Mo peut ti duti na siriri na ngoi ti ngangu kpale

1. “Siriri ti Nzapa” ayeke nyen? Tongana nyen la ti duti na ni apeut ti aidé e? (aPhilippien 4:6, 7).

MBENI mara ti siriri ayeke dä so azo ti dunia so apeut ti hinga ni ape. A yeke “siriri ti Nzapa” so asara si zo aduti kpô ndali ti so lo yeke na kpengba songo na Babâ ti lo ti yayu. Tongana e yeke na siriri ti Nzapa, e yeke bâ so mbeni ye ti sara sioni na e ayeke dä ape. (Diko aPhilippien 4:6, 7.) E yeke na kpengba songo ti kamarade na azo so aye lo. E yeke nga na kpengba songo na “Nzapa ti siriri”. (1 aThes. 5:23). Tongana e hinga Babâ ti e, e sara confiance na lo nga e mä yanga ti lo, siriri ti Nzapa apeut ti sara si e duti kpô na e gi bê ti e ape na ngoi so e yeke na yâ ti mbeni ngangu kpale.

2. Ngbanga ti nyen la e hinga biani so e peut ti duti na siriri ti Nzapa?

² Eskê e peut ti duti biani na siriri ti Nzapa na ngoi so e yeke na yâ ti mbeni ngangu kpale, na tapande, na ngoi so mbeni sioni kobela amû ndo, mbeni ngangu kpale asi, wusuwusu ayeke na yâ ti kodro wala a sara aye ti ngangu na e? Angangu kpale so kue apeut ti sara e mbeto. Me, Jésus amû wango so na adisciple ti lo: “Ala zia si bê ti ala agi ala pëpe nga ala zia si bê ti ala awoko na mbeto pëpe.” (Jean 14:27). Merci so aita asara ye alingbi na wango ti Jésus so. Grâce na mungo maboko ti Jéhovah, ala wara lege ti duti na siriri na ngoi so ala yeke na yâ ti angangu kpale.

GI TI DUTI NA SIRIRI TONGANA MBENI SIONI KOBELA AMÛ NDO

3. Tongana nyen la mbeni sioni kobela so amû ndo apeut ti buba yâ ti siriri ti e?

³ Mbeni sioni kobela so amû ndo apeut ti sara si gigi ti e achangé mingi. Bâ ye so kobela ti COVID-19 asara na ndö ti gigi ti azo mingi. Na yâ ti gingo nda ti mbeni ye, a hon ndambo ti azo so a hunda ala atene so ala lango nzoni ape na ngoi so sioni kobela so amû ndo. Na ngoi so sioni kobela so amû ndo, asarango ye so ague na li ni mingi ahon ti kozo: gingo bê, kota vundu, nyongo sämba ahon ndö ni nga nyongo drogue nga na sarango aye ti ngangu na zo na yâ ti sewa. Na ndö ni, azo mingi agi ti fâ terê ti ala. Tongana mbeni sioni kobela amû ndo na ndo so mo yeke dä, tongana nyen la mo peut ti duti kpô nga ti duti na siriri ti Nzapa?

4. Ngbanga ti nyen la ti hinga prophétie ti Jésus na ndö ti lâ ti nda ni ayeke ga na e siriri?

⁴ Jésus atene lani so, na lâ ti nda ni, asioni kobela ayeke mû ndo “na ando nde nde na peko ti terê”. (Luc 21:11). Tongana nyen la ti hinga ni aga na e siriri? Tongana asioni kobela ayeke mû ndo, li ti e ayeke kpe ape. E hinga so a yeke ye so Jésus atene lani ayeke si. Tongaso, e yeke sara ye alingbi na wango so Jésus amû na azo so ayeke vivre na ngoi ti nda ni, so lo tene: “Ala zia si mbeto ahon ndö ti ala pëpe.”—Mat. 24:6.

5. (a) Ti gue oko na aPhilippien 4:8, 9, tongana mbeni sioni kobela amû ndo, nyen la a yeke nzoni e sambela ndali ni? (b) Tongana nyen la ti mä a-audio so bungbi ti Jéhovah asigi na ni apeut ti aidé mo?

⁵ Tongana mbeni sioni kobela amû ndo, e peut ti gi bê ti e nga li ti e apeut ti ga kirikiri. A yeke ye so asi na mbeni ita-wali so iri ti lo Desi.b Na peko ti so babâ kete ti lo, mbeni ita ti lo nga na docteur ti lo akui na kobela ti COVID-19, lo yeke na mbeto so lo nga kue lo yeke wara kobela ni nga mama ti lo so ayeke mbakoro ayeke wara ni. So kobela ni amû ndo, lo gi lani bê ti lo so lo yeke perdre kua ti lo, na lo yeke hunda terê ti lo tongana nyen la lo yeke vo kobe nga lo yeke payé dä. So lo gi bê ti lo mingi na ndö ti aye so asara si lo peut ti lango na bï ape. Me Desi akiri aduti na siriri. Tongana nyen? Lo sambela Jéhovah ti aidé lo ti duti kpô nga ti pensé na anzoni ye. (Diko aPhilippien 4:8, 9.) Lo mä Jéhovah so ayeke “sara tënë” na lo na lege ti a-audio ti Bible. Lo tene: “Totongo ti go ti azo so ayeke diko ye ni asara si bê ti mbi adë nga adabe ti mbi so Jéhovah ayeke pensé na mbi.”—Ps. 94:19.

6. Mandango ye nga na abungbi ayeke aidé mo tongana nyen?

⁶ Tongana mbeni sioni kobela amû ndo, a peut ti duti ngangu na mo ti sara aye kue so mo yeke sara kozo, me zia pëpe si a kanga lege na mo ti manda ye wala ti gue na bungbi. Aye so asi na aita ti e so a fa ni na yâ ti ambeti nga na avidéo ti e ayeke dabe ti mo so ala ngbâ be-ta-zo na Jéhovah atâa so ala wara mara ti akpale ni so (1 Pi. 5:9). Abungbi ayeke aidé mo ti pensé na anzoni ye so ayeke na yâ ti Bible. A yeke mû nga na mo lege ti wa amba ti mo nga ti kpengba ala (aRom. 1:11, 12). Tongana mo gbu li na ndö ti tongana nyen la Jéhovah amû maboko na awakua ti lo na ngoi so terê ti ala ason, mbeto asara ala wala ala bâ so ala yeke gï ala oko, mabe ti mo ayeke kpengba nga mo yeke hinga biani so lo yeke mû nga maboko na mo.

7. Nyen la mo peut ti manda na lege ti tapande ti bazengele Jean?

⁷ Sara effort ti sara lisoro na aita ti mo. Tongana mbeni sioni kobela ayeke mû ndo, a peut ti hunda ti tene e duti ayo na amba ti e, atâa so e yeke ndo oko. Tongana a si tongaso, mo peut ti duti na oko pensé ti bazengele Jean. Lo ye lani ti bâ kamarade ti lo Gaïus lê na lê (3 Jean 13, 14). Me Jean ahinga so, teti mbeni ngoi, lo peut ti bâ Gaïus ape. Tongaso, Jean asara lani ye so lo peut ti sara; lo sû lettre na Gaïus. Tongana, na ambeni ngoi, mo na aita apeut ti bâ terê lê na lê ape, gi ti sara lisoro na ala na téléphone, appel vidéo wala tokua na ala amessage. Tongana mo ngbâ ti sara lisoro na amba ti mo aChrétien, mo yeke bâ so mo yeke gï mo oko ape nga mo yeke duti na siriri. Tongana mo yeke gi bê ti mo mingi, sara lisoro na a-ancien nga yeda na atënë so ala yeke tene na mo na ndoye ti kpengba mo.—És. 32:1, 2.

GI TI DUTI NA SIRIRI TONGANA MBENI NGANGU KPALE ASI

8. Tongana nyen la mbeni ngangu kpale apeut ti buba yâ ti siriri ti mo?

⁸ Tongana, na ndo so mo yeke dä, ngu asuku amû ndo, sese ayengi wala wâ agbi ndo, teti mbeni ngoi, mo peut ti gi bê ti mo mingi. Tongana mbeni zo so mo ye lo akui wala aye ti mo abuba, mo peut ti sara vundu, ti bâ so ye oko ti sarango ni ayeke dä ape wala bê ti mo apeut même ti son. A ye ti tene ape so mo ye aye ti sese mingi wala mo yeke na mabe ape. Mo wara mbeni ngangu kpale, na peut-être ambeni zo aku ti tene vundu asara mo (Job 1:11). Me mo peut ti ngbâ ti duti na siriri. Na lege wa?

9. Tënë ti nyen la Jésus atene ti leke e ndali ti angangu kpale?

⁹ Girisa ape tënë ti prophétie so Jésus atene. Ambeni zo apensé so mbeni ngangu kpale ayeke si ande na ala lâ oko ape. Me hinga so angangu kpale ayeke si mingi na ngoi ti e, na mbeni ngangu kpale apeut ti si na ndo so e yeke dä. Jésus atene lani na adisciple ti lo so “sese ayeke yengi ngangu” nga ambeni ngangu kpale tongaso ayeke si kozo ti tene nda ni aga (Luc 21:11). Lo tene nga lani so “kpengo ndia pëpe ayeke wu mingi,” na a yeke ye so ayeke si laso. Na tapande, e yeke bâ sarango asioni ye, sarango aye ti ngangu na zo nga na aye ti sioni so aterroriste ayeke sara (Mat. 24:12). Jésus atene lâ oko ape so akpale so ayeke si gï na azo so Jéhovah adö ala azia. Ti tâ tënë ni, akpale so asi nga na awakua be-ta-zo ti Jéhovah (És. 57:1; 2 aCor. 11:25). Peut-être Jéhovah ayeke bata e na lege ti miracle ape si mbeni ngangu kpale asi na e ape, me lo yeke mû na e ye kue so e bezoin ni si e ngbâ ti duti kpô nga na siriri.

10. Ngbanga ti nyen la ti leke terê ti e ndali ti mbeni ngangu kpale afa so e yeke na mabe? (aProverbe 22:3).

¹⁰ A yeke duti ande ngangu mingi na e pëpe ti duti kpô na ngoi ti mbeni ngangu kpale tongana e leke terê ti e kozo ndali ni. Me eskê ti leke terê ti e kozo ndali ni afa so e yeke na mabe na Jéhovah ape? Ên-ën. Ti tâ tënë ni, ti leke terê kozo ndali ti mbeni ngangu kpale afa so e yeke biani na mabe so lo yeke na ngangu ti bâ lege ti e. Ngbanga ti nyen? Bible awa e ti leke terê ti e kozo ndali ti angangu kpale so apeut ti si. (Diko aProverbe 22:3.) Nga, na lege ti a-article ti apériodique, abungbi nga na atokua, bungbi ti Jéhovah awa e fani mingi ti leke terê ti e ndali ti mbeni ngangu kpale.c Eskê e yeke na confiance na Jéhovah? Tongana a yeke tongaso, e yeke sara ye alingbi na wango so laso, kozo ti tene mbeni ngangu kpale asi.

11. Nyen la mo manda na lege ti tapande ti Margaret?

¹¹ Bâ ye so asi lani na mbeni ita-wali so iri ti lo Margaret. Akota zo ti kodro ahunda lo ti gue na mbeni ndo nde na ngoi so wâ akomanse ti gbi ndo na ndo so lo yeke dä. So gbâ ti azo agi ti kpe na oko ngoi ni, a-oto ayeke na ndö ti lege mingi na oto oko apeut ti hon ape. Guru ti wâ ni amû ndo, na Margaret adoit ti ngbâ na yâ ti oto ti lo teti mbeni ngoi. Ye oko, lo sö kuâ ndali ti so lo leke terê ti lo kozo. Lo zia mbeni carte na yâ ti bozo ti lo, tongaso si lo peut ti sara kua na ni ti wara mbeni lege nde ti mû ni ti sigi na ndo ni so. Lo mû lege so lani kozo na ngangu kpale ni, tongaso a yeke ngangu na lo ape ti hinga lege so lo peut ti mû ni tongana mbeni kpale asi. Grâce na aye so Margaret asara ti leke terê ti lo, lo sö kuâ.

12. Ngbanga ti nyen la e yeke sara ye alingbi na awango so a mû na e ti bata fini ti e?

¹² Ti bata e nga ti sara si wusuwusu aduti na yâ ti kodro ape, akota zo ti kodro apeut ti hunda e ti bata ndia ti couvre-feu, ti gue na mbeni ndo nde wala ti sara ambeni ye nde. Ambeni zo ayeke sara ye alingbi na aye so hio ape ndali ti so ala ye ti dö aye ti ala ti zia ape. A-Chrétien ayeke sara ti ala ye tongana nyen? Bible atene na e, atene: “Ndali ti Seigneur, ala woko terê ti ala na gbe ti aye so kue azo azia na sese: wala a yeke mbeni gbia, zia ala woko terê ti ala na gbe ti lo ndali ti so lo yeke kota zo; wala a yeke agouverneur, zia ala woko terê ti ala na gbe ti ala ndali ti so ala yeke azo so Seigneur si atokua ala.” (1 Pi. 2:13, 14). Bungbi ti Jéhovah ayeke mû na e nga awango ti bata fini ti e. A yeke dabe ti e lakue ti mû na a-ancien afini sango na ndö ti e, tongaso si ala peut ti wara e na ngoi so mbeni ngangu kpale asi. A peut même ti fa na e ti ngbâ place oko, ti gue na mbeni ndo nde, tongana nyen ti wara aye so e bezoin ni nga tongana nyen la e peut ti aidé amba ti e nga na ngoi wa la e peut ti sara ni. Tongana e sara ye alingbi na awango so ape, e peut ti zia fini ti e nga na ti a-ancien na yâ ti kpale. Girisa ape so akoli be-ta-zo so ayeke bâ ndo na ndö ti e (aHéb. 13:17). Margaret atene: “Mbi hinga na bê ti mbi kue so sarango ye alingbi na aye so a-ancien nga na bungbi ti Jéhovah afa la asö fini ti mbi.”

13. Nyen la asara si aChrétien mingi so aquitté ndo ti ala ayeke na ngia nga na siriri?

¹³ Aita mingi so aquitté da ti ala ndali ti mbeni ngangu kpale wala ndali ti bira wala wusuwusu na yâ ti kodro asara kue ti sara ye alingbi na changement so asi na ala, nga hio ala kiri ala komanse ti sara aye mingi na yâ ti kua ti Jéhovah. Tongana ti akozo Chrétien so sarango aye ti ngangu na zo asara si yâ ti ala akangbi kirikiri, ala ngbâ lani ti “fa nzoni tënë ti tënë ti Nzapa.” (Kus. 8:4). Fango tënë a-aidé ala ti zia li ti ala na ndö ti Royaume ti Nzapa me pëpe na ndö ti ngangu kpale so ala yeke na yâ ni. Ye so asara si ala ngbâ ti duti na ngia nga na siriri.

GI TI DUTI NA SIRIRI TONGANA A YEKE SARA AYE TI NGANGU NA MO

14. Tongana a sara aye ti ngangu na e, a peut ti buba yâ ti siriri ti e tongana nyen?

¹⁴ Tongana a sara aye ti ngangu na e, e peut ti perdre aye mingi so asara si e duti na siriri. Tongana mbeni ye akanga lege na e ape ti gue na bungbi, ti fa tënë nga ti sara aye so e yeke sara ka lango oko oko nga mbeto asara e ape ti tene a gbu e, e yeke na ngia. Tongana e peut ti sara aye so encore ape, e peut ti komanse ti gi bê ti e, na e yeke sara mbeto ti ye so apeut ti si na e. A yeke sioni ape ti pensé tongaso. Me a yeke nzoni e sara hange. Jésus afa so aye ti ngangu so a sara na adisciple ti lo apeut ti sara si ala pika gere ti ala (Jean 16:1, 2). Tongaso, tongana nyen la e peut ti duti na siriri na ngoi so a yeke sara aye ti ngangu na e?

15. Ngbanga ti nyen la a yeke nzoni ape ti sara mbeto ti aye ti ngangu so azo apeut ti sara na e? (Jean 15:20; 16:33).

¹⁵ Bible atene na e, atene: “Azo kue so aye ti voro Nzapa na bê ti ala kue na yâ ti gigi ti ala na dutingo beoko na Christ Jésus, a yeke sara ande aye ti ngangu na ala nga.” (2 Tim. 3:12). A yeke lani ngangu na mbeni ita-koli, so iri ti lo Andrei, ti yeda so a yeke sara aye ti ngangu na awakua ti Jéhovah kue na yâ ti kodro ti lo na peko ti so a kanga lege na kua ti e. Lo tene: ‘E aTémoin so e yeke ge, wungo ti e ayeke mingi. Akota zo ti kodro apeut ti gbu e kue tongana nyen?’ Mara ti pensé so asara si lo yeke na siriri ape, me a sara si lo gi bê ti lo lakue. Ambeni ita azia kpale ni na maboko ti Jéhovah, ala pensé ape so a peut ti gbu ala ape. Ala hinga so a peut ti gbu ala, me ala gi bê ti ala tongana ti Andrei ape. Tongaso, lo mû desizion ti duti na oko bango ndo ti ala nga lo zia bê ti lo kue na Nzapa. Kete na pekoni, lo yeke na siriri, nga laso lo yeke na ngia atâa akpale so lo wara. A peut nga ti duti tongaso ndali ti e. Atâa so Jésus atene na e ti ku ti tene a sara aye ti ngangu na e, lo dë nga bê ti e so e peut ti ngbâ be-ta-zo.—Diko Jean 15:20; 16:33.

16. Fango lege wa la e bezoin ti sara ye alingbi na ni na ngoi so a yeke sara aye ti ngangu na e?

¹⁶ Tongana a kanga lege na kua ti e kue wala mingi na ndo so e yeke dä, aita ti filiale nga na a-ancien apeut ti fa na e ambeni ye ti sarango ni. A fa na e aye ni so ti bata e, ti sara kue ti tene e ngbâ ti wara kobe ti yingo nga ti aidé e ti ngbâ ti fa tënë na ambeni lege. Sara kue ti sara ye alingbi na awango so a mû na mo, même tongana mo comprendre kue ape ndani so a mû na mo wango ni (Jacq. 3:17). Nga, fa na azo lâ oko ape sango na ndö ti aita ti e wala na ndö ti akua ti congrégation so ala yeke na droit ti hinga ni ape.—Zo-ti. 3:7.

17. Tongana ti abazengele na ngoi ti akozo Chrétien, nyen la e leke na bê ti e ti ngbâ ti sara?

¹⁷ Mbeni kota raison so ndali ni Satan ayeke sara bira na awakua ti Nzapa ayeke so ala yeke sara “kusala ti fango tënë na ndö ti Jésus.” (Apoc. 12:17). Zia pëpe si Satan na dunia ti lo azia mbeto na yâ ti mo. Ti ngbâ ti fa tënë nga ti fa ye atâa a kanga lege na e ayeke sara si e duti na ngia nga na siriri. Na ngoi ti akozo Chrétien na ngoi so akota zo ti aJuif amû yanga na abazengele ti zia ti fa tënë, akoli be-ta-zo so asoro lani ti mä yanga ti Nzapa. Ala ngbâ lani ti fa tënë, na kua ni so asara si ala yeke na ngia (Kus. 5:27-29, 41, 42). Tongana a kanga lege na ambeni kua ti e, e doit ti sara hange na ngoi so yeke e fa tënë (Mat. 10:16). Me tongana e sara ye kue so e peut ti sara, e yeke duti na siriri ndali ti so e zia ngia na bê ti Jéhovah nga e fa na azo tënë so ayeke sö ala.

“NZAPA TI SIRIRI AYEKE DUTI ANDE NA ALA”

18. Zo wa la apeut ti sara si e duti na tâ siriri?

¹⁸ Duti sûr so même na angoi so ayeke ngangu mingi, e peut ti duti na siriri. Na angoi ni so, a lingbi e girisa ape so siriri so e bezoin ni ayeke siriri ti Nzapa, so ti tene, siriri so gï Jéhovah la apeut ti mû na e. Sara confiance na lo na ngoi so mbeni sioni kobela amû ndo, mbeni ngangu kpale asi wala a sara aye ti ngangu na mo. Ngbâ nduru na bungbi ti lo. Zia lê ti mo na ndö ti pendere gigi ti kekereke so angbâ ti ku mo na devant. Tongana mo sara ni, “Nzapa ti siriri ayeke duti ande na [mo].” (aPhil. 4:9). Na yâ ti article ti peko, e yeke bâ tongana nyen la e peut ti aidé amba ti e aChrétien so ayeke na yâ ti kpale ti duti na siriri ti Nzapa.