1 | Sambela—“Ala mû agingo bê ti ala kue ala bi ni na ndö ti lo”
BIBLE ATENE:“Ala mû agingo bê ti ala kue ala bi ni na ndö ti [Nzapa], ngbanga ti so lo yeke bi bê ti lo na ndö ti ala.”—1 PIERRE 5:7.
Tënë so aye ti tene nyen?
Jéhovah Nzapa awa e ti sara tënë na lo na ndö ti agingo bê ti e (Psaume 55:22). E peut ti sambela ndali ti akpale ti e kue. Tongana ye ni ayeke kota ye na lê ti e, a yeke nga kota ye na lê ti Jéhovah. Ti sambela lo ayeke sara si zo awara siriri ti bê.—aPhilippien 4:6, 7.
Lege so sambela apeut ti aidé e
Tongana e yeke na kobela ti li, e peut ti bâ so e yeke gï e oko. Azo apeut ti comprendre lakue ape kpale so e yeke hon na yâ ni (aProverbe 14:10). Me tongana e fa atënë ti bê ti e kue na Nzapa na yâ ti sambela, lo yeke dengi mê ti mä e nga lo yeke comprendre e. Jéhovah abâ e, lo hinga aye so ason e nga na akpale ti e, nga lo ye ti tene e fa na lo na yâ ti sambela aye kue so agbu bê ti e.—2 Chronique 6:29, 30.
Ti sara tënë na Jéhovah na yâ ti sambela ayeke sara si e sara confiance mingi na lo so lo pensé na e. E lingbi ti duti na oko bango ndo ti wasungo psaume so asambela lani atene: “Mo bâ pasi ti mbi; mo hinga kota vundu ti mbi.” (Psaume 31:7). Gï ti hinga so Jéhovah abâ aye so e yeke hon na yâ ni apeut ti aidé e ti ngbâ ti gbu ngangu na ngoi ti akpale. Lo yeke bâ gï akpale ti e ni bango ape, me lo yeke sara mbeni ye. Lo hinga akpale ti e nzoni mingi ahon azo kue na lo peut ti aidé e ti wara dengo bê nga ti encouragé e na lege ti Bible.