Eskê Jéhovah ayeke kiri tënë na asambela ti mbi?

1-2. Ngbanga ti nyen la e peut ti bâ so Jéhovah ayeke kiri tënë na asambela ti e ape?

“GI TI wara ngia mingi na mbage ti Jéhovah, na lo yeke mû na mo aye so bê ti mo asara nzara ni.” (Ps. 37:4). So pendere zendo! Me eskê a yeke nzoni e ku ti tene Jéhovah amû na e aye kue so e hunda gï na lê ni lê ni? Ngbanga ti nyen la a yeke kota ye ti hunda tënë so? Bâ atapande so. Mbeni ita-wali so ayeke kumbamba asambela ti wara lege ti gue na Ekole ti awafango nzoni tënë ti Royaume. Ngu mingi ahon me a tisa lo ape. Mbeni ita-koli so ade maseka asambela ti wara sava na peko ti mbeni ngangu kobela so asara lo tongaso si lo peut ti sara kua mingi na yâ ti congrégation. Me seni ti lo aga nzoni ape. Mbeni babâ na mama so ayeke aChrétien asambela ti tene molenge ti ala angbâ na yâ ti tâ tënë. Me molenge ni asoro ti zia ti sara na Jéhovah.

² Peut-être mo nga kue mo hunda mbeni ye na Jéhovah awe, me mo wara ni ape. Ye so asara si mo peut ti pensé so Jéhovah ayeke kiri tënë gï na asambela ti ambeni zo me na ti mo ape. Wala mo peut ti pensé so âmanke mo sara mbeni ye so ayeke na lege ni ape. Mbeni ita-wali, so iri ti lo Janice,b apensé tongaso. Lo na koli ti lo asambela ndali ti so ala ye ti sara kua na Béthel. Lo tene: “Mbi yeke sûr lani so a yeke ninga ape e yeke lï na Béthel.” Me angu mingi na pekoni, ade couple ni alï Béthel ape. Janice atene: “Vundu asara mbi nga mbi hinga ye ti sara ape. Mbi hunda terê ti mbi ti hinga nyen la mbi sara so azia vundu na bê ti Jéhovah. Mbi sambela mingi na ndö ti lingo na Béthel. Ngbanga ti nyen la lo kiri tënë na asambela ti mbi ape?”

3. Nyen la e yeke bâ na yâ ti article so?

³ Na ambeni ngoi, e peut ti hunda terê ti e wala Jéhovah ayeke mä asambela ti e. Même ambeni koli be-ta-zo ti ândö agi bê ti ala tongaso (Job 30:20; Ps. 22:2; Hab. 1:2). Nyen la apeut ti sara si mo hinga biani so Jéhovah ayeke sara sanka ti asambela ti mo ape? (Ps. 65:2). Ti aidé e ti kiri tënë na hunda so, e bezoin kozo ni ti kiri tënë na ahunda so: (1) Nyen la e peut ti ku ti tene Jéhovah asara ni? (2) Nyen la Jéhovah aku ti tene e sara? (3) Ngbanga ti nyen la peut-être a yeke nzoni e changé ye so e hunda na yâ ti sambela?

NYEN LA E PEUT TI KU TI TENE JÉHOVAH ASARA NI?

4. Na Jérémie 29:​12, nyen la Jéhovah amû zendo ti sara?

⁴ Jéhovah amû zendo ti mä asambela ti e. (Diko Jérémie 29:12.) Nzapa ti e aye awakua ti lo so ayeke be-ta-zo, tongaso lo yeke sara sanka ti asambela ti ala lâ oko ape (Ps. 10:17; 37:28). Ye oko, so aye ti tene ape so lo yeke mû na e ye kue so e hunda. Peut-être e bezoin ti ku juska fini dunia ti wara ambeni ye so e hunda ni.

5. Nyen la Jéhovah ayeke bâ ni na ngoi so lo yeke mä asambela ti e? Fa ndani so mo tene tongaso.

⁵ Jéhovah ayeke bâ tongana nyen la aye so e hunda ague oko na ye so lo leke na bê ti lo ti sara (És. 55:​8, 9). Mbeni ye so lo ye ayeke ti tene sese asi singo na azo so ayeke na ngia so amä yanga ti lo tongana Mokonzi ti ala. Me Satan atene so azo ayeke duti nzoni mingi tongana ala komande na ndö ti ala wani (Gen. 3:​1-5). Ti fa so Zabolo atene mvene, Jéhovah azia lege na azo ti komande na ndö ti ala wani. Me, komandema ti azo asara si e yeke na gbâ ti akpale laso (Zo-ti. 8:9). E hinga so Jéhovah ayeke zi akpale so kue laso ape. Tongana lo sara ni, ambeni zo apeut ti tene so komandema ti zo ayeke nzoni nga apeut ti leke akpale ti azo.

6. Ngbanga ti nyen la e bezoin ti duti na confiance so Jéhovah ayeke sara lakue ye na ndoye nga na lege ni?

⁶ Jéhovah apeut ti kiri tënë na même ye so azo ayeke hunda na alege nde nde. Na tapande, na ngoi so terê ti Gbia Ézéchias ason ngangu, lo voro yanga na Jéhovah ti aidé lo ti wara sava. Na Jéhovah asava lo (2 aGbia 20:​1-6). Me na ngoi so bazengele Paul avoro yanga na Jéhovah ti zi mbeni “kî na yâ ti terê” ti lo, so ayeke peut-être mbeni kpale ti seni, Jéhovah azi kpale ni ape (2 aCor. 12:​7-9). Bâ nga tapande ti bazengele Jacques nga na bazengele Pierre. Gbia Hérode aye lani ti fâ ala use kue. Congrégation asambela ndali ti Pierre nga peut-être ndali ti Jacques kue. A fâ Jacques, me a zi Pierre na lege ti mbeni miracle (Kus. 12:​1-11). E peut ti hunda terê ti e, e tene: ‘Ngbanga ti nyen la Jéhovah asö Pierre me Jacques ape?’ Bible afa ape.c Ye so e peut ti duti sûr na ni ayeke so lo yeke “sara ye ti kirikiri lâ oko ape.” (Deut. 32:4). E hinga nga so Pierre na Jacques kue azia lani ngia na bê ti Jéhovah (Apoc. 21:14). Na ambeni ngoi, Jéhovah apeut ti kiri tënë na asambela ti e na lege so e ye ape. Me so e yeke sûr so Jéhovah ayeke sara lakue ye na ndoye nga na lege ni, e yeke dema terê ape na ndö ti fason so lo soro ti kiri tënë na asambela ti e.—Job 33:13.

7. Nyen la e yeke gi ti kpe ti sara? Ngbanga ti nyen?

⁷ E yeke gi ti kpe ti haka dutingo ti e na ti amba ti e. Na tapande, e peut ti hunda Jéhovah ti aidé e na mbeni mbilimbili lege, me lo sara ni ape. Na pekoni, e mä so mbeni ita ahunda mara ti ye so e hunda, nga na bango ni Jéhovah amû na lo ye so lo hunda. A yeke ye so asi na mbeni ita-wali so iri ti lo Anna. Lo sambela ti tene cancer ti koli ti lo Matthieu ahunzi. Na oko ngoi ni, ambeni ita-wali use so ayeke mbakoro ayeke nga na kobela ti cancer. Anna asambela ngangu ndali ti Matthieu nga na aita-wali ni. Aita-wali ni awara sava, me Matthieu akui. Na tongo nda ni, Anna ahunda terê ti lo wala Jéhovah a-aidé aita-wali so ti wara sava. Tongana a yeke tongaso, ngbanga ti nyen la Jéhovah asara pëpe si koli ti lo awara sava, tongana ti so lo hunda? Me e hinga ape tongana nyen la aita-wali use so awara sava. Ye so e hinga ayeke so Jéhovah ayeke hunzi apasi ti e kue, na lo yeke ku kungo ti zingo na kuâ akamarade ti lo so akui awe.—Job 14:15.

8. (a) Ti gue oko na Ésaïe 43:​2, tongana nyen la Jéhovah ayeke mû maboko na e? (b) Tongana nyen la sambela apeut ti aidé e na ngoi so e yeke na yâ ti angangu kpale? (Bâ vidéo Sambela a-aidé e ti gbu ngangu.)

⁸ Jéhovah ayeke mû maboko na e lakue. So Babâ ti e Jéhovah aye e, lo ye pëpe ti bâ e na yâ ti pasi (És. 63:9). Me, lo yeke kanga lege pëpe na akpale kue so e wara so a peut ti haka ni na akota ngu wala wâ. (Diko Ésaïe 43:2.) Ye oko, lo mû zendo ti aidé e ti “hon na yâ” ni. Nga, lo yeke zia pëpe si akpale so e wara asara sioni na e biani biani. Jéhovah ayeke mû nga na e ngangu yingo vulu ti lo ti aidé e ti gbu ngangu (Luc 11:13; aPhil. 4:13). A yeke sara si e duti na confiance so e yeke wara lakue tâ ye so e bezoin ni ti gbu ngangu nga ti ngbâ be-ta-zo na lo.d

NYEN LA JÉHOVAH AKU TI TENE E SARA?

9. Ti gue oko na Jacques 1:​6, 7, ngbanga ti nyen la e doit ti duti na confiance so Jéhovah ayeke aidé e?

⁹ Jéhovah aye ti tene e sara confiance na lo (aHéb. 11:6). Na ambeni ngoi, e peut ti bâ so e peut ti hon ndö ti akpale ti e ape. E peut même ti komanse ti duti na kite so Jéhovah ayeke aidé e. Me Bible atene so na lege ti ngangu ti Nzapa e peut ti “huru gbagba.” (Ps. 18:29). Tongaso, ahon ti duti na kite, a yeke nzoni e sambela na bê ti e kue, e hinga so Jéhovah ayeke kiri tënë na asambela ti e.—Diko Jacques 1:​6, 7.

10. Fa tongana nyen la e peut ti sara ye alingbi na asambela ti e.

¹⁰ Jéhovah aye ti tene e sara ye alingbi na asambela ti e. Na tapande, mbeni ita-koli apeut ti hunda Jéhovah ti aidé lo ti mû congé na place ti kua ti lo tongaso si lo peut ti gue na mbeni kota bungbi. Tongana nyen la Jéhovah apeut ti kiri tënë na sambela so? Lo peut ti mû na ita-koli ni courage so lo bezoin ni ti gue ti bâ patron ti lo. Me ita-koli ni abezoin ti gue ti bâ patron ti lo ni na ti hunda lo. Peut-être lo bezoin ti hunda lo fani mingi. Lo peut même ti hunda ti sara kua na place ti mbeni zo nde. Tongana bezoin ni ayeke dä, lo peut nga ti hunda ti tene a payé na lo congé ni ape.

11. Ngbanga ti nyen la a yeke nzoni e sambela fani mingi ndali ti aye so e gi bê ti e dä?

¹¹ Jéhovah aye ti tene e sambela fani mingi ndali ti aye so e gi bê ti e dä (1 aThes. 5:17). Jésus afa lani so Jéhovah ayeke mû na e ambeni ye so e hunda na lê ni lê ni ape (Luc 11:9). Tongaso découragé ape. Sambela na bê ti mo kue fani mingi (Luc 18:​1-7). Tongana e ngbâ ti sambela ndali ti mbeni ye, e yeke fa na Jéhovah so ye so e hunda ayeke kota ye mingi na e. E yeke fa nga so e yeke na mabe so lo yeke na ngangu ti aidé e.

NGBANGA TI NYEN LA PEUT-ÊTRE A YEKE NZONI E CHANGÉ YE SO E HUNDA NA YÂ TI SAMBELA?

12. (a) Mbeni hunda wa la a yeke nzoni e hunda terê ti e na ni na ndö ti aye so e sambela ndali ni? Ngbanga ti nyen? (b) Tongana nyen la e peut ti sara kue ti tene asambela ti e afa so e ne Jéhovah? (Bâ encadré “Eskê aye so mbi hunda afa so mbi ne Jéhovah?”)

¹² Tongana e wara ape aye so e hunda na yâ ti sambela, e peut ti hunda terê ti e na ahunda ota. Kozo hunda ni ayeke so: ‘Eskê ye so mbi yeke hunda ayeke na lege ni?’ Mingi ni e yeke pensé ka so e hinga ye so ayeke nzoni mingi ndali ti e. Me tongana ngoi ayeke hon aye so e hunda apeut ti ga na e nzoni ye ape. Tongana e yeke sambela ndali ti mbeni kpale, peut-être mbeni nzoni lege ti leke ni ayeke dä ahon ti so e hunda. Na ambeni ye so e hunda apeut ti gue oko na ye so Jéhovah aye ape (1 Jean 5:14). Na tapande, gbu li na ndö ti babâ na mama so e sara tënë ti ala fade. Ala hunda Jéhovah ti sara si molenge ti ala angbâ na yâ ti tâ tënë. Na bango ni ye so ala hunda ayeke na lege ni. Me, Jéhovah ayeke forcé mbeni zo ti sara na lo ape. Lo ye ti tene e kue, nga na amolenge ti e, e soro ti voro lo (Deut. 10:​12, 13; 30:​19, 20). Tongaso babâ na mama ni adoit fade ti hunda Jéhovah ti aidé ala ti ndu bê ti molenge ti ala tongaso si bê ti lo apusu lo ti ye Jéhovah nga ti ga kamarade ti Lo.—aProv. 22:6; aÉph. 6:4.

13. Ti gue oko na aHébreu 4:​16, na ngoi wa la Jéhovah ayeke aidé e? Fa ndani so mo tene tongaso.

¹³ Use hunda ni ayeke so: ‘Eskê ngoi ti tene Jéhovah akiri tënë na sambela ti mbi ni la?’ E peut ti bâ so e bezoin ti tene Jéhovah akiri tënë na asambela ti e na lê ni lê ni. Me ti vrai ni, Jéhovah ahinga nzoni ngoi ti aidé e. (Diko aHébreu 4:16.) Tongana e wara ape ye so e hunda ti tene Jéhovah amû na e na lê ni lê ni, e peut ti pensé so kiringo tënë ti Jéhovah ayeke ‘Ên-ën.’ Me ti vrai ni, kiringo tënë ti lo apeut ti duti ‘Ade.’ Na tapande, kiri mo gbu li na ndö ti ita-koli so ade maseka so asambela fade ti wara sava. Tongana Jéhovah asava lo na lege ti miracle, Satan apeut ti tene so ita ni angbâ ti sara na Jéhovah gï ndali ti so lo sava lo (Job 1:​9-11; 2:4). Na ndö ni, Jéhovah aleke awe ngoi so lo yeke sava ande akobela kue (És. 33:24; Apoc. 21:​3, 4). Juska ti si na ngoi ni so, Jéhovah apeut ti sava e na lege ti miracle ape. Tongaso, ita-koli ni apeut ti hunda Jéhovah ti mû na lo ngangu nga na siriri ti bê ti gbu ngangu na yâ ti kobela ti lo ni nga ti ngbâ ti sara na lo be-ta-zo.—Ps. 29:11.

14. Nyen la mo manda na lege ti ye so asi na Janice?

¹⁴ Gbu li na ndö ti Janice, so asambela lani ti sara kua na Béthel. Ngu oku ahon awe la lo ga ti comprendre tongana nyen la Jéhovah akiri tënë na sambela ti lo. Lo tene: “Jéhovah amû ngoi ni so ti fa ye na mbi nga ti leke mbi. Mbi bezoin lani ti sara confiance na lo mingi. Mbi bezoin lani ti maï kode ti mandango ye mbi wani. Mbi bezoin nga lani ti hinga so mbi peut ti duti na ngia atâa ndo wa la mbi yeke sara na Jéhovah dä.” Ambeni ngoi na pekoni, a tisa Janice na koli ti lo ti sara kua ti circonscription. Janice adabe ti lo na ngoi ni so, lo tene: “Jéhovah akiri lani tënë na asambela ti mbi na fason so mbi ku terê ti mbi na ni ape. Ngoi ahon mingi awe la mbi ga ti hinga so kiringo tënë ti Jéhovah na sambela ti mbi ayeke lani pendere mingi, mbi kiri singila mingi na lo ndali ti ndoye nga na nzoni bê ti lo na mbage ti mbi.”

15. Ngbanga ti nyen la peut-être a yeke nzoni e sambela gï ndali ti mbeni ye oko ape? (Bâ nga afoto.)

¹⁵ Ota hundango tënë ni ayeke so: ‘Eskê a yeke nzoni mbi sambela ndali ti mbeni ye nde?’ A yeke nzoni ti sambela ndali ti mbeni mbilimbili ye. Me na ambeni ngoi peut-être a yeke nzoni ti sambela gï ndali ti mbeni ye oko ape, tongaso si e peut ti hinga ye so Jéhovah aye ndali ti e. Gbu li na ndö ti tapande ti ita-wali kumbamba so asambela ti gue na Ekole ti awafango nzoni tënë ti Royaume. Lo ye ti gue na ekole ni tongaso si lo peut ti gue ti fa tënë na ndo so a bezoin awafango tënë mingi dä. Na ngoi so lo engbâ ti sambela ti gue na ekole ni, lo peut nga ti hunda Jéhovah ti aidé lo ti bâ ambeni ye so lo peut ti sara ti sara kua ti lo mingi (Kus. 16:​9, 10). Na pekoni, lo peut ti sara ye alingbi na sambela so na lege so lo hunda surveillant ti circonscription ti hinga mbeni congrégation so ayeke nduru na lo so abezoin apionnier. Wala lo peut ti tokua mbeti na mbeni filiale ti hunda mbeni ndo so abezoin awafango tënë dä mingi.e

16. Nyen la e peut ti duti na confiance na ni?

¹⁶ Tongana ti so e bâ, e peut ti duti na confiance so Jéhovah ayeke kiri tënë na asambela ti e na lege ti ndoye nga na lege ni (Ps. 4:3; És. 30:18). Na ambeni ngoi, e peut ti wara kiringo tënë so e ye ape. Me Jéhovah ayeke sara sanka ti asambela ti e lâ oko ape. Lo ye e mingi. Nga lo yeke dö e lâ oko ti zia ape (Ps. 9:10). Tongaso, ngbâ ti ‘zia bê ti mo na ndö ti lo na ngoi kue,’ zi bê ti mo na lo na yâ ti sambela.—Ps. 62:8.