Jéhovah atene nyen na nyen lo yeke sara si sese aga Paradis

1. Tënë wa la prophète Ésaïe atene na amba ti lo azo ti Israël?

PROPHÈTE ÉSAÏE atene Jéhovah ayeke “Nzapa ti tâ tënë.” Tënë ti Hébreu so a kiri peko ni na “tâ tënë” aye ti tene “amen.” (És. 65:​16, kete tënë na gbe ni). “Amen” aye ti tene “zia a duti tongaso,” wala “biani.” Na yâ ti Bible, tongana a sara kua na tënë “amen” na ndö ti mbeni tënë so Jéhovah wala Jésus atene, a ye ti fa so tënë ni ayeke biani tâ tënë. Tongaso, tënë so Ésaïe atene na amba ti lo azo ti Israël ayeke polele: Tongana Jéhovah atene mbeni ye ayeke si, a yeke si biani. Jéhovah afa so tënë so ayeke tâ tënë na lege so lo sara ye alingbi na azendo ti lo kue.

2. Ngbanga ti nyen la e peut ti sara confiance na azendo ti Jéhovah na ndö ti kekereke ti e? Ahundango tënë wa la e yeke bâ ni?

² Eskê e peut nga ti duti na confiance so azendo so Jéhovah amû na ndö ti kekereke ti e ayeke ga tâ tënë? Nduru na ngu 800 na peko ti ngoi ti Ésaïe, bazengele Paul afa ndani so e peut lakue ti sara confiance na azendo ti Nzapa. Lo tene: ‘Nzapa alingbi ti tene mvene lâ oko pëpe.’ (aHéb. 6:18). Gï tongana ti so nzoni ngu nga na ngu so ayeke ingo alingbi pëpe ti sigi na yâ ti mbeni li ti ngu oko, tongaso Jéhovah, so tâ tënë alondo na lo, alingbi pëpe ti tene mvene. Ndani la e peut ti zia bê ti e kue na atënë kue so Jéhovah atene, so ti tene, na azendo kue so lo mû na ndö ti kekereke ti e. Na yâ ti article so, e yeke kiri tënë na ahunda so: Nyen la Jéhovah amû zendo ti mû na e na yâ ti angoi so ayeke ga? Tongana nyen la Jéhovah asara si e hinga biani so zendo so lo mû ayeke ga tâ tënë?

NYEN LA JÉHOVAH AMÛ ZENDO NI?

3. (a) Zendo wa la awakua ti Nzapa aye ni mingi? (Apocalypse 21:​3, 4). (b) Ambeni zo atene nyen na ngoi so e fa na ala zendo so?

³ Zendo so e yeke sara tënë na ndö ni ayeke mbeni zendo so awakua ti Nzapa na yâ ti dunia kue aye ni mingi. (Diko Apocalypse 21:​3, 4.) Jéhovah atene so mbeni lâ “kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe.” Mingi ti e ayeke diko aversê so na azo na fango tënë ti dë bê ti ala nga ti fa na ala gigi ayeke duti ande tongana nyen na yâ ti Paradis. Ambeni zo atene nyen na ngoi so e fa na ala zendo so? Ala peut ti tene: “Atënë ni so ayeke pendere, me mbi pensé so a peut ti ga tâ tënë ape.”

4. (a) Na ngoi so Jéhovah amû zendo ti Paradis, nyen la lo hinga so ayeke si na ngoi ti e? (b) Na ndö ti so Jéhovah amû zendo, nyen nga la lo sara?

⁴ Na ngoi so Jéhovah afa lani na Jean ti sû zendo na ndö ti Paradis, lo hinga lani so laso e yeke fa beku so na azo na ngoi so e yeke fa tënë ti Royaume. Jéhovah ahinga nga lani so a yeke duti ngangu na azo mingi ti yeda na zendo ti “afini ye” so (És. 42:9; 60:2; 2 aCor. 4:​3, 4). Tongaso, tongana nyen la e peut ti aidé azo ti yeda so aye so a sara tënë ni na Apocalypse 21:​3, 4 ayeke ga ande tâ tënë? Tongana nyen la e peut ti duti na confiance mingi na Jéhovah nga na azendo ti lo? Jéhovah amû pendere zendo so nga lo fa araison so ndali ni e peut ti sara confiance na ni. A yeke araison wa?

JÉHOVAH AFA SO NYEN NA NYEN ZENDO TI LO AYEKE GA TÂ TËNË

5. Araison wa la e yeke na ni ti sara confiance na zendo ti Nzapa na ndö ti Paradis? E yeke wara araison ni so na ndo wa?

⁵ E wara araison ti sara confiance na zendo ti Jéhovah na ndö ti Paradis na yâ ti aversê so, so atene: “Lo so aduti na ndö ti trône ni atene: ‘Bâ, mbi yeke sara si aye kue aga fini.’ Nga lo tene: ‘Mo sû atënë so na mbeti, ndali ti so atënë so ayeke atënë so a lingbi ti zia bê dä nga ayeke tâ tënë.’ Lo tene na mbi: ‘A sara aye so awe! Mbi yeke Alpha na Oméga, tongo nda ti ye nga na kongo nda ti ye.’”—Apoc. 21:​5, 6a.

6. Ngbanga ti nyen la atënë so ayeke na Apocalypse 21:​5, 6 asara si e yeke na confiance mingi na zendo ti Nzapa?

⁶ Ngbanga ti nyen la atënë so asara si e yeke na confiance mingi na zendo ti Nzapa? Buku Révélation : dénouement atene tënë so na ndö ti aversê so: “A yeke mo bâ mo tene Jéhovah asû maboko ti lo na gbe ti mbeni mbeti ndali ti awakua ti lo so ayeke be-ta-zo ti fa na ala so ala yeke wara ande anzoni ye so lo mû zendo ni.”b Zendo so Nzapa amû ayeke na Apocalypse 21:​3, 4. Me na pekoni na versê 5 na 6, e wara signature ti Jéhovah, so ti tene, ye so afa so nyen na nyen zendo ti lo so ayeke ga tâ tënë. Zia e bâ tongana nyen la Jéhovah afa so e peut ti sara confiance na lo.

7. Zo wa la akomanse ti sara tënë na versê 5? Ngbanga ti nyen la atënë ni so ayeke nde mingi?

⁷ Versê 5 ni akomanse na tënë so: “Lo so aduti na ndö ti trône ni atene.” (Apoc. 21:5a). Atënë so ayeke nde mingi ndali ti so a yeke oko ti angoi ota so Jéhovah wani asara tënë na yâ ti mbeti ti Apocalypse. A yeke mbeni ange wala même Jésus la atene tënë so ape, me a yeke Jéhovah wani. Ye so afa so e peut ti zia bê ti e kue na tënë so lo tene na pekoni. E tene tongaso ngbanga ti nyen? Ngbanga ti so Jéhovah “alingbi ti tene mvene pëpe”. (Tite 1:2). Tongaso, atënë so e diko na Apocalypse 21:​5, 6 ayeke ga ande tâ tënë biani.

“BÂ, MBI YEKE SARA SI AYE KUE AGA FINI”

8. Tënë wa la Jéhovah atene ti fa so zendo so lo mû ayeke ga ande tâ tënë biani? (Ésaïe 46:10).

⁸ Na pekoni Jéhovah atene: “Bâ.” (Apoc. 21:5). Tënë ti Grec so a kiri peko ni na “bâ,” a sara kua na ni fani mingi na yâ ti mbeti ti Apocalypse. Mbeni mbeti atene so a sara kua na tënë so “ti gboto lê ti zo so ayeke diko ni na ndö ti tënë so a yeke tene na pekoni.” Tënë ti nyen la Nzapa atene na pekoni? Nzapa atene: “Mbi yeke sara si aye kue aga fini.” Tâ tënë, Jéhovah ayeke sara tënë ti achangement so ayeke si ande, me na lo nyen na nyen a yeke ga ande tâ tënë, tongaso lo tene tënë ni mo bâ mo tene ye ni asi awe.—Diko Ésaïe 46:10.

9. (a) Tënë “sara si aye kue aga fini” aye ti sara tënë ti akua use wa so Jéhovah ayeke sara? (b) Nyen la ayeke si na “yayu” nga na “sese” so ayeke dä laso?

⁹ Jéhovah atene: “Mbi yeke sara si aye kue aga fini.” Tënë so aye ti tene nyen? Na yâ ti chapitre ti Bible so, tënë so aye ti sara tënë ti akua use so Jéhovah ayeke sara. Kozo ni, lo yeke futi sioni dunia so. Use ni, lo yeke ga na mbeni fini ni. Apocalypse 21:1 atene: “Ngbene yayu nga na ngbene sese ni ahon awe.” “Ngbene yayu” aye ti sara tënë ti agouvernement so ayeke na gbe ti Satan nga na asioni yingo ti lo (Mat. 4:​8, 9; 1 Jean 5:19). Tongana ti so a tene na yâ ti Bible, “sese” apeut ti sara tënë ti azo so ayeke na ndö ni (Gen. 11:1; Ps. 96:1). Tongaso, “ngbene sese” aye ti sara tënë ti asioni zo so ayeke na ndö ti sese laso. Jéhovah ayeke leke ande gï pëpe peko ti “yayu” nga na “sese” so ayeke dä, me lo yeke zi ni na lege so lo zia fini ni na place ni. Jéhovah ayeke changé ande yayu nga na sese ti laso na “mbeni fini yayu na mbeni fini sese”, so ti tene mbeni fini gouvernement nga na mbeni fini bungbi ti azo.

10. Nyen la Jéhovah ayeke sara ande si aga fini?

¹⁰ Na Apocalypse 21:​5, a sara tënë ti aye so Jéhovah atene lo yeke sara si aga fini. Bâ so Jéhovah atene ape atene: “Mbi yeke sara gï afini ye.” Me lo tene: “Mbi yeke sara si aye kue aga fini.” Jéhovah ayeke sara si sese nga na azo akiri fini na lege so lo yeke sara si ala ga mbilimbili-kue. Ésaïe atene lani kozo awe so sese kue ayeke ga ande mbeni pendere parc tongana yaka ti Éden. Jéhovah ayeke sara nga ande si e ga fini na lege so lo yeke sava e oko oko kue biani biani. A yeke sava ande azo so gere ti ala abuba, azo so abâ ndo ape nga na azo so amä ndo ape; a yeke kiri même na fini azo so akui awe.—És. 25:8; 35:​1-7.

“ATËNË SO AYEKE ATËNË SO A LINGBI TI ZIA BÊ DÄ NGA AYEKE TÂ TËNË. . . . A SARA AYE SO AWE!”

11. Nyen la Jéhovah atene na Jean ti sara? Ngbanga ti nyen?

¹¹ Mbeni tënë wa la Nzapa atene ti sara si e hinga so e peut ti sara confiance na lo? Jéhovah atene na Jean, atene: “Mo sû atënë so na mbeti, ndali ti so atënë so ayeke atënë so a lingbi ti zia bê dä nga ayeke tâ tënë.” (Apoc. 21:5). Jéhovah atene na Jean ti ‘sû atënë ni na mbeti,’ lo fa nga na lo raison ni. Lo tene: “Ndali ti so atënë so ayeke atënë so a lingbi ti zia bê dä nga ayeke tâ tënë.” E kiri singila na Jean so asara ye alingbi na commandement so ti ‘sû atënë ni na mbeti’. A sara si e peut ti diko zendo so Nzapa amû na ndö ti Paradis nga ti gbu li na ndö ti apendere ye so ayeke ku e.

12. Ngbanga ti nyen la Jéhovah atene: “A sara aye so awe!”

¹² Tënë ti nyen la Nzapa atene na pekoni? Lo tene: “A sara aye so awe!” (Apoc. 21:6). Fadeso Jéhovah asara tënë mo bâ mo tene aye kue so lo sara tënë ni na ndö ti Paradis so lo mû zendo ni asi awe. Lo peut biani ti tene tongaso ndali ti so ye oko apeut ti kanga lege na lo ape ti sara ye so lo leke na bê ti lo ti sara. Na pekoni, Jéhovah atene mbeni tënë nde so asara si e hinga biani so ye so lo mû zendo ni ayeke ga tâ tënë. Lo tene nyen?

“MBI YEKE ALPHA NA OMÉGA”

13. Ngbanga ti nyen la Jéhovah atene: “Mbi yeke Alpha na Oméga”?

¹³ Tongana ti so e tene fade, Jéhovah wani asara tënë fani ota na yâ ti avision so Jean abâ (Apoc. 1:8; 21:​5, 6; 22:13). Na angoi ni so, Jéhovah atene oko tënë so: “Mbi yeke Alpha na Oméga.” Alpha ayeke kozo lettre ti agere-mbeti ti Grec, na oméga ayeke ndangba ni. So Jéhovah asara kua na tënë “Alpha na Oméga,” a fa so tongana lo komanse mbeni ye lo yeke gue na ni juska lo hunzi ni nzoni.

14. (a) Mû mbeni tapande ti fa lawa la e peut ti tene so Jéhovah atene lani “Alpha” nga lawa la lo yeke tene ande “Oméga”. (b) Nyen la Genèse 2:​1-3 asara si e hinga ni biani?

¹⁴ Na peko ti so Jéhovah acréé Adam na Ève, lo fa ye so lo leke na bê ti lo ti sara ndali ti azo nga na sese. Bible atene: “Nzapa airi tënë nzoni na ndö ti ala nga lo tene na ala: ‘Ala dü, ala ga gbani, ala si ndö ti sese na ala sara si sese ni aga na gbe ti ala.’” (Gen. 1:28). Na ngoi ni so, e peut ti tene so Jéhovah atene lani “Alpha”. Lo fa polele ye so lo leke na bê ti lo ti sara: A si na mbeni ngoi, ahale ti Adam na Ève so ayeke mbilimbili-kue so amä yanga ayeke si ndö ti sese na ala yeke sara si sese aga Paradis. Tongana ngoi ni so asi ande, e peut ti tene so Jéhovah ayeke tene “Oméga”. Na peko ti so Jéhovah ahunzi ti créé “yayu na sese nga na aye kue so ayeke na yâ ni”, lo tene mbeni tënë ti fa so ye so leke na bê ti lo ti sara ayeke ga biani tâ tënë. Tënë ni so ayeke na Genèse 2:​1-3. (Diko ni.) Jéhovah azia lango mbasambala ni nde ndali ti lo. Tënë so aye ti tene nyen? Jéhovah afa so nyen na nyen lo yeke sara ye so lo leke na bê ti lo ti sara ndali ti azo nga na sese. Ti si na hunzingo ti lango mbasambala ni, lo yeke sara ye kue so lo leke na bê ti lo ti sara.

15. Ngbanga ti nyen la Satan apeut ti pensé so lo kanga lege na Nzapa awe ti sara ye so lo leke na bê ti lo ti sara ndali ti azo?

¹⁵ Na peko ti so Adam na Ève asara kpengba-li, ala ga awasiokpari nga ala ga na siokpari na kuâ na ndö ti ahale ti ala (aRom. 5:12). A sara si, na bango ni, lege ayeke dä ape ti tene azo so ayeke mbilimbili-kue nga so amä yanga asi ndö ti sese. Na bango ni, Satan akanga lege na Jéhovah ti tene “Oméga” mbeni lâ. Satan apeut ti pensé so Jéhovah apeut ti sara ye alingbi na zendo ti lo ape. Lo peut ti pensé so Nzapa ayeke fâ Adam na Ève nga lo créé mbeni fini couple so ayeke mbilimbili-kue ti sara ye so lo leke na bê ti lo ti sara ndali ti azo. Me tongana Nzapa asara tongaso, Zabolo apeut ti tene so Lo yeke zo ti mvene. Ngbanga ti nyen? Ngbanga ti so na Genèse 1:​28, Jéhovah atene lani na Adam na Ève so ahale ti ala ayeke si ndö ti sese.

16. Ngbanga ti nyen la Satan apeut ti pensé so Jéhovah apeut ti sara ye alingbi na zendo ti lo ape?

¹⁶ Mbeni ye wa la Satan apeut ti pensé so Nzapa ayeke sara ni? Peut-être Satan apensé so Jéhovah ayeke zia lege na Adam na Ève ti dü amolenge so ayeke mbilimbili-kue ape so ayeke ga mbilimbili-kue lâ oko ape (Zo-ti. 7:20; aRom. 3:23). Tongana amolenge ti Adam na Ève apeut ti ga mbilimbili-kue lâ oko ape, Zabolo ayeke tene so Jéhovah asara pëpe ye so lo leke na bê ti lo ti sara. Azo so ayeke mbilimbili-kue ayeke si ndö ti sese ape.

17. Tongana nyen la Jéhovah aleke kpale so aga na peko ti kpengba-li ti Satan nga na Adam na Ève? Nyen la ayeke si na nda ni? (Bâ nga foto.)

¹⁷ Jéhovah aleke kpale so aga na peko ti kpengba-li ti Satan nga na Adam na Ève na mbeni fason so Satan ahinga li ti lo na ni ape (Ps. 92:5). Jéhovah amû lani lege na Adam na Ève ti dü amolenge, tongaso atënë so lo tene aga tâ tënë. Lo yeke zo ti mvene ape. Jéhovah afa nga so tongana lo tene lo yeke sara mbeni ye, ye oko apeut ti kanga lege na lo ape. Lo sara kue ti tene ye so lo leke na bê ti lo ti sara aga tâ tënë na lege so lo sigi na mbeni “hale” so ayeke sö ahale ti Adam na Ève so amä yanga (Gen. 3:15; 22:18). Hale so amû fini ti lo tongana ye so a futa ti zi azo. Satan apensé na ni lâ oko ape. Ngbanga ti nyen? Ngbanga ti so tâ ndoye la apusu Jéhovah ti leke ye so (Mat. 20:28; Jean 3:16). Satan ayeke na tâ ndoye ape. Lo yeke zo ti kion. Tongaso, ye so a futa ti zi azo ayeke zi lege na nyen? Ti si na hunzingo ti komandema ti Ngu saki oko ti Christ, ahale ti Adam na Ève so ayeke mbilimbili-kue so amä yanga ayeke duti na yâ ti Paradis na ndö ti sese, gï tongana ti so Jéhovah aleke lani na bê ti lo ti sara na tongo nda ni. Na ngoi ni so, e peut ti tene so Jéhovah ayeke tene “Oméga”.

GI TI DUTI NA CONFIANCE MINGI NA ZENDO TI JÉHOVAH NA NDÖ TI PARADIS

18. Araison ota wa la asara si e hinga so Nzapa ayeke sara ye alingbi na zendo ti lo? (Bâ nga encadré “Araison ota ti sara confiance na zendo ti Jéhovah.”)

¹⁸ Na yâ ti article so, e bâ araison so ndali ni e peut ti duti sûr so sese ayeke ga ande Paradis. Tënë ti nyen la e peut ti tene na azo ti sara si ala hinga biani so sese ayeke ga Paradis? Kozo ni, Jéhovah wani la amû zendo ni. Mbeti ti Apocalypse atene: “Lo so aduti na ndö ti trône ni atene: ‘Bâ, mbi yeke sara si aye kue aga fini.’” Lo yeke na ndara, ngangu nga na nzara ti sara si zendo ti lo so aga tâ tënë. Use ni, Jéhovah ahinga so ye so lo tene ayeke si biani. Ndani la lo tene: “Atënë so ayeke atënë so a lingbi ti zia bê dä nga ayeke tâ tënë. . . . A sara aye so awe!” Ota ni, tongana Jéhovah akomanse ti sara mbeni ye, lo yeke gue na ni juska a hunzi nzoni. Ndani la lo tene: “Mbi yeke Alpha na Oméga.” Jéhovah ayeke fa ande so Satan ayeke zo ti mvene nga lo peut ti kanga lege na Jéhovah ape ti sara ye so lo leke na bê ti lo ti sara.

19. Tongana azo ayeke na kite na ndö ti zendo ti Nzapa na ndö ti Paradis, nyen la mo peut ti sara?

¹⁹ Girisa ape so lakue tongana mo fa na azo tënë so Jéhovah atene ti fa so nyen na nyen azendo ti lo ayeke ga tâ tënë, mo yeke duti na confiance mingi na lo. Ti peko, tongana mo diko na mbeni zo zendo ti Paradis so adë bê, so ayeke na Apocalypse 21:​4, na lo tene: “Atënë so ayeke pendere, me mbi pensé so a peut ti ga tâ tënë ape,” nyen la mo peut ti sara? Mo peut ti diko versê 5 na 6, na mo fa ndani na lo. Fa na lo so nyen na nyen Jéhovah ayeke sara si zendo ti lo aga tâ tënë, mo bâ mo tene lo sara signature ti lo na gbe ni.—És. 65:16.