Kiri singila ndali ti ‘akoli so a mû ala tongana amatabisi’

1. Ambeni matabisi so Jésus amû na e ayeke so wa?

MBENI zo so amû ye na azo ahon Jésus ayeke dä ape. Na ngoi so Jésus ayeke lani na sese, lo sara amiracle ti aidé azo (Luc 9:​12-17). Lo mû lani cadeau so ayeke kota ahon atanga ni kue na lege so lo mû fini ti lo ndali ti e (Jean 15:13). Ngbene ye na peko ti so a zingo lo na kuâ, lo ngbâ ti mû ye na e. Tongana ti so lo tene lani, lo hunda Jéhovah ti mû na e yingo vulu ti fa ye na e nga ti dë bê ti e (Jean 14:​16, 17, kete tënë na gbe ni; 16:13). Na lege ti abungbi ti congrégation, Jésus angbâ ti mû na e aye so e bezoin ni ti sara adisciple na ndö ti sese kue.—Mat. 28:​18-20.

2. Azo wa la ayeke na popo ti ‘akoli so a mû ala tongana amatabisi’ so a sara tënë ti ala na aÉphésien 4:​7, 8?

² Mbeni matabisi nde ayeke dä so Jésus amû na e. Bazengele Paul atene so na peko ti so Jésus ague na yayu, “lo mû akoli tongana amatabisi.” (Diko aÉphésien 4:​7, 8.) Paul afa so Jésus amû amatabisi so ti aidé congrégation na alege nde nde (aÉph. 1:​22, 23; 4:​11-13). Laso, na popo ti ‘akoli so a mû ala tongana amatabisi’, mo yeke wara awakua ti mungo maboko, a-ancien nga na asurveillant ti circonscription.a Ti vrai ni, akoli so ayeke mbilimbili-kue ape, tongaso ala yeke sara afaute (Jacq. 3:2). Me Seigneur ti e Jésus Christ ayeke sara kua na ala ti aidé e, tongaso ala yeke amatabisi so lo mû na e.

3. Mû mbeni tapande ti fa tongana nyen la e kue e peut ti mû maboko na kua so ‘akoli so a mû ala tongana amatabisi’ ayeke sara.

³ Jésus amû “akoli tongana amatabisi” ti kpengba congrégation (aÉph. 4:12). Me e kue e peut ti aidé ala ti sara kota kua so. E peut ti haka kua ni na kua ti lekengo mbeni Da ti Royaume. Ambeni ita ayeke sara kua ni, ambeni ayeke mû maboko na azo so ayeke sara kua ni na lege so ala ga na ala kobe wala aye ti kua ni, wala ala yeke aidé ala na ambeni lege nde. Legeoko nga, na lege ti atënë ti yanga ti e nga na aye so e sara, e kue e peut ti mû maboko na awakua ti mungo maboko, a-ancien nga na asurveillant ti circonscription ti kpengba congrégation. Zia e bâ tongana nyen la e bâ nzoni na lege ti angangu kua so ala sara nga tongana nyen la e peut ti kiri singila na ala nga na Jésus so amû na e ‘akoli so tongana amatabisi.’

AWAKUA TI MUNGO MABOKO AYEKE SARA “AKUSALA TI MUNGO MABOKO”

4. Ambeni ‘kusala ti mungo maboko’ wa la awakua ti mungo maboko ayeke sara ni lani na ngoi ti akozo Chrétien?

⁴ Na ngoi ti akozo Chrétien, a mû lani ambeni ita-koli tongana awakua ti mungo maboko (1 Tim. 3:8). Na bango ni, ala la asara “akusala ti mungo maboko” so Paul asara tënë ni (1 aCor. 12:28). A yeke polele so awakua ti mungo maboko ayeke bâ lani lege ti ambeni kota kua, tongaso si a-ancien azia li ti ala na ndö ti kua ti fango ye nga na kua ti kpengbango aita. Na tapande, peut-être awakua ti mungo maboko ayeke aidé lani na kua ti sarango acopie ti Mbeti ti Nzapa wala ala yeke vo aye so a bezoin ni ti sara na acopie ni.

5. Ambeni kusala ti mungo maboko wa la awakua ti mungo maboko ayeke sara laso?

⁵ Gbu li na ndö ti ambeni kota kua so awakua ti mungo maboko ayeke sara na yâ ti congrégation ti mo (1 Pi. 4:10). Peut-être ala yeke bâ lege ti compte nga na aterritoire ti congrégation, ala yeke sara commande ti ambeti nga ala yeke mû ni na aita, ala yeke sara kua na sono, ala yeke sara kua ti yambango azo wala ala yeke bâ lege ti Da ti Royaume. A doit ti bâ lege ti akua so kue si congrégation atambela nzoni (1 aCor. 14:40). Na ndö ni, ambeni wakua ti mungo maboko ayeke sara ambage ti bungbi ti milieu ti yenga nga ala yeke sara adiskur na abungbi ti nda-yenga. A peut nga ti mû mbeni wakua ti mungo maboko ti duti adjoint ti ita so ayeke mû li ni na mbeni groupe ti fango tënë. Na ambeni ngoi, mbeni ancien apeut ti hunda na mbeni wakua ti mungo maboko ti tene lo na lo ague asara vizite na mbeni ita ti kpengba lo.

6. Ambeni raison wa la ndali ni e kiri singila na awakua ti mungo maboko so ayeke sara kua ngangu?

⁶ Tënë ti nyen la ambeni zo atene na ndö ti anzoni ye so awakua ti mungo maboko ayeke sara na congrégation? Beberly,b mbeni ita-wali so ayeke na Bolivie, atene: “Merci na awakua ti mungo maboko, ala sara si abungbi anzere na mbi mingi. Grâce na kua ti ala, mbi peut ti he bia, ti mû acommentaire, ti mä adiskur nga ti manda ye na lege ti avidéo nga na afoto. Ala yeke aidé ti tene aita so aga na abungbi, sioni asi na ala ape nga ala yeke aidé aita so apeut ti ga na bungbi ape ti sara bungbi na lege ti vidéoconférence. Na peko ti bungbi, ala yeke mû li ni ti sara nettoyage, ala yeke bâ lege ti acompte nga ala yeke sara kue ti tene e wara ambeti so e bezoin ni. Mbi tene merci na ala.” Leslie, so ayeke na Colombie so koli ti lo ayeke ancien, atene: “Koli ti mbi abezoin mungo maboko ti awakua ti mungo maboko ti sara akua nde nde. Sân ala, kua ayeke hon ndö ti lo, tongaso mbi tene merci na ala ndali ti so ala yapu nga ala yeke nduru ti mû maboko.” Kite ayeke dä ape so tënë ti bê ti mo nga la.—1 Tim. 3:13.

7. Tongana nyen la e peut ti kiri singila na awakua ti mungo maboko? (Bâ nga foto.)

⁷ Atâa so na bê ti e e peut ti kiri singila na awakua ti mungo maboko, Bible awa e, atene: “Ala fa singila ti bê ti ala.” (aCol. 3:15). Christophe, so ayeke mbeni ancien na Finlande, afa tongana nyen la lo yeke kiri singila, lo tene: “Mbi yeke tokua mbeni carte wala mbeni message so na yâ ni mbi zia mbeni versê nga mbi fa mbeni mbilimbili ye so wakua ti mungo maboko ni asara so akpengba mbi wala raison so ndali ni mbi kiri singila na lo.” Pascal na Jaël, so ayeke na Nouvelle-Calédonie, ayeke sambela ka fani mingi ndali ti awakua ti mungo maboko. Pascal atene: “Ade ti ninga ape e sambela fani mingi ndali ti awakua ti mungo maboko ti congrégation ti e, e kiri singila na Jéhovah ndali ti ala, e hunda lo ti duti na ala nga ti aidé ala.” Jéhovah ayeke mä asambela tongaso, ye ti peko ni ayeke so congrégation kue abâ nzoni dä.—2 aCor. 1:11.

A-ANCIEN TI CONGRÉGATION “AYEKE SARA KUA NGANGU”

8. Ngbanga ti nyen la Paul atene so na ngoi ti akozo Chrétien a-ancien ‘asara kua ngangu’? (1 aThessalonicien 5:​12, 13).

⁸ Na ngoi ti akozo Chrétien, a-ancien asara lani kua ngangu ndali ti congrégation. (Diko 1 aThessalonicien 5:​12, 13; 1 Tim. 5:17.) Lani, ala yeke “fa lege” na congrégation na lege so ala yeke mû li ni na abungbi nga ala yeke mû adesizion tongana zo oko. Lani, ala yeke “gboto mê” ti aita na lege so na ndoye ala yeke mû na ala ambeni mbilimbili wango ti bata congrégation (1 aThes. 2:​11, 12; 2 Tim. 4:2). Ti vrai ni, akoli so ayeke sara nga kua ngangu ti bâ lege ti azo ti sewa ti ala nga ti ngbâ ti duti na kpengba songo na Jéhovah.—1 Tim. 3:​2, 4; Tite 1:​6-9.

9. Ambeni kua wa la a-ancien ayeke sara laso?

⁹ Laso, a-ancien ayeke na kua mingi. Ala yeke awafango nzoni tënë (2 Tim. 4:5). Ala zia nzoni tapande na lege so ala yapu na fango tënë, ala yeke leke yâ ti kua ti fango tënë na yâ ti territoire ti ala nga ala yeke fa na e ti fa tënë nga ti fa ye nzoni. Ala yeke sara nga kua tongana ajuge so ayeke na nzoni bê nga so asara kangbi na popo ti azo ape. Tongana mbeni Chrétien asara mbeni kota siokpari, a-ancien ayeke gi ti mû maboko na lo ti leke songo ti lo na Jéhovah. Na oko ngoi ni, ala yeke bâ si saleté aduti na yâ ti congrégation ape (1 aCor. 5:​12, 13; aGal. 6:1). Kozoni kue, a-ancien ayeke aberger (1 Pi. 5:​1-3). Ala yeke sara adiskur so a leke ni pendere, ala yeke sara kue ti hinga aita kue na yâ ti congrégation nga ala yeke sara avizite na aita ti kpengba ala. Ambeni ancien ayeke aidé ti leke aDa ti Royaume nga ti bâ lege ni, ala yeke leke akota bungbi, ala yeke sara kua na yâ ti Komite so abâ lege ti songo na ada-nganga, ala yeke na yâ ti Bungbi ti aita so ayeke gue na yâ ti ada-nganga ti bâ aita so ayeke na kobela nga ala yeke sara ambeni kua nde. A-ancien ayeke sara kua ngangu ndali ti e. 

10. Ambeni raison wa la ndali ni e kiri singila na a-ancien so ayeke sara kua ngangu?

¹⁰ Jéhovah atene lani so aberger ayeke bâ lege ti e nzoni, “mbeto ayeke sara [e] encore ape nga terê ti [e] ayeke dö na mbeto pëpe.” (Jér. 23:4). Ita-wali Johanna, so ayeke na Finlande, abâ so tënë so ayeke tâ tënë na ngoi so terê ti mama ti lo ason ngangu. Lo tene: “Atâa so a yeke ngangu na mbi ti fa atënë ti bê ti mbi na azo, mbeni ancien so mbi hinga lo nzoni ape akanga bê amä mbi, lo sambela na mbi nga lo tene na mbi so Jéhovah aye mbi. Mbi dabe ti mbi mbilimbili ape na atënë so lo tene lani, me mbi dabe ti mbi so mbeto asara mbi encore ape. Mbi hinga so Jéhovah atokua lo ti aidé mbi na tâ ngoi ni.” Tongana nyen la a-ancien ti congrégation ti mo a-aidé mo?

11. Tongana nyen la e peut ti kiri singila na a-ancien? (Bâ nga foto.)

¹¹ Jéhovah aye ti tene e kiri singila na bê ti e kue na a-ancien ‘ndali ti kusala so ala yeke sara.’ (1 aThes. 5:​12, 13). Henrietta, so ayeke na Finlande, atene: “A-ancien ayeke nduru ti aidé azo, me a ye ti tene ape so ala yeke na ngoi nga na ngangu mingi ahon tanga ti aita wala ala yeke wara akpale ape. Na ambeni ngoi, mbi yeke tene na ala: ‘Mo hinga? Mo yeke nzoni ancien. Mbi pensé mo hinga tongaso.’” Mbeni ita-wali na Turquie, so iri ti lo Sera, atene: “A-ancien abezoin ti tene a kpengba ala si ala ngbâ ti sara kua ti ala. Tongaso, e peut ti tokua na ala mbeni carte, ti tisa ala ti te ye wala ti tene e na ala e fa tënë.” Eskê mbeni ancien ayeke na yâ ti congrégation ti mo so mo ye mbilimbili ti kiri singila na lo ndali ti ngangu kua so lo sara? Gi alege ti fa ni.—1 aCor. 16:18.

ASURVEILLANT TI CIRCONSCRIPTION AYEKE KPENGBA AITA

12. Nyen la a leke na ngoi ti akozo Chrétien ti kpengba acongrégation? (1 aThessalonicien 2:​7, 8).

¹² Christ Jésus amû nga ambeni ‘koli tongana amatabisi’ ti aidé congrégation na mbeni lege nde. Na gbe ti fango lege ti lo, a-ancien so ayeke na Jérusalem atokua Paul, Barnabas nga na ambeni ancien ti sara kua ti surveillant so ayeke gue na ando nde nde (Kus. 11:22). Ndali ti nyen? Ndali ti oko raison so ndali ni a soro awakua ti mungo maboko nga na a-ancien: ti kpengba acongrégation (Kus. 15:​40, 41). Akoli so asara gbâ ti asacrifice ti sara kua so. Na ambeni ngoi, ala zia fini ti ala na lê ti kpale ti fa ye na aita nga ti kpengba ala.—Diko 1 aThessalonicien 2:​7, 8.

13. Ambeni kua ti asurveillant ti circonscription ayeke so wa?

¹³ Asurveillant ti circonscription ayeke voyagé ka mingi. Ambeni ayeke voyagé ayo ti sara vizite na acongrégation. Yenga oko oko, mbeni surveillant ti circonscription ayeke sara gbâ ti adiskur, lo yeke sara vizite na aita ti kpengba ala, lo yeke sara bungbi na apionnier, na a-ancien nga lo yeke sara abungbi ti fango tënë. Lo yeke leke adiskur nga lo yeke leke akota bungbi ti lango oko nga na ti lango ota. Lo yeke fa ye na Ekole ti apionnier, lo yeke sara mbeni bungbi so ayeke nde na apionnier ti circonscription ti lo nga lo yeke bâ lege ti ambeni kua so filiale amû na lo, so ambeni a bezoin ti sara ni hio.

14. Ambeni raison wa la ndali ni e kiri singila na asurveillant ti circonscription so ayeke sara kua ngangu?

¹⁴ Tongana nyen la acongrégation ayeke bâ nzoni na lege ti pendere kua so asurveillant ti circonscription ayeke sara? Mbeni ita-koli so ayeke na Turquie atene tënë so na ndö ti avizite ti asurveillant so ayeke gue na ando nde nde: “Avizite kue so ala sara apusu mbi ti mû ngoi mingi ti aidé aita. Mbi hinga asurveillant ti circonscription mingi, me lâ oko mbeni afa na mbi na yâ ti sarango ye ti lo ape so lo ye ti sara lisoro na mbi ape wala lo yeke na kua mingi.” Johanna, so e sara tënë ti lo fade, afa tënë legeoko na mbeni surveillant ti circonscription, me ala wara zo oko na yanga-da ape. Lo tene: “Mbi yeke girisa lango ni so lâ oko ape. Ade ti ninga ape, aita ti mbi ti wali use aquitté ague na mbeni ndo nde, na ala manké mbi mingi. Surveillant ni adë bê ti mbi nga lo aidé mbi ti bâ so na yâ ti kua ti Jéhovah, na ndembe so peut-être e yeke lango ayo na afami nga na akamarade ti e, me na yâ ti fini dunia, e yeke wara ngoi mingi ti duti ndo oko na ala.” Mingi ti e adabe na apendere ngoi so e na asurveillant e passé ndo oko.—Kus. 20:37–21:1.

15. (a) Ti gue oko na 3 Jean 5-8, tongana nyen la e peut ti kiri singila na asurveillant ti circonscription? (Bâ nga foto.) (b) Ngbanga ti nyen la a yeke nzoni e kiri singila na awali ti aita-koli so ayeke sara kua ngangu na yâ ti congrégation? E peut ti sara ni tongana nyen? (Bâ encadré “Girisa awali ti ala ape.”)

¹⁵ Bazengele Jean awa Gaïus ti yamba aita so aga ti kpengba acongrégation nga lo hunda na lo ti “zia aita so na lege tongana ti so alingbi na lê ti Nzapa.” (Diko 3 Jean 5-8.) Mbeni lege ti sara ni ayeke ti tisa surveillant ti circonscription na ndo ti e ti te ye. Mbeni lege ni nde ayeke ti ga na abungbi ti fango tënë so lo yeke mû li ni dä. Leslie, so e sara tënë ti lo fade, afa singila ti bê ti lo na ambeni lege nde. Lo tene: “Mbi sambela Jéhovah ti mû na ala aye so ala bezoin ni. Mbi na koli ti mbi e sû nga alettre na ala, e tene na ala so avizite ti ala akpengba e mingi.” Girisa ape so asurveillant ti circonscription ayeke nga azo tongana e. Na ambeni ngoi, terê ti ala ayeke son, ala yeke gi bê ti ala nga même ala yeke découragé. Peut-être atënë so mo tene na ala na nzoni bê wala mbeni kete cadeau so mo mû na ala ayeke kiringo tënë na sambela so ala sara ti hunda mungo maboko.—aProv. 12:25.

E BEZOIN ‘AKOLI SO A MÛ ALA TONGANA AMATABISI’

16. Ti gue oko na aProverbe 3:​27, ahunda wa la aita-koli apeut ti hunda terê ti ala na ni?

¹⁶ Na yâ ti dunia kue, e bezoin aita-koli mingi ti sara kua tongana ‘akoli so a mû ala tongana amatabisi.’ Tongana mo yeke mbeni ita-koli so awara batême awe, eskê “mo yeke na ngangu ti mû maboko”? (Diko aProverbe 3:27.) Eskê mo yeke nduru ti gi ti ga mbeni wakua ti mungo maboko? Eskê mo peut ti gi ti sara kua tongana ancien?c Eskê mo peut ti sara achangement tongaso si mo peut ti gue na Ekole ti awafango nzoni tënë ti Royaume? Ekole so ayeke fa ye na mo nga ayeke aidé mo ti tene Jésus asara kua na mo mingi. Tongana mo bâ so mo lingbi ape, sambela Jéhovah. Hunda lo ti mû na mo yingo vulu ti lo tongaso si mo peut ti sara kua kue so a mû na mo.—Luc 11:13; Kus. 20:28.

17. Nyen la ‘akoli so a mû ala tongana amatabisi’ afa na e na ndö ti Gbia ti e, Christ Jésus?

¹⁷ Ngangu kua ti aita-koli so Jésus azia ala tongana ‘akoli so a mû ala tongana amatabisi’ afa so lo la lo yeke fa lege na e na lâ ti nda ni so (Mat. 28:20). E kiri singila mingi so e yeke na mbeni Gbia so asara ye na ndoye nga so amû ye mingi na zo, so ahinga aye so e bezoin ni nga lo mû na e aita-koli ti aidé e. Tongaso, gi alege ti fa singila ti bê ti mo ndali ti ngangu kua ti akoli so. Nga, girisa lâ oko ape ti kiri singila na Jéhovah, ndali ti so lo la lo mû na e “nzoni matabisi kue nga na matabisi kue so ayeke mbilimbili-kue.”—Jacq. 1:17.