Ngbanga ti nyen la bibe ti kengo zo ayeke ngbâ gï ti gue tongaso?

Kengo zo ayeke nyen?

Kengo zo ayeke kengo mbeni zo wala groupe ti ambeni zo bê oko. A yeke sarango ngonzo na terê ti mbeni zo teti mbeni ngoi.

NGBANGA TI NYEN LA AZO AYEKE KOMANSE TI KE AMBA TI ALA?

Azo ayeke komanse ti ke amba ti ala ndali ti gbâ ti araison. Mingi ni, a yeke ke ambeni zo gï vîi vîi, a yeke pëpe ndali ti ye so ala sara, me ndali ti mara ti ala. Ala peut ti ke azo ni ndali ti so ala pensé so groupe ti azo ni kue ayeke sioni, na ala peut ti changé ape. A peut ti bâ ala tongana ambumbuse zo, a menacé ala wala a bâ ala tongana azo ti gango na problème. Azo so apensé so a ke ala peut-être ala yeke bâ pasi ndali ti sarango ye ti ngangu, injustice, wala ndali ti ambeni ye so asi so asara si ala pensé so ala la aga na kpale ni.

KENGO ZO AYEKE MÛ NDO TONGANA NYEN?

Parfois azo ayeke ke ambeni zo sân ti tene ala hinga même azo ni. Na tapande, mingi ni azo ayeke wara pensé ni so na lege ti asewa ti ala wala akamarade ti ala. Ni la, bibe ti kengo zo apeut ti mû ndo hio tongaso na a sara si ambeni zo akomanse ti wara même bango ndo ni so na ndö ti groupe ti azo ni kue.

Tongana e hinga tongana nyen la bibe ti kengo zo ayeke mû ndo hio, e yeke hinga ndani so mingi ti azo ayeke ke amba ti ala. Me, ambeni raison ayeke dä so asara si bibe ni so ayeke mû ndo. Ti hinga araison ni, e doit ti gi ti hinga ndo so kengo ndo ni alondo dä. E lingbi ti hinga ni na lege ti Bible.

BIBLE AFA NDO SO BIBE TI KENGO ZO ALONDO DÄ

SIONI KENGO NDO NI ALONDO LANI NA AZO APE. A komanse lani na temps so mbeni ange na yayu, so a iri lo Satan Zabolo, asara kpengbango-li na Nzapa. ‘Na ngoi so Zabolo ato nda ni, lo yeke zo ti fango zo’ na lege ti kpengbango-li ti lo. So ti tene “lo yeke zo ti mvene na babâ ti mvene”, lo ngbâ ti maï bibe ti kengo zo nga na sarango ye ti ngangu na zo (Jean 8:44; 1 Jean 3:11, 12). Bible afa lo tongana zo ti sioni, zo ti ngonzo, nga zo ti sarango ye ti ngangu na zo.—Job 2:7; Apocalypse 12:9, 12, 17.

A YEKE FACILE NA E AZO TI KE ZO. Adam amû lani peko ti Satan. Ye ti peko ni ayeke so, azo kue asara siokpari na ala yeke mbilimbili-kue ape (aRomain 5:12). Kozo molenge ti Adam, Caïn, ake lani ita ti lo Abel na lo fâ lo (1 Jean 3:12). Ti vrai ni, azo mingi ayeke ke amba ti ala nga ala yeke bâ mawa ti ala ape. Me ndali ti so a dü e na yâ ti siokpari, mingi ti azo ayeke pensé gï na ala wani, ala yeke sara bê ti ye nga ala yeke azo ti wuma asara si bibe ti kengo zo ayeke mû ndo.—2 Timothée 3:1-5.

TI KANGA BÊ NA ZO APE AYEKE PUSU ZO TI KE MBA TI LO. Dunia so ayeke pusu azo ti ke amba ti ala na lege so ala yeke bâ mawa ti zo ape, ala yeke na asioni bango ndo nga na asioni sarango ye. Ndali ti so “dunia so kue ayeke na gbe ti Zo ti sioni”, Satan Zabolo, a sara si azo ayeke ke amba ti ala, ala yeke zonga ndo nga ala yeke buba aye ti amba ti ala.—1 Jean 5:19.

Me, Bible afa gï ape tongana nyen la bibe ti kengo zo akomanse, me lo fa aye mingi na ndö ni. A fa nga tongana nyen la a yeke leke kpale ni.