Tongana nyen la e peut ti duti na kpengba mabe na zendo ti fini dunia so Jéhovah amû?

1-2. Nyen la e bezoin ti sara na ngoi so e yeke ku fini dunia?

E BÂ na nene ni mingi zendo so Jéhovah amû ti changé dunia so na mbeni fini dunia so mbilimbili ayeke dä (2 Pi. 3:13). Atâa so e hinga mbilimbili pëpe lawa la fini dunia so ayeke ga, aye ayeke dä so afa so e yeke ku ngbii ape.—Mat. 24:32-34, 36; Kus. 1:7.

² Ti ku na ngoi ni so, atâa e yeke na yâ ti tâ tënë a sara ngu oke, e kue e bezoin ti duti na kpengba mabe na zendo so. Ngbanga ti nyen? Ngbanga ti so même mabe so akpengba apeut ti woko. Ti vrai ni, bazengele Paul atene so ti duti na mabe ape ayeke “siokpari so alingbi ti gbu e hio”. (aHéb. 12:1). Ti tene mabe ti e awoko ape, e bezoin lakue ti gbu li mingi na ndö ti aye so afa so fini dunia aga nduru ti ga awe.—aHéb. 11:1.

3. Nyen la e yeke bâ na yâ ti article so?

³ Na yâ ti article so, e yeke bâ aye ota so e peut ti sara ti duti na kpengba mabe na zendo ti fini dunia so Jéhovah amû: (1) ti gbu li na ndö ti ye so a futa ti zi azo, (2) ti gbu li na ndö ti ngangu ti Jéhovah nga (3) ti sara aye so ayeke sara si e ga nduru mingi na Jéhovah. Na pekoni, e yeke bâ tongana nyen la tënë so Jéhovah atene na Habakuk ayeke kpengba mabe ti e laso. Me kozo ni, zia e bâ ambeni ye so apeut ti si na e laso so ahunda ti tene e duti na kpengba mabe na zendo ti fini dunia so ayeke ga.

AYE SO AHUNDA TI TENE E DUTI NA KPENGBA MABE

4. Adesizion wa la ahunda kpengba mabe?

⁴ Lâ na lâ, e yeke mû adesizion so ahunda kpengba mabe. Na tapande, e yeke mû adesizion na ndö ti azo so e yeke sara kamarade na ala, angia so e yeke bâ, mandango mbeti, mariage, dungo amolenge nga na kua ti nginza. A yeke nzoni e hunda terê ti e: ‘Eskê aye so mbi soro ti sara afa so mbi hinga biani so dunia so ayeke hon hongo na fini dunia ti Nzapa ayeke mû place ni fafadeso?’ Wala eskê azo so ayeke vivre mo bâ mo tene kuâ ayeke nda ti aye kue la ayeke pusu mbi ti soro aye?’(Mat. 6:19, 20; Luc 12:16-21). E yeke mû anzoni desizion tongana e yeke na kpengba mabe so fini dunia ayeke si fafadeso.

5-6. Ngbanga ti nyen la e bezoin ti duti na kpengba mabe na ngoi ti akpale? Mû mbeni tapande ti fa ni.

⁵ E yeke wara nga akpale so a hunda ti tene e duti na kpengba mabe. A peut ti sara aye ti ngangu na e, e peut ti wara mbeni ngangu kobela wala ambeni ye apeut ti sara si e découragé. Na tongo nda ni, e peut ti bâ so e peut ti gbu ngangu na yâ ti kpale so e wara. Me akpale tongaso apeut ti ngbâ aninga, tongaso e bezoin kpengba mabe si e ngbâ ti gbu ngangu na e ngbâ ti sara na Jéhovah na ngia.—aRom. 12:12; 1 Pi. 1:6, 7.

⁶ Tongana e yeke na yâ ti mbeni kpale, e peut ti pensé so fini dunia ti Jéhovah ayeke si lâ oko ape. Eskê a ye ti fa so mabe ti e awoko awe? A yeke tongaso ape. Zia e bâ mbeni tapande. Tongana dë asara e ngangu, e peut ti pensé so ndö ayeke chauffé lâ oko ape. Me ndö ayeke chauffé. Legeoko nga, tongana e découragé ngangu e peut ti pensé so fini dunia ayeke si lâ oko ape. Me tongana e yeke na kpengba mabe, e yeke hinga so azendo ti Nzapa ayeke ga tâ tënë (Ps. 94:3, 14, 15; aHéb. 6:17-19). Tongana e yeke na mara ti confiance tongaso, e peut ti ngbâ ti zia vorongo Jéhovah kozo na yâ ti fini ti e.

7. Bango ndo wa la e doit ti sara hange na ni?

⁷ Zia e bâ encore mbeni ye so a hunda kpengba mabe si e sara ni: kua ti fango tënë. Gbâ ti azo so e yeke fa tënë na ala apensé so “nzoni tënë” na ndö ti gango ti fini dunia ti Nzapa ayeke tâ tënë ape (Mat. 24:14; Ézéch. 33:32). E doit ti sara hange si e duti na kite lâ oko ape na ndö ti aye so Jéhovah afa na e tongana ala. Ti tene ye tongaso asi na e ape, e doit ti ngbâ ti duti na kpengba mabe. Zia e bâ aye ota so e peut ti sara.

GBU LI NA NDÖ TI YE SO A FUTA TI ZI AZO

8-9. Ti gbu li na ndö ti ye so a futa ti zi azo apeut ti kpengba mabe ti e tongana nyen?

⁸ Mbeni ye so e peut ti sara ti kpengba mabe ti e ayeke ti gbu li na ndö ti ye so a futa ti zi azo. Ye so a futa ti zi azo asara si e hinga biani so azendo ti Nzapa ayeke ga tâ tënë. Tongana e gbu li nzoni na ndö ti ye so a futa ti zi azo so ayeke mbeni kota sacrifice la Jéhovah asara, e yeke duti na kpengba mabe so zendo so lo mû so e yeke ngbâ na fini lakue lakue na yâ ti mbeni pendere dunia ayeke ga tâ tënë. E tene tongaso ngbanga ti nyen?

⁹ Nyen la Jéhovah amû lani ti zi azo? Jéhovah amû lani kozo Molenge ti lo so lo ye lo mingi so ayeke kota kamarade ti lo na yayu ti tene a dü lo tongana zo so ayeke mbilimbili-kue na ndö ti sese. Na ngoi so Jésus ayeke lani na sese, lo gbu ngangu na yâ ti akpale kue. Na pekoni, lo bâ pasi nga lo kui mbeni sioni kuâ. So kota ngere la Jéhovah afuta so! Nzapa ti e so aye e ayeke zia lâ oko ape si Molenge ti lo abâ pasi nga akui ti tene e vivre nzoni gï teti kete ngoi (Jean 3:16; 1 Pi. 1:18, 19). So Jéhovah afuta ngere so ayeke kota mingi, lo yeke sara kue ti tene e ngbâ na fini lakue lakue na yâ ti fini dunia.

GBU LI NA NDÖ TI NGANGU TI JÉHOVAH

10. Ti gue oko na aÉphésien 3:20, nyen la Jéhovah ayeke na ngangu ti sara?

¹⁰ Use ye so e peut ti sara ti kpengba mabe ti e ayeke ti gbu li na ndö ti ngangu ti Jéhovah. Lo yeke na ngangu ti sara ye kue so lo mû zendo ni. Ti tâ tënë ni, na azo, zendo ti ngbâ na fini lakue lakue na yâ ti fini dunia apeut ti kpa mbeni ye so ayeke si ape. Me fani mingi Jéhovah amû zendo ti sara aye so azo apeut ti sara ni lâ oko ape. Lo peut ti sara ni ngbanga ti so lo yeke Nzapa so ngangu ti lo ahon angangu kue (Job 42:2; Marc 10:27). Tongaso, li ti akpe ape tongana lo mû zendo ti sara na e aye so ahon gbungo li ti e.—Diko aÉphésien 3:20.

11. Mû mbeni tapande ti zendo ti Nzapa so ahon gbungo li ti zo. (Bâ encadré “Ambeni zendo ti Nzapa so ahon gbungo li ti zo so aga tâ tënë.”)

¹¹ Gbu li na ndö ti ambeni ye so Jéhovah amû zendo ni na azo ti lo ândö so na bango ni apeut ti ga tâ tënë ape. Lo tene lani na Abraham na Sara so ala yeke dü mbeni molenge na lâ ti mbakoro ti ala (Gen. 17:15-17). Lo tene nga na Abraham so a yeke mû sese ti Canaan na ahale ti lo. Angu mingi na ngoi so ahale ti Abraham so ayeke azo ti Israël ayeke lani angbâa na Égypte, na bango ni zendo so apeut ti ga tâ tënë ape. Me a ga lani tâ tënë. Angu mingi na pekoni, Jéhovah atene so Élisabeth so ayeke mbakoro ayeke dü molenge. Lo tene nga lani na Marie so ade ti hinga koli ape so lo yeke dü Molenge ti lo. Ye so asara si zendo so Jéhovah amû angu saki mingi kozo na yaka ti Éden aga tâ tënë.—Gen. 3:15.

12. Josué 23:14 nga na Ésaïe 55:10, 11 afa na e nyen na ndö ti ngangu ti Jéhovah?

¹² Tongana e gbu li na ndö ti azendo kue so Jéhovah amû nga tongana nyen la lo sara ye alingbi na ni, e yeke comprendre so ngangu ti lo ayeke kota mingi. A yeke sara si e duti na kpengba mabe na zendo ti fini dunia so lo mû. (Diko Josué 23:14; Ésaïe 55:10, 11.) Ye so asara si e leke terê ti e nzoni ti aidé azo ti comprendre so zendo ti fini dunia ayeke tënë ti bango li ape. Jéhovah lo wani atene tënë so na ndö ti afini yayu nga na fini sese, lo tene: “Atënë so ayeke atënë so a lingbi ti zia bê dä nga ayeke tâ tënë.”—Apoc. 21:1, 5.

SARA AYE SO AYEKE SARA SI MO GA NDURU MINGI NA JÉHOVAH

13. Tongana nyen la abungbi ti congrégation apeut ti kpengba mabe ti e? Fa ndani so mo tene tongaso.

¹³ Ota ye so e peut ti sara ti kpengba mabe ti e ayeke ti mû ngoi ti sara aye so ayeke sara si e ga nduru na Jéhovah. Na tapande, bâ tongana nyen la abungbi ti congrégation ayeke aidé e. Anna, so asara ngu mingi na yâ ti ambage nde nde ti kua ti ngoi kue, atene: “Abungbi a-aidé mbi ti ngbâ ti duti na kpengba mabe. Même tongana mbeni ita so ayeke mû diskur ayeke na akode mingi ape wala lo fa mbeni fini ye ape, fani mingi mbi yeke mä mbeni ye so ayeke aidé mbi ti mä yâ ti mbeni tâ tënë ti Bible nzoni nga ayeke kpengba mabe ti mbi.”b Acommentaire ti aita apeut nga ti kpengba mabe ti e.—aRom. 1:11, 12; 10:17.

14. Kua ti fango tënë ayeke kpengba mabe ti e tongana nyen?

¹⁴ E yeke kpengba nga mabe ti e tongana e yeke fa tënë (aHéb. 10:23). Barbara, so ayeke sara na Jéhovah ahon ngu 70 awe, atene: “Mbi bâ lakue kua ti fango tënë tongana ye so akpengba mabe ti mbi. Tongana mbi yeke fa tënë ti apendere zendo ti Jéhovah na azo mingi, mabe ti mbi ayeke kpengba nga mingi.”

15. Mandango ye e wani ayeke kpengba mabe ti e tongana nyen? (Bâ nga afoto.)

¹⁵ Mbeni ye nde so ayeke kpengba nga mabe ti e ayeke mandango ye e wani. Suzanne abâ so ti leke kapa ti mandango ye lo wani a-aidé lo mingi. Lo tene: “Na dimanche, mbi yeke manda article ti Tour ti Ba Ndo ti yenga ti peko. Na lundi nga na mardi, mbi yeke leke bungbi ti milieu ti yenga. Na yâ ti tanga ti alango ni, mbi yeke manda ye mbi wani.” So Suzanne asara ye lakue alingbi na kapa ti lo, lo ngbâ ti kpengba mabe ti lo. Irene, so asara kua na kota ndokua ti e angu mingi, abâ so mandango aprophétie ti Bible akpengba mabe ti lo. Lo tene: “So anzene nzene tënë ti aprophétie ti Jéhovah kue aga tâ tënë apika bê ti mbi mingi.”c

“NYEN NA NYEN KUE A YEKE SI”

16. Ngbanga ti nyen la atënë so Jéhovah atene na Habakuk abâ nga e laso? (aHébreu 10:36, 37).

¹⁶ A sara angu mingi awe la ambeni wakua ti Jéhovah ayeke ku hunzingo ti aye ti ngoi so. Na bango ndo ti zo, azendo ti Nzapa akpa ye so ayeke ga tâ tënë hio ape. Me Jéhovah ahinga tënë ti bê ti awakua ti lo. Ni la lo tene na prophète Habakuk, lo tene: “Vision ni ayeke ndali ti ngoi so a fa ni awe, a yeke gue juska na nda ni, a yeke ga mvene pëpe. Même tongana a si hio pëpe, mo ngbâ ti ku ni! Nyen na nyen kue a yeke si. A yeke si na retard ape!” (Hab. 2:3). Eskê Nzapa atene atënë so gï na Habakuk awe? Wala atënë ti lo ni abâ nga e laso. Jéhovah atene na bazengele Paul ti tene atënë so na aChrétien so ayeke ku fini dunia kungo. (Diko aHébreu 10:36, 37.) Biani, e peut ti hinga na bê ti e kue so même tongana zendo ti zingo e akpa mbeni ye so asi hio ape, “nyen na nyen kue a yeke si. A yeke si na retard ape!”

17. Tongana nyen la mbeni ita-wali asara ye alingbi na wango so Jéhovah amû na Habakuk?

¹⁷ Awakua ti Jéhovah mingi asara ye alingbi na wango ti lo so lo hunda na e ti “ngbâ ti ku”, ala sara même ni teti angu mingi. Na tapande, Louise akomanse ti sara na Jéhovah na ngu 1939. Lo tene: “Na ngoi ni so, mbi pensé lani so Harmaguédon ayeke ga kozo si mbi hunzi mandango mbeti na lycée. Me a ga ape. Tongana angu ayeke hon, mbi bâ so ti diko ye so mbi iri ni ‘mbaï ti azo so aku’ so ayeke na yâ ti Bible a-aidé mbi mingi; mbaï ti azo tongana Noé, Abraham, Joseph nga na ambeni zo nde so aku aninga kozo si ala wara futa so Jéhovah amû zendo ni na ala. Ti mä na bê lakue so azendo ti Nzapa ayeke ga tâ tënë a-aidé mbi nga na ambeni zo ti hinga na bê ti e kue so fini dunia aga nduru mingi awe.” Awakua ti Jéhovah mingi so asara na lo teti angu mingi ayeda na tënë so.

18. Tongana nyen la ti bâ aye so Jéhovah acréé apeut ti kpengba mabe ti e so fini dunia ayeke ga?

¹⁸ Tâ tënë ade fini dunia asi ape. Me, gbu li na ndö ti ambeni ye so ayeke dä, na tapande atongoro, akeke, anyama nga na amba ti mo zo. Zo oko apeut ti dë kite ape so aye ni so ayeke dä vrai même si na ambeni ngoi ayeke lani dä ape. Laso ala yeke dä gï ndali ti so Jéhovah acréé ala (Gen. 1:1, 26, 27). Nzapa ti e amû nga zendo ti créé mbeni fini dunia. Lo yeke sara ye alingbi na ni. Na yâ ti fini dunia, azo ayeke ngbâ na fini lakue lakue nga na nzoni seni. E peut ti duti sûr so fini dunia ayeke si ande tâ na ngoi so Nzapa asoro.—És. 65:17; Apoc. 21:3, 4.

19. Tongana nyen la mo peut ti kpengba mabe ti mo?

¹⁹ Ti ku na ngoi ni so, sara ye kue so mo peut ti sara ti kpengba mabe ti mo. Kiri singila lakue ndali ti ye so a futa ti zi azo. Gbu li na ndö ti ngangu ti Jéhovah. Sara aye so ayeke sara si mo ga nduru na Jéhovah. Tongana mo sara tongaso, mo peut ti duti na popo ti azo so, “na lege ti mabe nga na kangango bê ti ku ye, awara azendo so a mû ni.”—aHéb. 6:11, 12; aRom. 5:5.