Zia si ndoye apusu mo ti ngbâ ti fa tënë

1. Nyen la e manda lani na ngoi ti réunion annuelle ti ngu 2023?

NA NGOI ti réunion annuelle ti ngu 2023,a e wara lani afini pendere fango nda ti ye na ndö ti ambeni ye so e mä na bê na ni nga e mä ambeni tokua so andu kua ti e ti fango tënë. Na tapande, e manda lani so peut-être ambeni zo ayeke wara ande pasa ti mû mbage ti Jéhovah même na peko ti so a futi Babylone, Ngangu gbata. E mä nga lani so a komanse na novembre 2023, a yeke hunda encore na awafango tënë ape ti fa l’heure so ala sara na fango tënë. Eskê achangement so asara si kua ti e ti fango tënë ayeke encore kota ye ape? Oko ape!

2. So alango ayeke hon, ngbanga ti nyen la kua ti e ti fango tënë aga ye so e doit ti sara ni hio? (Marc 13:10).

² So alango ayeke hon, kua ti e ti fango tënë aga ye so e doit ti sara ni hio mingi ahon ti kozo. Ngbanga ti nyen? Ngbanga ti so ngoi angbâ mingi ape. Gbu li na ndö ti tënë so Jésus atene lani na ndö ti kua ti fango tënë na lâ ti nda ni so. (Diko Marc 13:10.) Na yâ ti mara tënë ni so, so ayeke na mbeti ti Matthieu, Jésus atene so a yeke fa nzoni tënë na ndö ti sese kue so azo ayeke dä kozo si “nda ni” aga (Mat. 24:14). Nda ni aye ti sara tënë ti hunzingo ti sioni dunia ti Satan so. Jéhovah afa awe ‘lango nga na l’heure’ so aye so ayeke si ande na ni (Mat. 24:36; 25:13; Kus. 1:7). So alango ayeke hon, e ga nduru mingi na lango ni so (aRom. 13:11). Juska ti tene nda ni asi, e doit ti ngbâ ti fa tënë.

3. Nyen la ayeke pusu e ti fa tënë?

³ Bâ mbeni kota hunda so e kue e ye ti gbu li na ndö ni la: E yeke fa nzoni tene ngbanga ti nyen? Na nduru tënë, ndoye la ayeke pusu e ti fa tënë. Na ngoi so e yeke fa tënë, e fa so e ndoye nzoni tënë, e ndoye azo nga ye so ayeke kota mingi ayeke so e ndoye Jéhovah nga na iri ti lo. Zia e bâ aye so oko na oko.

E YEKE FA TËNË NDALI TI SO E NDOYE NZONI TËNË

4. Tongana e mä mbeni nzoni tënë, e yeke sara ye tongana nyen?

⁴ Na ngoi so mo mä lani ambeni nzoni tënë, a sara mo tongana nyen? Peut-être mo mä so a dü mbeni fini bébé na yâ ti sewa ti mo wala mo wara mbeni kua so mo yeke tâ na bezoin ni. Kite ayeke dä ape so a nzere lani na mo mingi ti fa ni na afami ti mo nga na akamarade ti mo. Eskê terê ti mo anzere nga tongaso na ngoi so mo mä tënë so ayeke nzoni mingi, so ayeke nzoni tënë ti Royaume ti Nzapa?

5. Na ngoi so mo mä ti kozoni tâ tënë ti Bible, a sara lani mo tongana nyen? (Bâ nga afoto.)

⁵ Gbu li na ndö ti fason so mo sara ye na ngoi so mo mä ti kozoni tâ tënë ti Bible. Mo manda lani so Babâ ti mo ti yayu aye mo, lo ye ti tene mo duti na yâ ti sewa ti azo so avoro lo; mo manda nga lani so lo mû zendo so lo yeke hunzi apasi nga so mo peut ti kiri ti bâ azo ti mo so mo ye ala so akui na yâ ti fini dunia, mo manda nga gbâ ti ambeni ye (Marc 10:​29, 30; Jean 5:​28, 29; aRom. 8:​38, 39; Apoc. 21:​3, 4). Atâ tënë so anzere lani na mo mingi (Luc 24:32). Mo ye lani mingi aye so mo yeke manda nga mo ye ti fa ni na azo kue.—Bâ Jérémie 20:9.

6. Nyen la mo manda na lege ti ye so asi na Ernest na Rose?

⁶ Gbu li na ndö ti mbeni ye so asi. Mbeni ita-koli, so iri ti lo Ernest,b aperdre babâ ti lo na ngoi so lo yeke na ngu bale-oko. Ernest atene: “Mbi yeke hunda terê ti mbi lani: ‘Eskê lo gue na yayu? Wala so lo kui awe so, ti lo awe la?’ Mbi yeke sara bê lani na terê ti amolenge so babâ ti ala angbâ.” Ernest ayeke gue lani lakue na cimetière, lo sara agenou na terê ti dû ti kuâ ti babâ ti lo na lo sambela, lo tene: “Pardon Nzapa, mbi ye ti hinga ndo so Papa ayeke dä.” Nduru na ngu 17 na peko ti kuâ ti babâ ti Ernest, mbeni zo ahunda ti manda Bible na lo, hio lo yeda na ni. So lo manda so akuâ ahinga ye ape, a yeke mo bâ mo tene ala yeke na yâ ti kota lango nga so a yeke zingo ande akuâ, a pika lani bê ti lo mingi (Zo-ti. 9:​5, 10; Kus. 24:15). Na nda ni, lo wara kiringo tënë na ahunda so lo yeke hunda lani terê ti lo na ni a sara angu awe. Atâ tënë ti Bible so Ernest ayeke manda lani anzere na lo mingi. Wali ti lo Rose ayeda nga ti manda Bible na lo nga lo ye aye so lo yeke manda. Na ngu 1978, ala wara batême. Ala yapu ti fa na afami ti ala, akamarade ti ala nga na ambeni zo apendere tâ tënë so ala manda. A sara si Ernest na Rose amû maboko na azo ahon 70 ti hinga Jéhovah nga ti wara batême.

7. Nyen la ayeke passé tongana atâ tënë ti Bible agbu bê ti e? (Luc 6:45).

⁷ A yeke polele, tongana atâ tënë ti Bible agbu bê ti e, e peut ti kanga yanga ti e ape. (Diko Luc 6:45.) Tënë ti bê ti e ague oko na ti akozo disciple ti Jésus so atene: “E lingbi ti kaï pëpe ti sara tënë na ndö ti aye so e bâ na e mä.” (Kus. 4:20). E ye tâ tënë mingi ni la e ye ti fa ni na azo mingi.

E YEKE FA TËNË NDALI TI SO E NDOYE AZO

8. Ngbanga ti nyen la e ye ti fa nzoni tënë na azo? (Bâ encadré “Ndoye azo: Sara adisciple.”) (Bâ nga foto.)

⁸ E ye azo tongana ti so Jéhovah na Molenge ti lo aye ala (aProv. 8:31; Jean 3:16). E bâ mingi mawa ti azo so ayeke na “Nzapa pëpe” nga so ayeke na “beku oko pëpe”. (aÉph. 2:12). Ndali ti so azo ayeke na akpale mingi, ala peut ti bâ so ala yeke na yâ ti mbeni dû so alï mingi, me e yeke na mbeni kamba so e peut ti gboto ala na ni na gigi: kamba ni ayeke nzoni tënë ti Royaume ti Nzapa. So e ye ala nga e bâ mawa ti ala, e ye ti sara ye kue so e peut ti sara ti fa nzoni tënë na ala. Tongana ala mä ni, a peut ti mû na ala beku, a peut ti aidé ala ti duti na ngia même laso nga a peut ti mû lege na ala ti tene mbeni lâ ala duti na “tâ fini”, so ti tene, fini ti lakue lakue na yâ ti fini dunia ti Nzapa.—1 Tim. 6:19.

9. Tënë ti gbotongo mê wa la e yeke fa na azo na ndö ti kekereke? Ngbanga ti nyen? (Ézéchiel 33:​7, 8).

⁹ So e ye azo apusu e ti fa nga na ala so Nzapa aga nduru awe ti futi sioni dunia so. (Diko Ézéchiel 33:​7, 8.) E yeke bâ mawa ti avoizin ti e nga na afami ti e so ayeke aTémoin ape. Azo mingi ayeke vivre sân ti hinga ye so ayeke ga: ‘kota ye ti vundu, so mara ni ade ti si lâ oko pëpe ngbene ye so dunia abâ gigi juska fadeso, na mara ni ayeke kiri ti si ande mbeni pëpe.’ (Mat. 24:21). E ye ti tene ala hinga ye so ayeke si ande na ngoi ti fango ngbanga so: kozoni, a yeke futi ande abungbi ti vorongo nzapa ti wataka kue, na pekoni a yeke futi tanga ti sioni dunia ti Satan kue na Harmaguédon (Apoc. 16:​14, 16; 17:​16, 17; 19:​11, 19, 20). E sambela ti tene azo mingi ayeda na gbotongo mê so nga ala ga ti tene e na ala e voro Jéhovah laso. Me ka ti azo so ake ti mä gbotongo mê so laso so na popo ni a yeke wara azo ti sewa ti e so e ye ala mingi?

10. Ngbanga ti nyen la a yeke kota ye ti ngbâ ti fa na azo ye so ayeke si fafadeso?

¹⁰ Tongana ti so a fa na yâ ti article so ahon, peut-être ye so bê ti Jéhovah aye ayeke ti sö azo so achangé bê ti ala na ngoi so ala bâ futingo Babylone, Ngangu gbata. Tongana a yeke tongaso, a yeke tâ kota ye mingi ti ngbâ ti sara tënë ni na azo. Gbu li na ndö ti ye so: Ye so e yeke fa na ala laso, ala peut ti dabe ti ala na ni ande. (Bâ Ézéchiel 33:33.) Peut-être ala yeke dabe ti ala na gbotongo mê so ala mä na mbage ti e laso na apusu ala ti ga ti tene e na ala e voro Jéhovah kozo si ngoi ayeke dä encore ape ti sara ni. Legeoko tongana zo ti batango da ti kanga na Philippes, so achangé lani bê ti lo na peko ti so sese ayengi ngangu, ambeni zo so laso amä e ape apeut ti changé bê ti ala na ngoi so ala bâ futingo Babylone, Ngangu gbata so ahon gbungo li ti zo.—Kus. 16:​25-34.

E YEKE FA TËNË NDALI TI SO E NDOYE JÉHOVAH NGA NA IRI TI LO

11. Tongana nyen la e yeke mû na Jéhovah gloire, nengo nga na ngangu? (Apocalypse 4:11). (Bâ nga afoto.)

¹¹ Kota raison so ndali ni e yeke fa nzoni tënë ayeke ndali ti so e ndoye Jéhovah Nzapa nga na iri ti lo so ayeke nzoni-kue. E bâ kua ti e ti fango tënë tongana mbeni lege ti mû gonda na Nzapa so e ye lo. (Diko Apocalypse 4:11.) Na bê ti e kue, e yeda na tënë so: Jéhovah, mo so mo yeke Nzapa ti e, mo lingbi biani ti wara gloire, nengo nga na ngangu. E yeke mû na lo gloire nga na nengo na ngoi so e yeke fa na azo aye so afa polele so lo la lo “sara aye kue” nga e yeke na fini grâce na lo. E yeke mû na lo ngangu, so ti tene ngangu ti e, tongana e sara kua na ngoi ti e, ngangu ti e nga na aye ti e ti fa tënë mingi alingbi na dutingo ti e (Mat. 6:33; Luc 13:24; aCol. 3:23). Na nduru tënë, e ye mingi ti sara tënë na ndö ti Nzapa so e ye lo na azo. Bê ti e apusu nga e ti fa na azo iri ti lo nga na mara ti Nzapa so lo yeke ni. Ngbanga ti nyen?

12. Na fango tënë, e yeke sara si iri ti Jéhovah aga nzoni-kue tongana nyen?

¹² Yengo so e ye na Jéhovah apusu e ti sara si iri ti lo aga nzoni-kue (Mat. 6:9). Ye so aye ti tene so e ye ti fa na azo so asioni tënë so Satan atene na ndö ti Jéhovah ayeke tâ tënë ape (Gen. 3:​1-5; Job 2:4; Jean 8:44). Na fango tënë, e ye mingi ti mû mbage ti Nzapa ti e na fango tâ tënë na ndö ti lo na azo kue so ayeke mä e. E ye ti fa na azo kue so sarango ye ti lo so ayeke kota mingi ayeke ndoye, so fason so lo yeke komande na ni ayeke na lege ni nga so fafadeso Royaume ti lo ayeke hunzi apasi kue nga ayeke ga na siriri nga na ngia na azo kue (Ps. 37:​10, 11, 29; 1 Jean 4:8). Na ngoi so e yeke gbu koko ti iri ti Jéhovah na fango tënë, e yeke sara si iri ti lo aga nzoni-kue. E yeke nga na ngia ti hinga so e yeke sara ye alingbi na iri ti e ti Témoin ti Jéhovah. E yeke sara ni tongana nyen?

13. Ngbanga ti nyen la e bâ so a ne e so a iri e aTémoin ti Jéhovah? (Ésaïe 43:​10-12).

¹³ Jéhovah asoro e ti duti “atémoin” ti lo. (Diko Ésaïe 43:​10-12.) A sara ambeni ngu awe, mbeni lettre so alondo na Bebungbi atene tënë so: “So a iri e aTémoin ti Jéhovah, mbeni nengo ti lingbi na ni ayeke dä ape.”c Ngbanga ti nyen la e tene tongaso? Gbu li na ndö ti tapande so. Imaginé so a bi tënë na li ti mo a tene mo sara mbeni sioni ye, fadeso mo bezoin mbeni zo ti tene so atënë ni so ayeke mvene nga so mo yeke nzoni zo so ayeke sara mara ye ni so lâ oko ape. Zo wa la mo yeke soro lo? Kite ayeke dä ape so mo yeke soro mbeni zo so mo hinga lo so mo sara confiance na lo, so ayeke na anzoni sarango ye so azo apeut ti yeda na tënë so lo tene. So Jéhovah asoro e ti duti aTémoin ti lo, lo fa so lo hinga e nzoni nga so lo sara confiance na e ti fa na azo so gï lo oko la lo yeke tâ Nzapa. E bâ so Jéhovah ane e mingi la lo soro e ti duti aTémoin ti lo. Tongaso, e yeke gbu alege kue so azi na e ti sara si azo ahinga iri ti lo nga ti fa na azo so asioni tënë so a tene na iri ti lo ayeke tâ tënë ape. Na sarango tongaso, e sara ye alingbi na iri so ayeke na ndö ti e, aTémoin ti Jéhovah.—Ps. 83:18; aRom. 10:​13-15.

E YEKE NGBÂ TI FA TËNË JUSKA NDA NI AGA

14. Apendere ye wa la ayeke si fafadeso?

¹⁴ E yeke ku kungo ti bâ aye so aga nduru ti si. Grâce na mungo maboko ti Jéhovah, e yeke na beku ti bâ gbâ ti azo ayeda na tâ tënë kozo si kota ye ti vundu akomanse. A nzere nga na e mingi so même na ngoi ti kota ye ti vundu so ayeke ngangu mingi ahon atanga ni, gbâ ti azo apeut ti sigi na yâ ti dunia ti Satan ti ga ti tene e na ala e sepela Jéhovah.—Kus. 13:48.

15-16. Nyen la e yeke ngbâ ti sara ni? E yeke sara ni juska lawa?

¹⁵ Juska ti si na ngoi ni so, e yeke na mbeni kota kua ti sara. Mbeni kua so e yeke kiri ti sara ni encore ape. E yeke na pasa ti fa nzoni tënë ti Royaume ti Nzapa na ndö ti sese kue. Na oko ngoi ni, e doit ti ngbâ ti gboto mê ti azo. Azo abezoin ti hinga so a ga nduru awe ti futi asioni ye ti dunia so. Na pekoni, na ngoi so lâ ti fango ngbanga asi, ala yeke hinga ande so tënë so e yeke fa lani alondo na Jéhovah Nzapa.—Ézéch. 38:23.

¹⁶ Tongaso, nyen la e leke na bê ti e ti ngbâ ti sara? Ndoye ti e ndali ti nzoni tënë, ndali ti azo nga kota ni kue, ndoye ti e ndali ti Jéhovah Nzapa nga na iri ti lo ayeke pusu e ti duti na nzara mingi ti fa tënë. E yeke fa ni hio nga e yeke yapu ti fa ni juska Jéhovah atene alingbi awe.