Nyen la e manda na lege ti andangba lango 40 ti Jésus na sese?

1-2. Nyen la asi na ngoi so adisciple ti Jésus use ayeke gue na Emmaüs?

NA LANGO 16 ti Nisan ti ngu 33, vundu nga na mbeto ahon ndö ti adisciple ti Jésus. Ambeni use aquitté Jérusalem ala yeke gue na Emmaüs, mbeni kete kodro so ayo na Jérusalem kilomètre 11. Akoli so adécouragé kue ndali ti so a londo ti fâ Jésus so ala yeke mû lani peko ti lo. Ala yeke lani na beku ti tene Messie asara apendere ye ndali ti aJuif, me fadeso lo kui awe. Me mbeni ye so akoli so aku terê ti ala na ni ape asi.

² Mbeni zo so ala hinga lo ape aga na terê ti ala na lo na ala ayeke tambela. Adisciple ni afa na lo ye so asi na Jésus so amû vundu na ala. Koli ni akomanse ti sara lisoro na ala na ndö ti aye so ala yeke girisa ni lâ oko ape. “A komanse na Moïse nga na ambeti ti aProphète kue,” lo fa na ala ndani so Messie adoit ti bâ pasi nga ti kui. Na ngoi so ala si na Emmaüs, ala ga ti bâ so koli ni so ayeke Jésus so Nzapa azingo lo na kuâ. Imaginé ngia so adisciple ni ayeke lani na ni ti hinga so Messie ayeke na fini.—Luc 24:​13-35.

3-4. Nyen la asi lani na adisciple ti Jésus? Nyen la e yeke bâ na yâ ti article so? (Kusala 1:3).

³ Jésus asi na adisciple ti lo fani mingi na yâ ti andangba lango 40 so lo sara na sese. (Diko Kusala 1:3.) Na ngoi ni so, Jésus akpengba adisciple ti lo so vundu nga na mbeto asara ala lani. Terê ti ala anzere na ala wara ngangu ti gue ti fa nzoni tënë nga ti fa ye na azo na ndö ti Royaume.a

⁴ E peut ti wara aye ti nzoni mingi tongana e manda ye na ndö ti aye so Jésus asara na ngoi ni so. Na yâ ti article so, e yeke bâ tongana nyen la Jésus asara kua na ngoi ni so (1) ti kpengba adisciple ti lo, (2) ti aidé ala ti mä yâ ti Mbeti ti Nzapa nzoni nga (3) ti fa na ala tongana nyen ti sara kua so ayeke ku ala. Na yâ ti aye so oko na oko kue, e yeke bâ tongana nyen la e peut ti mû tapande ti Jésus.

KPENGBA AMBA TI MO

5. Ngbanga ti nyen la adisciple ti Jésus abezoin lani ti tene a kpengba ala?

⁵ Adisciple ti Jésus abezoin lani ti tene a kpengba ala. Ngbanga ti nyen? Ambeni azia lani da ti ala, sewa ti ala nga na akua ti ala ti mû peko ti Jésus na ngoi kue (Mat. 19:27). A sara ye lani na ambeni na lege ni ape ndali ti so ala ga adisciple ti lo (Jean 9:22). Ala sara lani asacrifice so ndali ti so ala mä na bê so Jésus ayeke Messie so Nzapa amû zendo ti lo (Mat. 16:16). Me na ngoi so a fâ Jésus, ala yeke na beku encore ape nga ala découragé kue.

6. Nyen la Jésus asara lani na peko ti so a zingo lo na kuâ?

⁶ Jésus acomprendre lani so a yeke na lege ni so adisciple ti lo asara vundu ndali ti so lo kui. Lo hinga nga so vundu so asara ala ayeke pëpe ngbanga ti so ala yeke na mabe ape. Tongaso, gï na lango so a zingo lo na kuâ, lo komanse ti kpengba akamarade ti lo. Na tapande, lo si na Marie ti Magdala na ngoi so lo ngbâ ti toto na yanga ti dû ti kuâ ti lo (Jean 20:​11, 16). Lo si nga na adisciple use so e sara tënë ti ala fade na tongo nda ti article so. Lo si nga lani na bazengele Pierre (Luc 24:34). Nyen la e peut ti manda na lege ti tapande ti Jésus? Zia e gbu li na ndö ti ye so asi na ngoi so lo si na Marie ti Magdala.

7. Nyen la Jésus abâ lani Marie ayeke sara? Nyen la lo sara ndali ti lo? (Jean 20:​11-16). (Bâ nga foto.)

⁷ Diko Jean 20:​11-16. Na kota ndapre ti lango 16 ti Nisan, ambeni wali so ayeke be-ta-zo ague na ndo so a lu kuâ ti Jésus dä (Luc 24:​1, 10). Zia e sara tënë na ndö ti ye so asi na mbeni wali ni oko, Marie ti Magdala. Na ngoi so lo si na dû ti kuâ ni, lo bâ so yâ ni ayeke senge. Lo mû loro lo tene na Pierre na Jean; ala mû loro ala gue na yanga ti dû ni na lo tï na peko ti ala. Na peko ti so akoli so abâ so yâ ti dû ni ayeke senge, ala kiri na kodro. Me Marie angbâ ti lo kâ. Lo ngbâ kâ, lo yeke toto. Lo hinga ape so Jésus ayeke bâ lo. Lo bâ lani so wali ni ayeke toto lo na lo ye ti dë bê ti lo. Na pekoni, lo si na Marie na lo sara mbeni ye so akpengba lo mingi. Lo sara tënë na lo nga lo mû na lo mbeni kpengba kua so ayeke ti fa tënë ti zingongo ti lo na kuâ na aita ti lo.—Jean 20:​17, 18.

8. Tongana nyen la e peut ti sara ye tongana Jésus?

⁸ Tongana nyen la e peut ti sara ye tongana Jésus? E yeke mû tapande ti Jésus tongana e wa aita ti e ti ngbâ ti sara na Jéhovah. Tongana ti Jésus, e bezoin ti gi ti hinga akpale ti ala, ti comprendre ala nga ti dë bê ti ala. Zia e bâ ye so asi na mbeni ita-wali so iri ti lo Jocelyne, so ita ti lo ti wali akui na yâ ti mbeni ngangu accident. Lo tene: “Teti anze mingi, vundu ahon ndö ti mbi.” Ye oko, mbeni ita-koli na wali ti lo atisa lo na ndo ti ala na ala zia lege na lo ti fa atënë ti bê ti lo. Ala mä lo nzoni, ala sara ye na lo na nzoni bê nga ala tene na lo so Jéhovah aye lo mingi. Jocelyne atene: “Mbi bâ so Jéhovah asara kua na ala ti sigi na mbi na yâ ti kota ngu so kota mapo aya dä. Ala aidé mbi ti kiri ti duti na nzara ti ngbâ ti sara na Jéhovah.” E nga kue, e peut ti kpengba amba ti e tongana e mä ala nzoni na ngoi so ala yeke fa atënë ti bê ti ala. Tongana e sara tongaso, e peut ti dë bê ti ala nga ti aidé ala ti ngbâ ti sara na Jéhovah.—aRom. 12:15.

AIDÉ AMBA TI MO TI MÄ YÂ TI BIBLE

9. Kpale wa la adisciple ti Jésus awara lani? Lo aidé ala tongana nyen?

⁹ Adisciple ti Jésus ayeda lani na atënë so ayeke na yâ ti Mbeti ti Nzapa nga ala sara kue ti sara ye alingbi na ni (Jean 17:6). Me so a fâ Jésus na ndö ti keke ti pasi tongana mbeni sioni zo asara si li ti ala aga kirikiri. Jésus ahinga lani so adisciple ti lo ayeke na mabe nga ala ye Jéhovah, me lo bâ so ala bezoin ti mä yâ ti Mbeti ti Nzapa nzoni (Luc 9:​44, 45; Jean 20:9). Tongaso, lo aidé ala ti mä yâ ti aye so ala diko na yâ ni. Bâ tongana nyen la lo sara ni na ngoi so lo si na adisciple use na ndö ti lege so ague na Emmaüs.

10. Tongana nyen la Jésus a-aidé adisciple ti lo ti hinga biani so lo yeke Messie? (Luc 24:​18-27).

¹⁰ Diko Luc 24:​18-27. Bâ so Jésus afa terê ti lo hio na akoli so ape. Me lo hunda atënë na ala. Ngbanga ti nyen? Peut-être lo ye lani ti tene ala fa na lo tënë ti bê ti ala. Na a yeke ye so ala sara la. Ala tene na lo so ala yeke ku ti tene Jésus azi ala na gbe ti aRomain so ayeke komande na ngangu na ndö ti ala. Na peko ti so akoli so afa agingo bê ti ala awe, Jésus asara kua na Mbeti ti Nzapa ti aidé ala ti comprendre ye so asi lani.b Ambeni ngoi na pekoni na lakui ni so, Jésus awara ambeni disciple ni na lo fa nga na ala nda ti aprophétie so (Luc 24:​33-48). Nyen la e peut ti manda na lege ti mbaï so?

11-12. (a) Nyen la e peut ti manda na lege ti fason so Jésus afa na nda ti atâ tënë ti Mbeti ti Nzapa? (Bâ nga afoto.) (b) Zo so ayeke manda Bible na Nortey a-aidé lani lo tongana nyen?

¹¹ Tongana nyen la e peut ti mû tapande ti Jésus? Kozo ni, na ngoi so e yeke manda Bible na azo, a yeke nzoni na kode e hunda atënë ti mû lege na ala ti fa aye so ayeke na bê ti ala (aProv. 20:5). Na peko ti so e hinga atënë ti bê ti ala awe, a yeke nzoni e fa na ala tongana nyen ti wara aversê so apeut ti aidé ala na yâ ti kpale ti ala ni. E yeke fa na ala ape ye so ala doit ti sara. Me e yeke hunda na ala atënë so ague oko na aversê ni. E yeke wa ala ti gbu li na ndö ti ye so ala diko nga tongana nyen la ala peut ti sara ye alingbi na ni. Zia e bâ tapande ti Nortey, mbeni ita-koli so ayeke na Ghana.

¹² Nortey ayeke na ngu 16 na ngoi so lo komanse ti manda Bible. Me kete na pekoni, azo ti sewa ti lo akanga lege na lo. Nyen la a-aidé lo lani ti ngbâ ti manda Bible? Ita so ayeke manda Bible na lo asara kua na Matthieu chapitre 10 ti fa na lo so a yeke sara ye ti ngangu na atâ Chrétien. Nortey atene: “Na ngoi so a komanse ti sara aye ti ngangu na mbi, mbi hinga biani so mbi wara tâ tënë awe.” Ita ni a-aidé nga lo ti gbu li na ndö ti Matthieu 10:​16, tongaso si lo peut ti sara hange nga lo ne azo ti sewa ti lo na ngoi so lo yeke sara lisoro na ala na ndö ti tënë ti Nzapa. Na peko ti batême ti Nortey, lo ye lani ti sara kua ti pionnier me babâ ti lo aye ti tene lo gue na université. Ita ni afa na Nortey ape ye ti sara. Me lo hunda na lo atënë so a-aidé lo ti gbu li na ndö ti amama-ndia ti Bible nga ti mû nzoni desizion. Ye ti peko ni ayeke nyen? Nortey amû desizion ti ga pionnier. Babâ ti lo atomba lo na da. Nortey apensé nyen na ndö ti aye so asi so? Lo tene: “Mbi yeke sûr so nzoni desizion la mbi mû.” Tongana e nga kue e aidé azo ti gbu li na ndö ti Bible, e peut ti aidé ala ti ga aChrétien so akpengba.—aÉph. 3:​16-19.

AIDÉ AITA-KOLI TI GA ‘AKOLI SO AYEKE TONGANA AMATABISI’

13. Nyen la Jésus asara ti tene a ngbâ ti fa tënë na peko ti so lo kiri na yayu? (aÉphésien 4:8).

¹³ Na ngoi so Jésus ayeke lani na sese, lo sara tâ gï ye so Babâ ti lo ahunda na lo ti sara (Jean 17:4). Me Jésus apensé ape so gï lo la lo peut ti sara ye so bê ti Jéhovah aye. Na yâ ti angu ota na ndambo so lo sara kua ti fango tënë na sese, lo fa nga kua ni na ambeni zo. Kozo ti tene Jésus akiri na yayu, lo sara confiance na adisciple ti lo. Lo mû na ala kua ti fango nzoni tënë, ti fango ye nga na ti bango lege ti awakua ti Jéhovah so lo ye ala mingi. Peut-être ambeni disciple so amû li ni na yâ ti kua ni ade awara ngu 30 ape. (Diko aÉphésien 4:8.) Tongana nyen la na yâ ti andangba lango 40 ti Jésus na sese lo aidé akoli so amû terê ti ala na Nzapa so, so ayeke be-ta-zo nga so ayeke sara kua ngangu ti ga ‘akoli so ayeke tongana amatabisi’?

14. Nyen la Jésus afa na adisciple ti lo na yâ ti andangba lango 40 so lo sara na sese? (Bâ nga foto.)

¹⁴ Jésus amû lani wango polele na adisciple ti lo, me na ndoye. Na tapande, lo bâ lani so ambeni ayeke na kite so lo kui nga a zingo lo na kuâ, tongaso lo aidé ala ti hinga tâ tënë ni na lege so lo mû na ala wango (Luc 24:​25-27; Jean 20:27). Lo wa nga lani ala ti zia li ti ala mingi na ndö ti kua ti Jéhovah ahon ti zia li ti ala gï na ndö ti kua ti nginza ti ala (Jean 21:15). Lo dabe ti ala ti haka pëpe aye so ala yeke sara na yâ ti kua ti Jéhovah na aye so amba ti ala apeut ti sara (Jean 21:​20-22). Lo leke nga lani ambeni bango ndo so ala yeke na ni, so ayeke na lege ni ape, na ndö ti Royaume nga lo aidé ala ti zia li ti ala na ndö ti kua ti fango nzoni tënë (Kus. 1:​6-8). Nyen la a-ancien apeut ti manda na lege ti tapande ti Jésus?

15-16. (a) Na yâ ti aye wa la a-ancien apeut ti sara ye tongana Jésus? (b) Tongana nyen la Patrick abâ nzoni na lege ti wango so a mû na lo?

¹⁵ Tongana nyen la a-ancien apeut ti sara ye tongana Jésus? Ala doit ti fa kua na aita-koli, même ala so ade maseka, tongaso si ala sara akua mingi na yâ ti congrégation.c A-ancien ayeke ku ape ti tene aita so ala yeke fa kua na ala aduti mbilimbili-kue si. Ala bezoin ti fa kua na aita-koli so ade maseka na ndoye, tongaso si ala sara terê ti ala kete, ala duti azo ti confiance nga ala duti nduru ti aidé azo.—1 Tim. 3:1; 2 Tim. 2:2; 1 Pi. 5:5.

¹⁶ Bâ tongana nyen la Ita Patrick abâ nzoni na lege ti wango so a mû na lo. Na ngoi so lo de maseka, lo yeke tene ka tënë nga lo yeke sara ye na nzoni bê ape na azo, même na aita-wali. Mbeni ancien abâ so Patrick abezoin ti sara achangement na lo mû na lo wango polele, me lo sara ni na nzoni bê. Patrick atene: “A nzere na mbi so lo mû lani na mbi wango ni. Mbi yeke découragé lani na ngoi so mbi bâ amba ti mbi awara akua so mbi ye ti sara. Me ancien ni a-aidé mbi ti bâ so mbi bezoin ti sara terê ti mbi kete nga ti sara ye na nzoni bê na aita ahon ti zia li ti mbi gï na ndö ti akua.” Ye ti peko ni ayeke so Patrick aga ancien na ngoi so lo yeke na ngu 23.—aProv. 27:9.

17. Tongana nyen la Jésus afa so lo sara confiance na adisciple ti lo?

¹⁷ Jésus amû lani na adisciple ti lo kua ti fango tënë nga na ti fango ye. Peut-être adisciple ni abâ lani so ala lingbi ti sara kua ni so ape. Me Jésus ayeke na kite ape so ala peut ti sara ni, na lo fa ni na ala. Jésus asara confiance kue na ala, ni la lo tene: “Legeoko tongana ti so Babâ atokua mbi, mbi kue mbi tokua ala.”—Jean 20:21.

18. Tongana nyen la a-ancien apeut ti sara ye tongana Jésus?

¹⁸ Tongana nyen la a-ancien apeut ti sara ye tongana Jésus? A-ancien so aninga na kua ni ayeke mû kua na aita (aPhil. 2:​19-22). Na tapande, a-ancien apeut ti hunda na amaseka ti nettoyé Da ti Royaume nga ti bâ lege ni. A-ancien apeut ti mû kua na aita-koli, ala fa na ala tongana nyen ti sara ni nga ala zia ala ala sara kua ni. Mbeni ita so aga ancien fini fini, so iri ti lo Matthieu, atene so lo kiri singila mingi na a-ancien so aninga na kua ni, so afa na lo ti sara akua nde nde na yâ ti congrégation nga ala yeke na confiance so lo yeke sara ni nzoni. Lo tene: “Tongana mbi sara afaute, ala aidé mbi ti bâ so mbi peut ti manda ye na lege ti afaute ti mbi nga ti sara ye nzoni ahon ti kozo.”d

19. Nyen la a yeke nzoni e leke na bê ti e ti ngbâ ti sara?

¹⁹ Na yâ ti andangba lango 40 so Jésus asara na sese, lo kpengba azo, lo fa ye na ala nga lo fa kua na ala. Zia e leke na bê ti e ti ngbâ ti mû tapande ti lo mbilimbili (1 Pi. 2:21). Lo yeke mû maboko na e ti sara ni. Ndali ti so lo mû zendo, lo tene: “Mbi yeke na terê ti ala lango oko oko kue juska na lâ ni so aye ti ngoi so ayeke gue ti hunzi.”—Mat. 28:20.