason ndali ni ape. Ala sara confiance na lo ndali ti so ala hinga so lo tene tâ tënë (Jean 6:60, 66-69). A yeke kota ye ti tene bê ti e ason hio ape ndali ti tënë so akamarade ti e atene. Me e yeke zia lege na ala ti fa na e polele nda ti tënë so ala ye ti tene.—aProv. 18:13; Zo-ti. 7:9.

14. Ngbanga ti nyen la a lingbi e ke aita ti e ape?

¹⁴ Jean awa nga e ti ke aita ti e ape. Tongana e sara ye alingbi na wango so ape, Satan alingbi ti pusu e ti sara ye so lo ye (1 Jean 2:11; 3:15). Ye so asi lani na ambeni kozo Chrétien. Satan asara lani kue ti tene awakua ti Nzapa ake terê nga yâ ti ala akangbi. Na ngoi so Jean asû alettre ti lo, akoli so ayeke na oko pensé ti Satan alï na yâ ti congrégation. Na tapande, Diotrèphe aga na kota kangbi na yâ ti mbeni congrégation (3 Jean 9, 10). Lo ne lani pëpe aita so aga na iri ti bebungbi. Lo gi même lani ti bi na gigi ti congrégation azo so ayamba azo so lo ke ala. So sarango ye na fandara! Laso, Satan angbâ ti sara kue ti kangbi yâ ti awakua ti Nzapa nga ti sö benda na ndö ti ala. E zia lâ oko ape si kengo zo asara si yâ ti e akangbi.

NDOYE AZO TI SEWA TI MO

15. Nyen la a lingbi mbeni mokonzi ti sewa agirisa ape?

¹⁵ Mbeni kpengba ye so mbeni mokonzi ti sewa ayeke sara ti fa so lo ye azo ti sewa ti lo ayeke ti mû na ala aye so ala bezoin ni (1 Tim. 5:8). Ye oko, a lingbi lo girisa ape so aye ti mitele alingbi pëpe ti mû maboko na azo ti sewa ti lo ti duti na nzoni songo na Jéhovah (Mat. 5:3). Gbu li na ndö ti nzoni tapande so Jésus azia na amokonzi ti sewa. Mbeti ti Jean afa na e so na ngoi so Jésus ayeke gue lani ti kui na ndö ti keke ti pasi, lo ngbâ lani ti pensé na azo ti sewa ti lo. Jean aluti lani na terê ti Marie, mama ti Jésus, na ndo so a yeke fâ Jésus dä. Atâa so Jésus ayeke na yâ ti ngangu pasi, lo hunda na Jean ti bâ lege ti Marie (Jean 19:26, 27). Jésus ayeke lani na aita so ayeke sara kue ti mû na Marie aye so lo yeke na bezoin ni, me na bango ni, zo oko na popo ti ala ade aga disciple ti Jésus ape. Ndani la, Jésus aye lani ti sara kue ti tene mbeni zo aduti dä ti bâ lege ti Marie nga ti kpengba lo ti ngbâ ti sara na Jéhovah.

16. Akota kua wa la Jean ayeke lani na ni?

¹⁶ Jean ayeke lani na akua mingi. So lo yeke lani mbeni bazengele, lo mû li ni na kua ti fango tënë. Peut-être lo yeke lani na wali, tongaso lo doit ti bâ lege ti azo ti sewa ti lo nga ti mû maboko na ala ti duti na nzoni songo na Nzapa (1 aCor. 9:5). Nyen la amokonzi ti sewa alingbi ti manda dä laso?

17. Ngbanga ti nyen la a yeke kota ye ti tene mbeni mokonzi ti sewa amû maboko na azo ti sewa ti lo ti duti na nzoni songo na Nzapa?

¹⁷ Mbeni ita-koli so ayeke mokonzi ti sewa ayeke peut-être na akota kua ti sara. Na tapande, a lingbi lo sara kua ngangu na place ti kua ti lo, tongaso si lo mû gonda na Jéhovah (aÉph. 6:5, 6; Tite 2:9, 10). Peut-être lo yeke na akua na yâ ti congrégation, na tapande ti sara vizite na aita ti kpengba ala nga ti mû li ni na kua ti fango tënë. A yeke nga kota ye ti tene lo na wali ti lo nga na amolenge amanda Bible lakue. Ala yeke kiri singila mingi na lo ndali ti aye kue so lo yeke sara ti tene ala duti na nzoni seni, ala duti na ngia nga ala ngbâ ti sara na Jéhovah.—aÉph. 5:28, 29; 6:4.

‘ALA NGBÂ NA YÂ TI NDOYE TI MBI’

18. Nyen la Jean ahinga ni lani biani?

¹⁸ Jean ate lani gigi aninga, anzoni ye mingi asi na yâ ti fini ti lo. Lo wara nga lani akpale nde nde so a lingbi ti woko mabe ti lo. Me lo sara lani kue ti sara ye alingbi na acommandement ti Jésus, na tapande, ti ndoye aita ti lo. Ndani la, Jean ahinga lani biani so Jéhovah na Jésus aye lo nga ala yeke mû na lo ngangu ti hon ndö ti atara kue so lo wara (Jean 14:15-17; 15:10; 1 Jean 4:16). Satan na dunia ti lo alingbi lani pëpe ti kanga lege na Jean ti ndoye aita ti lo nga ti fa ni na lege ti atënë ti lo nga na asarango ye ti lo.

19. Nyen la 1 Jean 4:7 awa e ti sara? Ngbanga ti nyen?

¹⁹ Legeoko tongana Jean, e yeke na yâ ti mbeni dunia so Satan, so aye zo oko ape, la ayeke komande na ndö ni (1 Jean 3:1, 10). Atâa so Satan aye ti kanga lege na e ti ye aita ti e, lo lingbi ti sara ni gï tongana e zia lege na lo si. Zia e leke na bê ti e ti ngbâ ti ye aita ti e, ti fa na lege ti atënë ti yanga ti e nga na asarango ye ti e so e ye ala. Tongana e sara ni, e yeke duti na ngia ti duti na yâ ti sewa ti Jéhovah nga gigi ti e ayeke nzere na e mingi.—Diko 1 Jean 4:7.